መስራትን ኣሰናዳእን ኣሰና፣ ኣማኑኤል ኢያሱ ብምኽንያት 1ይ ዓመት ስርሒት ፎርቶ ኣብ መልበርን (ኣስትራልያ) ትማሊ ሰንበት 26 ጥሪ ኣብ ዘካይዶ ኣኼባ፣ ህዝቢ ኤርትራ ነቲ ጠላምን ጨካንን ጨፍላቕን ምልካዊ ስርዓት ኢሳይያስ ዘይግብኦ ቀጻሊ ሕድገታት ስለዝገበረሉን፣ ብዝተፈላለዩ እንተታት እናተጠራጠረን እናተማተአን ንምውዳቑ ወሳኒ ስጉምቲ ክወስድ ስለዘይከኣለን ኣብ ሓደጋ ውድቀትን ምብትታንን ተገምጊሙ ከምዘሎ ኣረዲኡ።

Eritrean Australians for Justice and Peace ን ደለይቲ ፍትሒ ኣብ ኣውስትራልያን፣ ብምኽንያት 1ይ ዓመት ስርሒት ፎርቶ ብዝገበሩሉ ዕድመ መሰረት ኣብ ኣውስትራልያ ዝርከብ መስራትን ኣሰናዳእን ኣሰና ምስዚ ኣተሓሒዙ፣ ኢሳይያስ ንህዝቢ ኤርትራ ንምቍጽጻርን ንምብርካኽን ክጥቀመሎም ንዝጸንሐ ሜላታት ምልክን ራዕድን፣ ፈላሊኻ ግዛእን ድሕሪ ምዝርዛሩ፣ ኣብዚ እዋን’ዚ ኢሳይያስን ጉጅሊኡን ፖለቲካዊ ርእሰማሎም ሃሊኹ ከምዘሎ ኣብሪሁ። እንተኾነ፣ እቲ ስርዓት ሓይሉ ወዲኡ ክንሱ፣ ድኽመታት ህዝቢ ኤርትራን ደለይቲ ፍትሕን እናመዝመዘ ይጻናሕ ምህላዉ ኣገንዚቡ።

ቀጺሉ፣ ነቲ ናይ ዘተን ምርድዳእን ዘይፈልጥ ንሕስያ ዘይብሉ መላኺ ስርዓት ኢሳይያስ፣ በቲ ንሱ ዝርድኦ ቋንቋ ብዘይንሕስያ ካብ ስልጣን ክምሕዎ ቆራጽ ስጉምቲ እንተዘይወሲዱ፣  እቲ በሲሉ ለውጢ ዝጠልብ ዘሎ ኩነታት ሓሊፉዎ፣ ናብ ‘ምግርዛም’ ገጹ ክኸይድ ስለዝኽእል፣ እታ ን23 ዓመታት ብምልኪ ዝተሳቐየት ሃገርና ናይ ለውጢ ዕድል ኣሕሊፋ፣ ኣጎላጕል ብምዃን ናብ ዝኸፍአ ውድቀት ከተምርሕ ከማትኽእል ምስ ካልኦት ኣብነታት ብምዝማድ ኣረዲኡ።

ህዝብን ሃገርን ኤርትራ ንምድሓን ፣ ኣብዚ እዋን’ዚ “ስምረት ንኤርትራውያን ምርጫ ዘይኮነ ግዴታ እዩ” ዝበለ ኣማኑኤል፣ ሓደ ካብቶም ለውጢ ብምቅልጣፍ ድሕነት ሃገር ኣብ ምርግጋጽ ወሳኒ ኣበርክቶ ዘለዎም ህጹጻት ስጉምታት፣ ሕድሕድ ምትእምማን ፣ ሓባራዊ ራእይ ምምዕባል ምዃኖም ብምዝኽኻር፣ ስርሒት ፎርትን ቅድሚኦም ዝነበሩ ምንቅስቓሳትን ካብ ዓወት ዘባኾሩ ድኽመታቱ  ኣለልዩ መሰረታዊ ለውጢ ንምምጻእ ርጹር ስትራተጂ ስኢሉ ድሕነት ሃገሩ ከውሕስ ኣተሓሳሲቡ።

ኣብቲ ኣኼባ ዝተሳተፉ ደለይቲ ፍትሒ መልበርን ብወገኖም፣ በቲ ዝተኸፍተ ክፉት መድረኽ ዘተ ሓጎሶም ብምግላጽ፣ ጠንቂ ዘይምትእምማን ኣብ ዝኾኑ ጉዳያትን ፍትሓቶምን ዘለዎም ርእይቶታት ኣፍሲሶም።

እቲ ድሮ ኣብ መልበርን ፣ ብሪስበን ዝተኻየደ፣ ኣብ ካላኦት ከተማታት ኣውስትራልያ ‘ውን ዝቕጽል ዘተ ኣብ መደባት ድምጺ ኣሰና ክቐርብ እዩ።