ትማሊ ሰንበት 5 ለካቲት፡ ናብቲ ወከልትን ኮራዅርን ውልቀምልካዊ ስርዓት ህግደፍ፡ ገለ ብቴክስት ገለ ድማ ብተባራሪ ወረ ተዓዲሞም፡ ‘ላዕለዎት ሓለፍቲ’ ክመጹ ስለዝኾኑ ኣፈርክቡ ተባሂሎም፡ በብኽልተ በብሰለስተ፡ ዝጣራቐሙሉ ኣዳራሽ ጎሰስ ዝብሉ ዝነበሩ ሰባት፡ ብኽልተ እግሮም ዲዮም በርባዕተ መሓውሮም ዝኸዱ ዘለዉ ንምርግጋጽ ኣስተብህሎ የድሊ ነይሩ።

ዓሻ ጽቡቕ ኣሎ ዘመድ ዓሻ ከፊኡዎ ‘ሎ’ ከምዝብሃል፡ ብፍላይ በረድ ወሪዱ መጠንቀቕታ ኩነታት ኣየር (weather Warning) ኣብ ቦትኡ እናሃለወ ካብ ማንቸስተር ከይተረፈ ናብ ኣኼባ ህግደፍ ናብ ለንደን ዘጓሕ ምባሎም፡ ምስቲ ፍረ-ኣልቦ ኣኼባኦም ኣነጻጺርካ ክትርእዮ ኸለኻ፡ የተሓሳስበካ፡ ኣብ ክንድኦም ከኣ ትጭነቕ፡ መሳኪን!!

መቸም ከምቲ ኣብ ዝተፈላለየ ቦታታት እንተላይ ኣብ ዝሓለፈ እዋን ኣብ ለንደን ፈስቲቫል ኣብ ዘካይዱሉ ዝነበሩ እዋን ብመንእሰያት ደለይቲ ለውጢ ዘጋጠሞም ተቓውሞ ከይደግሶም ተባሂሉለይ እንዲዩ፡ እቲ ኣኼባ ተመስጢሩ እዩ። እቲ መሓዮታት ናይቲ ኣኼባ ስራሕና ኢሎም ነቲ ጉዳይ ንምሕባእ ዝፈተኑዎ ጥበባት መቸም ሻቕሎቶም ሰማይ ዓሪጉ ኣብ መወዳእታ እዋኖም ተገምጊሞም ከምዘለዉ ዳግም ዝምስክር እዩ። መጀምርያ፡ ነፍሲ ወከፍ ዕዱም ጥራይ ዝፈልጦ ምስጢራዊ ቁጽሪ ኮድ ክወሃቦ እዩ ተሓሲቡ፡ እዚ ምጥዓም ምስ ኣበየ ኸኣ፡ ነፍሲ ወከፍ ዕዱም ሓንቲ ንእሽቶ ባንዴራ ኤርትራ ሒዙ ክመጽእ ተማቲኦምሉ፡ ኣብ መወዳእታ ግን እቲ ዕድመ ብቴክስት ወረን ብሰላሕ መላሕ፡ ከምቲ ልሙድ ከኣ ኣብ ኣፍደገ ሕብሪ ደጋፋይን ተቓዋማይን ብምልላይ ተገይሩ። መጋበርያ ህግደፍ፡ ንኻልእ መዓልቲ ምእታው ዕዱማቶም ክቐለሎም ግን ሓንቲ ንእሽቶ ምኽሪ ወስ ከነብለሎም፡ ዕዱም ክመጾም ከሎ፡ ኣብ ኢዱን ኣብ ርእሱን ምድህሳስ ጥራይ እዩ ዘድልዮም። እቶም ደገፍቲ ከብዲ ኢዶም ብተሃበር ጣቕዒት ስለዝላደየ፡ ሕርፍፍ ዝበለ፡ ሓንጎሎም ጓሕጕሖም ኣብ ገዛ ገዲፎሞ ስለዝመጹ ከኣ ርእሶም ፎኪስ፡ ቁልዕጽዕጽ ዝብል እዩ። በንጻሩ ናይቶም ተቓወምቲ፡ ኢዶም ንቡር ርእሶም ድማ ረዚን፡ ተሪር እዩ’ሞ፡ ንመጻኢ ክሳብ ክንድ’ዚ ምሽጋር ኣይከድልዮምን እዩ።

