ኣብ ገድሊ ንናጽነት ብተወፋይነቶምን ጅግንነቶምን ፍሉጣት ዝነበሩ ኣብ ዘበነ ህግደፍ ግን ሃሲሶም ዝጸንሑ ገዳይም ተጋደልቲ ብሪጋደር ጀነራል መብራህቱ ተኽለኣብ (ቫይናክ) ብሪጋደር ጀነራል ኣማኑኤል ሃይለ (ሃንጀማ) ከምኡ ‘ውን ኣቐዲሙ ሓላፊ ናይቲ ብህግደፍ ዝካየድ ቀይሕ ባሕሪ ኮርፖረሽን ዝነበረ ደሱ ተስፋጽየን ኣብ ሓደ ኣጋጣሚ  ብ 20 መጋቢት ከምዝዓረፉ ተፈሊጡ፣ ቲቢ-ኤረ ‘ውን ንሞቶም ኣረጋጊጻቶ።

እታ መጋበርያ ምልኪ ስርዓት ኢሳይያስ ዝኾነት ቲቢ-ኤረ፣ “ኣብ ጽምብል መበል 30 ዓመት ምድምሳስ “ውቃው እዝ” ንምስታፍ ናብ ሰሜናዊ ምብራቕ ሳሕል እናተጓዕዙ ከለዉ ኣብ መንገዲ ባጽዕ ማህሚመት ብሓደጋ መኪና” ከምዝሞቱ ገሊጻ።

ምስኣቶም ሓቢሩ ዝጓዓዝ ዝነበረ ብሪጋደር ጀነራል “ሓሊባይ”፣ ኣብቲ ኣጋጣሚ ብጽኑዕ ቆሲሉ ሕክምናዊ ክንክን ይግበረሉ ከምዘሎ ኸኣ ዘይተረጋገጸ ሓበሬታ የመልክት።

ኣብ ስርዓት ህግደፍ ግቡእ መርመራ ናይ ምክያድ ድሌትን ልምድን ስለዘየሎ፣ ልክዕ ከምቶም ብወቕዒ ልቢ ወይ ከኣ ብሕማም ሞይቶም ተባሂሎም ዝተረስዑ ብዙሓት፣ ኩነታት ኣማውታኦም ብግቡእ ንምፍላጥ ኣጸጋሚ እዩ።

ኩሎም እዞም ዓሪፎም ዘለዉ ገዳይም ተጋደልቲ ኣብ ቃልሲ ንናጽነት ብጅግንነት ዝተዋግኡን ዘዋግኡን ውፉያት ‘ኳ እንተነበሩ፣ ድሕሪ ናጽነት ኣብ ዝነበሩ ዓመታት በቲ መላኺ ኢሳይያስ ብልሙድ ዝጥቀመሉ ሜላ ምድኻም ርእሰተኣማንነት፣ ገሊኦም ብማእሰርቲ ገሊኦም ከኣ ብምድስካል ዝተሃሰዩ እዮም።

ቫይናክ፣ ኣብ ሰብዓታት፣ ኣብ ዘበነ መግዛእቲ ኢትዮጵያ፣ ፈዳይን ኮይኑ ብዘበርከቶ ጅግንነት ህዝቡብነት ዝነበሮ ውፉይ ተቓላሳይ ክኸውን ከሎ፣ ወተሃደራት ኢትዮጵያ ዝነበሩ ኤርትራውያን ብምውዳብ ካብ ቤትማእሰርቲ ሰንበል ልዕሊ ሓደ ሽሕ ናይ ፖለቲካ እሱራት ሓራ ኣብ ምውጻእ  ልዑል እጃም ዝነበሮ፣ ደሓር ‘ውን ኣብ ህዝባዊ ሰራዊት ሓርነት ኤርትራ ሰራዊት መሪሑ ብጅግንነት ዝተዋግአን ዘዋግአን ውፉይ ተጋዳላይ እዩ ነይሩ። ድሕሪ ናጽነት ግን፣ ብኢሳይያስ ካብቲ ተዋሂቡዎ ዝጸንሐ መዓርግ ኣዝዩ ዝተሓተ ስራሕ ተዋሂቡዎ ሃሲሱ እዩ ጸኒሑ።

