ጎረቤተይ ናይ ክልተ ሰሙን መገሻ ስለ ዝነበራ ክትዛረበሉ ዘሕፍር ሓደራ ኣሰኪማትኒ ከደት። ንሳ ዝበለቶ፡- ክብርትን ፍቅርትን ጎሬቤተይ፡ እዛ ዘሰክመኪ ዘሎኩ ሓደራ ብድሕረይ ንክትፍጽምለይ ቃል እተውለይ ፣  ሕድርኪ ሕድሪ ጎሮረኪ። ኣነን ንሶምን ተረዳዲእና ኢና።

ተቃላጢፈ ጸገም የሎን በልክዋ። ጸኒሔ ዝኣተክዎ ሓደራ ከየዕብር ኩለን እተን ዝበለትኒ ኣብ ምፍጻም ከሎኹ ነብሰይ ክምርምር ጀሚርኩ። ውዕል ሕድር ክብል ኪዳን ከበደኒ። ንሰብ ከይተንፍስ ሓፊረ። ንስድራ ከይነግር ግድን ናይ ኣእምሮ ሓኪም ክትርኢ ኣሎኪ ኢሎም ከይደፍኡኒ  ፈሪሐ። እቱይ ኮይኒ እቱይ ዝኣተክዎ ሓደራ ጭላፍ ከይኣጉደልኩ ፈጸምኩ።

እታ ሕድሪ

ንግሆ ቅድሚ ጸሓይ ብራቕ ተሲእኪ ሰላምታ ኣጽግብለይ። ቀጺልኪ ቁርሲ እንዳቆረሱ ከሎዉ እዛ ካሴት እዚኣ ኣስምዕለይ። ክትከድኪ ከሎኪ- ምሸት የራክበና፡ ደሓን ወዓሉ፡ ብምባል ተፋነውዮም። ምሸት ደሓንዶ ዊዒልኩም ኢልኪ፡ ኢድ ነሲእኪ፡ ኣብ ድራር እዛ  ደርፊ እዚኣ ኣስምዕለይ። ምስ ወድእኪ ጽቡቃት!  ጽባሕ የራክበና፡ ደሓን ሕደሩ  ብምባል ተፋነውዮም። ክከብደኪ ምዃኑ ይፈልጥ እየ፤ ግን ሕራይ ካብ በልኪ፡ እግዝኣብሔር ምሳኪ ይኩን ኢላትኒ ከደት። ኣነ ከኣ ነቲ ቃል ዝኣተክዎ ኣተርጎምኩ። እንተደሊኩም  ጽልልቲ  በሉኒ።  እቲ ኣነ ዝኣተክዎ ሓደራ ኣብ ቅድሚ ገዛኣ ንዝርከቡ  “ዕንባባታት”  ነበሩ ቢላ ታሪካ ደምደመት። እቲ ክፍሊ ወዱን ጓሉን ብምልኡ ሰሓቐ። ንሳ ግዲ የሎን፡ ሰሓቑ!  ኣነውን ስሒቐሉ እየ ክትብል ምሳና ሰሓቐት። እቲ ክፍሊ ምስ ተረጋገኤ ግን ሕድሪ  ዋላ”ኳ ቃል ትኩን እምበር ከባድ እያ ኣብ ዝብል ትርጉም ተሰማሚዑ ሓለፈ።

ኢሰያስ ኣብ ትግባረ ሕድሪ ስውኣት ዝምልከት ንዝቀረቦ ሕቶ ክምልስ ከሎ –  ኣነ ንሕሉፋት ይኩን ንትሩፋት ዝኣተክዎ ሕድሪ (promise) የብለይን፡  ኢሉ ካብ ሓደ ግዜ ንላዕሊ ሓጪጩ።  እኩል ግብረ መልሲ ከይረከበ ከኣ ሓለፈ።  ቖጽላ ዝጠዓመትልካ ኦምስ ሱራ ፊሒርካ ድገማ ከምዝብህል ከኣ ንሱ ቖጽላ ሸማጢጡ ፡ ንሱራ ንኣብርሃም ዓዲሉ ብጸሓይ ብርሃን ከላምዶ ተራእዩ። ሕድሪ ስውኣት ክርገጽ ዘይትምስክር ሩሕ ካብ ትንፋስ እንስሳ እንታይ ፈለያኣ? ኢሳያስ ክሳብ ዘሎ ጽንጽያ ዓይኑ ከይተንፍርሉ ፤ ንሱ ኣብ ዝደክመሉ ከኣ ወዱ ወይ ጓሉ ይግዛእኩም ኢሎም ተላብዮም ዝሓለፉ ብጾት ነይሮምና ድዮም? ዓሻ ሕቶ? ሃ  …. እዚ እቲ ሓደ ወገን ኮነ።

ካልኣይ ወገን’ከ?  ተሰከምቲ ሕድሪ ኣብ ኣስመራ ጥራሕ  ድዮም ዘሎዉ? ተሰከምቲ ሕድሪ ህግደፍ ጥራሕ ድዮም? ተሰከምቲ ሕድሪ ጀነራላት ኢሳያስ ጥራሕ ድዮም? ተሰከምቲ ሕድሪ ኩልና’ዶ ኣይኮናን? ብፍላይ እዃ እቶም ንእተጠልመ ሕድሪ ንምምላስ ንቃለስ ኣሎና ንብል።  ከም ዝመስለኒ ሕልሚ በዚሑ።

ገለ ንወዲ ጾሎት ብጸሎት፣ ገለ የሎን፡ ብማጨሎት! ገለ ከም ዓሚ ቅድሚ ዓሚ፡ ብዘሎ ዓቅሚ፤ ገላ ብምህለላ፣ ገለ ብደበላ …. …… ….. …. ከምኡ ኢሉ ይቅጽል። ክሳብ መኣስ? ሰዓቱ ዝሓለፎ ሕድሪ’ኮ ዋላ እንተመጸ’ውን ርካብ ሕድሪ ተባሂሉ ኣይጽውዓን እዩ። ንጉዳይና ዝምልከት ዘይተገብረ እምበር ዘይተባህለ የሎን ዝብል ምስላ ከይለገቦ ንፈርሕ ። ዝበልና ንበል፡  ሎሚ እውን እታ መፍትሕ ምሳና ኣላ።

መረጸ ኣስመላሽ ……….  August 31, 2013            ፍላይ ማንታ እዛ ጽሕፍቲ ኣብ መጻኢ