ኣደይ ምሕረት ገብረሚካኤል፣ ኣዲኡ ነቲ ኣብ ምስጢራዊ ማሕዩር ምልካዊ ስርዓት ኢሳይያስ ን ልዕሊ 15 ዓመታት ደሃይ ኣጥፊኡ ዘሎ ሓርበኛ ተጋዳላይ ጴጥሮስ ሰለሙን ኣብ መበል 95 ዓመተን ብቕድሚ ትማሊ ረቡዕ 29 መጋቢት ዓሪፈን። ሎሚ 31 መጋቢት ድማ ኣብ ኣስመራ ሓመድ ኣዳም ለቢሰን።

ዘፍቅራኦ ወደን ተጋዳላይ ጴጥሮስ ኣብ ንእስነቱ ስለ ናጽነት ናብ ገድሊ ኣብ ዝወፈረሉ እዋን ንኣስታት 20 ዓመት ብህይወቱ ደኾን ይኣቱ ኢለን ከብደን ሓቝፈን ዝነበራ ኣደይ ምሕረት፣ ናጽነት ኤርትራ ተረጋጊጹ ብህይወቱ ምስ ተመልሰ፣ ዝተጠልመ መብጽዓታት ቃልሲ ህዝቢ ኤርትራ ክትግበር ሕቶ ስለ ዘቕረበ ጥራይ፣ ምስ ብጾቱ ብምልካዊ ስርዓት ኢሳይያስ ተሓይሩ ንነዊሕ ዓመታት ሃለዋቱ ብምጥፍኡ፣ እተን ወደን ርእየን ክጸግባኦ ኣምላኽ ምሉእ ጸጋ ዕድመ ዝዓደለን ኣደ፣ በቲ ውልቀመላኺ 15 ዓመታት ተሰሪቐን ወደን ከይተፋነዋኦ ካብዛ ዓለም ምስንባተን ዘሕዘን እዩ።

ድምጺ ኣሰና፣ ንኣደ ሓርበኛ ጴጥሮስ ሰለሙን፣ ኣደይ ምሕረት ገብረሚካኤል መንግስተ ሰማይ የዋርሰን እናበለት፣ ንቤተሰብ ጽንዓት ይሃብኩም ትብል።