እቲ ጥበብ ምስጢራውነት ንህግደፍ ስለዘይሰለጦም፡ እቶም ውሑዳትን ርቡሓትን ኣብ ውሽጢ ሒደት ሰዓታት ተጸዋዊዖም ኣብ ኣፍደገ እቲ ኣዳራሽ ብርእሰምትእምማን ኣብ በረድ ደው ኢሎም ዝነበሩ ኤርትራውያን ደለይቲ ለውጢ ብዘስምዖዎ ዝነበሩ በዳሂ ሕልናዊ ድምጺ ውጹዓት፡ እቶም ደገፍቲ ህግደፍ ደኒኖም ክሓልፉ ኸለዉ፡ በቲ ዕሙር ጎደና ዝተሓላለፉ ዝነበሩ ወጻኣተኛታት ድማ ነቲ ብሓይልን ስምዒትን ዝወዓዋዕ ዝነበረ ናይ ተቓውሞ ድምጺ ግዱስ ኣቓልቦ ይህቡዎም ነይሮም። ነቶም ዕሱባት ህግደፍ፡ ‘ድሕሪ ቐዛፊ ኢሳያስ ተቐዛፊ’ ትብል ጭርሖ፡ ከም ካራ በሲዓ ኣብ ዓጽሞም ትበጽሕ ከምዝነበረት፡ ካብ ኣዳንና ርእሶም ይረአ ነይሩ። እታ ድራማዊት ናይ ቀዛፊ ህሞት፡ ኣብ ኤርትራ ምድጋማ ከምዘይተርፋ ተዘኻኽሮም ስለዝነበረት ምዩቕታኦም ምቍጽጻር ስኢኖም፡ ቀልጢፎም ክኽወሉ ናብቲ ኣዳራሽ ክሸኩ ከኣ ተራእዮም።

‘ዝብእስ ዝብላዕ ኣሎ እንተበሉዎ ናበይ ከይበለ ክጎዪ ሓደረ’ ዝብሉዎ ምስላ፡ ኣሎ። ዕሽነት ኮራኩር ህግደፍ ግን ካብኡ ዝገደደ እዩ። እንታይ? ብመን? ከይበሉ፡ ኣርእስትን መዳርን ከየጣለሉ እዮም ሃሊሎም።

ኮነ ኸኣ፡ ኣሽንባይ ዶ እቶም ዕዱማት፡ እቶም ዓደምቲ’ውን፡ ብዛዕባ ምንታይ ክዛረቡ ከምዝመጹ ኣይፈለጡን። ሓላፊ ፖለቲካዊ ጉዳያት፡ የማነ ማንኪን፡ ሚኒስተር ጉዳያት ወጻኢ ዑስማን ሳልሕን፡ ኣብ ቅድሚ እቲ በርባዕተ እግሩ በረድ እናሰበረ ዝመጾም ግዙእ፡ “ዝብሃል ሓዱሽ ነገር የብልናን፡ ንእግረመንገድና ኢና ኣኼባ ጸዊዕና፡ እንግሊዝ እዮም ጸዊዖምና” ክብሉ ኣጀንዳ ከምዘይብሎም ደርጕሖምሎም። ሽዑ ኸኣ’ዮም፡ ገለ ካብ ኣኼበኛታት፡ ነቲ ኣጀንዳ ኣልቦ ኣኼባ ናይቶም ኣካየድትን፡ ቆሎጥጡቖ ሕቶታት ሰማዕቶምን ምስ ኣስተብሃሉ፡ ‘ዋይ ኣነ፡ እዚ ኹሉ ጎይና፡ ህበይን ዕትሮን ርኢና ተመሊስና’ ዝበሉ። ንሕና ድማ ሽዑ ኢና፡ ኣብቲ ገዛ ሒደት ሰብ ክልተ እግሪ ‘ውን ሰሊኾም ከምዝነበሩ ዝተገንዘብና።

ብዝኾነ፡ እቶም ተደናገጽቶም ‘ህበይን ዕትሮን’ ክብሉ ዝጠመቑዎም ሰበ ስልጣን ህግደፍ፡ ብእንግሊዝ ተዓዲምና ኢና መጺእና ክብሉ መገሻኦም ከጸባብቑ ‘ኳ እንተፈተኑ፡ በቲ ኣብ ዝሓለፈ ወርሒ ኣብ ሰሜን ኢትዮጵያ ብምትሕብባሮም ከምዝተገብረ ዝሕመ ቅትለት 5 ኤሮጳውያን ቱሪስትን፡ መጭወይቲ ናይ 2 ካልኦትን ንመግናሕቲ ከምዝተጸውዑ ይንገር። ብዓቢኡ ካብቲ ናይ  ልዕሊ 50 ሃገራት መራሕትን ዲፕሎማሰኛታትን ተዓዲሞምሉ ዘለው፡ ንጉዳይ ሶማልያ ዝምልከት ን23 ለካቲት ኣብ ለንደን ዝካየድ ኣህጉራዊ ዋዕላ፡ ከም ተሓባበርቲ ሽበራ ተራእዮም፡ ከምዝተኣገዱ ‘ውን ይስማዕ ኣሎ። እዚ ሓቂ እንተኾይኑ፡ ጭፍራ ህግደፍ ካብቲ ብዘይካይ ኣይፍታሕን እዩ ዝብሉዎ ጉዳይ ሶማል ዓዲ ምውዓሎም፡ ካብ ዓለም ተነጺሎም ጥራይ ዘይኮነ፡ ነጺሎም ‘ውን ከምዘለዉ ዳግማይ መረጋገጺ ክኾነና እዩ።