ሃንጀማ ‘ውን ኣብ ግዜ ገድሊ ንነዊሕ እዋናት ኣብ ሓይልታት ዘገልገለ ምኩርን ውፉይን ‘ኳ እንተነበረ፣ ድሕሪ ናጽነት ማዕረ ተመክሮኡ ከፍርየሉ ኣብ ዝኽእል ቦታ ብዘይምምዳቡ ካብ ናይቶም ዝደስከሉ ዘይፍለ ዘይዕግበት ከምዝነበሮ ይፍለጥ።

ሓላፊ ናይቲ ብህግደፍ ዝካየድ ዝነበረ ኮርፐረሽን ቀይሕ ባሕሪ (09) ዝነበረ ደሱ፣ ፈለማ ናይ ቀረባ ዓርኪ ኢሳይያስ ‘ኳ እንተነበረ፣ ኢሳይያስ ባህ ኣብ ዝበሎ እዋን ብብልሽውና ኣመኽንዩ ንነዊሕ እዋናት ኣብ ማእሰርቲ ስለዝዳጎኖ፣ ስሙ ኣይተመልሰን።

ኣብቲ ጉዕዞ ሓቢሩ ምስኣቶም ዝጓዓዝ ዝነበረ ‘ሞ ብብርቱዕ ቆሲሉ ተባሂሉ ዝውረየሉ ዘሎ፣ ብብልሑን ክእለቱን ካብ ብዙሓት ኣዘዝቲ ሰራዊት ክብ ዝበለ ዓቕሚ ዝነበሮ ሓሊባይ ‘ውን፣ እቲ ንሃገር ምሉእ ኣብ ሓረጣ ኣውዲቑዋ ዘሎ፣ ስልጣኑ ክሳብ ዝሓለዉሉ ንኹሎም ላዕለዎት ኣዘዝቲ ብገንዘብ ክባላሸዉ ዘፍቀደሎም ኢሳይያስ፣ 100 ሽሕ ናቕፋ ሓሪጥካ ብዝብል ምኽንያት ንዓመታት ኣብ ማእሰርቲ ብምብድጓን  ርእሰተኣማንነቱ ከምዝሰበረሉ ይፍለጥ። ጽቡቕ ገይሩ ተምበርኪኹለይ እዩ ኢሉ ኣብ ዝተኣማመነሉ፣ ኣብዚ ቀረባ እዋናት ከኣ ኣብ ቤትሕፈቱ ፈጻሚ ወተሃደራዊ ጉዳያት ገይሩ ኣቀሚጡዎ።

ኣብ ዝሓለፈ ቅነ ንዘጋጠመ ሞት ሜጀር ጀነራል ገረዝጊሄር ዓንደማርያም (ውጩ) ወሲኽካ፣ እዚ ስዒቡ ዘሎ ጃምላዊ ቅዝፈት ናይዞም ኣብ ገድሊ ንናጽነት ብተወፋይነት ዝተቓለሱ፣ ድሕሪ ናጽነት ከኣ ዋላ ኢሳይያስ እናረገጾም ብልኡምነት ዘገልገሉዎ መሳርሒ ምልኪ ዝኾኑ ዜጋታት፣ ነቶም ዛጊት ብህይወት ተሪፎም ዘለዉ ላዕለዎትን ታሕተዎትን ኣዘዝትን ሰበስልጣንን ህግደፍ፣ ሞት ከይምዘይተርፍ፣ እንተኾነ ምስ ብጾቶም ወርቃዊ ንእስነቶም ንዘወፈዩሉ ውጹዕ ህዝቢ ኤርትራ፣ ነቲ ንወለዶ ገድሊ በብሓደ ዘጽርሮ ዘሎ፣ “ብዘይካይ ኩሉ ይጥፋእ” ኢሉ ብምልኪ ዝገዝእ ዘሎ ጨካን ኢሳይያስ ገዲፎምላ ይኸዱ ምህላዎም ተገንዚቦም፣ ሕልናኦም ዘቕስን ንህዝቦም ካብ ጥፍኣት ዘድሕን ሞያ ገዲፎም ክሓልፉ ዘዘኻኽር ተርእዮ እዩ።