ካብ ዝተፈላለያ ከተማታት ሓያለ ሰዓታት ብመካይን ተጓዒዞም ናብ ዋሺንግተን ዲሲ ዝመጽኡ ኤርትራውያን ደለይቲ ፍትሒ ኣብ ንመበል 23 ዓመት ናጽነት ኤርትራ ብሰላማዊ ሰልፍን ዘተን ንኽልተ መዓልታት ዘኪሮማ ውዒሎም።

ኣብቲ ብዓርቢ 23 ግንቦት ብሰልፊ ዝጀመረ ጽንብል ዝኽሪ መበል 23 ዓመት፣ ኤርትራውያን ደለይቲ ፍትሒ ውድቀት ምልካዊ ስርዓት ኢሳይያስን ምምጻእ ዲሞክራስያዊ ለውጥን ዝጽውዑ ጭርሖታት ብምልዓል እናጭርሑ፣ ምረሻኦም ብቤተመንግስቲ ኣመሪካ ዋይት ሃውስ ብምፍላም፣ ናብ ኣዳራሽ ባይቶ ኣመሪካ ካፒቶል ሂል ኣምሪሖም። ኣብ መወዳእታ ድማ፣ ባህላዊ ማእከል ማሕበረኮም ኤርትራውያን ተባሂሉ ኣብ ዝፍለጥ ናይ ህግደፍ ማእከል ብምብጻሕ ተዛዚሙ።

ኣብቲ ዝቕጸለ መዓልቲ ቀዳም 24 ግንቦት ኣብ ሂልተን ሆተል ካብ ቅድሚ ቀትሪ ክሳብ ምሸት ኣብ ዝተኻየደ ተኸታታሊ ሓባራዊ ዘተን ኣስተምህሮታትን፣ ምንቅስቃስ ዲሞክራስያዊ ለውጢ ኣብ ምቅልጣፍ ኣብ ዝሕግዙ፣ ህዝባዊ ምንቅስቃስ፣ ድሕነት ሃገር፣ ብዙሕነትን ሓድነትን ኤርትራውያን ዝኣመሰሉ ሰፋሕቲ ኣርእስታት ዘተን ክትዕን ኣካይዶም።

ኣብቲ ኣጋጣሚ፣ ኩነታት ስደተኛታት ኤርትራውያን ኣብ ጉዕዞ ስደት ብፍላይ ድማ ኣብ ምድረበዳታት ሰሃራን ሲናይን ዝምልከቱ ተምክሮታት ከምኡ ‘ውን ኩነታት ስደተኛታት ኤርትራውያን ኣብ ዓለም ንምጕላሕ ክካየዱ ብዛዕባ ዘለዎም ዲሎማስያዊ ስርዓት ‘ውን መብርሂታት ተዋሂቦም።