እዚ መዳርግቲ ዘይብሉ ተነጽሎ ኸኣ’ዩ ዋላ ብምትሕብባር ምስ ግብረሽበራ፡ ወይ ዝኾነ ኣሉታዊ ስጉምቲ፡ ኣቓልቦ ንምርካብ ዘሀንጥዮም ዘሎ። እዚ ናይ መግናሕቲ ጻውዒት መንግስቲ እንግሊዝ ነዚ እዩ ዝምስክር። ነቲ ኣብ ኢትዮጵያ ዞባ ዓፈር ዝተኻየደ ቅትለትን ጭውያን ኣይተሓባባርናዮን ፡ በንጻሩ ማእለማ ኢትዮጵያ እዩ፡ ነገርና ደልያትና፡ ኢሎም ክውጭጩሉ ተሰሚዖም እዩም። ከምኡ እንተኾይኑ፡ ስለምንታይ ደኣ፡ ነዚ ናይ ሃገር እንግሊዝ ጻውዒት፡ ‘ንዓና ዘርኢ ጉዳይ ኣይኮነን፡ ንፈልጦ የብልናን’፡ ኢሎም ዘይነጽጉዎ? ኤእ፡ ኣቓልቦ ይረኸብ እምበር፡ ብኸመይ ኣገባብን በየናይ ዋጋን ምርካቡ ዘገድሶም ኣይኮነንን ፍሹላት መራሕቲ ህግደፍ።

እቶም ኣመና ዘደንግጹ ግን፡ እቶም ንህዝቢ ኤርትራ ብዘውርዱሉ ዘለዉ ስቓይ ማእሰርትን ሞትን ኣእዳዎም ደም ስለዝተጸየቐ፡ ካብ ምጽላቝ ሲ ኣጸቢቕካ ምጭምላቕ ዝሓረዩ ዕሉላት ገበነኛታት ሓለፍቲ ህግደፍ ኣይኮኑን። እቶም፡ ንኹሉ ፍርያት ሓርነትን ዲሞክራስን ኣብ ወጻኢ እናተቛደሱ ንዝህቢ ኤርትራ ጽንቃቕ ናይቲ ንዓኣቶም ፍጊዕ ዝበሎም ራህዋ ዝበቐቑሉ፡ ኣብ ወጻኢ፡ ሃሱሳዊ ስርሓት ህግደፍ ዘሳልጡሎም ዘለዉ ከፈትን ዓጸውትን ማዕጾን ህግደፍ ‘ውን ኣይኮኑን። ነዚኣቶም ጸሊም መዝገብ ህዝቢ ኤርትራ ይፍረዶም። እቶም ብሓቂ ዘደንግጹ፡ እቶም ላንጋ ላንጋ ኮይኖም፡ ቀትሪ ምስ ህግደፍ ለይቲ ምስ ተቓወምቲ ማንታ ህይወት ዘሕልፉ ዘለዉ ኣሕዋትን ኣሓትን ‘ዮም እሞ፡ ሰዓት መላኺ ስርዓት ህግደፍ ኣኺሉ’ዩ፡ ህበይን ዕትሮን ግዳ ቀቀሊሉ፡ ካብ ህግደፍ ብኣግኡ እንተዘይርሒቕኩምስ ወረ ዓይንኹም ካልእ ክትርኢ እያ ንብሎም።

ስርዓት ህግደፍ፡ ኣብዚ እዋን’ዚ ከምታ ወዲቓ ክንሳ፡ ብሓንቲ ሱር ወፋሪ ዕንጨይቲ እተሕርቕ ምውቲ ገረብ እዩ ኮይኑ ዘሎ ‘ሞ፡ ሓቢርና ነበርቍቆ። ኣምሳያኡ ድማ መድሕን ናይዚ እናረኣናዮ ብቐስታ ዝጠፍእ ዘሎ ውጹዕ ህዝቢ ኤርትራ ዝኸውን ቅዱስ ስርዓት ንትከል።

ምልኪ ይፍረስ ፍትሒ ይንገስ!

ኣማኑኤል ኢያሱ