ኣብ ዓዲ እንግሊዝ ኣብ ሓወልቲ ሰማእታት ክትሸይን ዝተረኽበት ሓንቲ ጓል 42 ዓመት ሰኽራም እንግሊዛዊት ሰበይቲ ን 7 ኣዋርሕ ማእሰርቲ ከምዝተፈርደት ሜትሮ ዝተባህለ ጋዜጣ ሓቢሩ።

ብመሰረት ‘ቲ ሓበሬታ፣ እታ ሰበይቲ ፈለማ ንዝኽሪ ሰማእታት ኣብ ዝተነብረ ኣኽሊል ዕምባባ ክትሸይን ብፖሊስ ተራእያ፣ ድሕሪ ክልተ ወርሒ ድማ ኣብ መበል 100 ዓመት ዝኽሪ ናይቲ ኣብ ቀዳማይ ኵናት ዓለም ኣብ ‘ሶም’ ዝተኻይደ ውግእ ተመሳሳሊ ጽዩፍ ተግባር እናፈጸመት ብካሜራ ድሕሪ ምስኣላ እያ ተኸሲሳ።

ዋላ ኳ ኣብ ሓወልቲ እናሸነት ዘርኢ ህዝቢ ዘሰንበደ ስእላ ከም ጭብጢ እንተቐረበ፣ ንሳ ነቲ ‘ህዝባዊ ቁጥዐ ዘለዓዕል ጽዩፍ ተግባር ፈጺማ’ ተባሂሉ ዝቐረበላ ክልተ ክስታት ክትነጽጎ ፈቲና።

እቲ ን 7 ኣዋርሕ ክትእሰር ዝወሰነላ ፈራዳይ ኣብቲ መጋብኣያ፣ “ ናይ ኵናት ሓወልትታት ኣብ ማእከል ዓድታትን ከተማታትን ዝትከሉሉ ምኽንያት፣ ንሰባት ምዓልታዊ መዘኻኸሪ ዝተኸፍለ መስዋእቲ ንክኾኖም ተባሂሉ እዩ፣ እንተኾነ ሰባት መስመር ሓሊፎም ክሸኑሎም ከለዉ ኣብያተ ፍርዲ ብዕቱብነት ክርእዩዎ ዘለዎም ከቢድ ገበን እዩ” ኢሉ።

ድሕሪ ‘ቲ ፍርዲ ቃሉ ዝሃበ ሓደ ኣባል ሰራዊት ነበር፣ እቲ ፍርዲ ኣዝዩ ፈዅሱ ክብል ዘይምሕጓሱ ገሊጹ። ይኹን እምበር፣ እቲ ገበን ልሙድ ብዘይምዃኑ ናይ ፍርዲ መምርሒ ስለዘይጸንሖ እቲ ፈራዳይ ከምዝተጻገመ ጠቒሱ። ድሕሪ ሕጂ ፣ ከምዚ ዝኣመሰለ ጽዩፍ ተግባር ብጻዕዳን ጸሊምን ኣብ ናይ ገበን መዛግብቲ ሰፊሩ ግቡእ መቕጻዕቲ ክወሃቦ ጎስጓሶም ከምዝቕጽሉ ድማ ኣገንዚቡ።

እቶም ብዝኾነ ዋጋ ኣቓልቦ ንኽረኽቡ፣ ቅድምን ድሕርን ናጽነት ምእንቲ ሃገር ንዝወደቑ ጀጋኑ ሰማእታት ኤርትራ ብጽዩፍ መልሓስ ከልዕሉዎም ዝስምዑ ሓደ ክልተ ፍጮን መጣቓዕቶምን፣ ውልቃዊ ናጽነት ብህዝባዊ ናጽነት ከምዝግዛእን ደረት ከምዘለዎን፣ ናጽነት ስድነት ማለት ከምዘይኮነ፣ ካብዚ ተማሂሮም፣ ነቲ ኣብ ስደት ዝረኸቡዎ ናጽነት ክከናኸኑዎ ይግባእ።

እንግሊዛውያን መዘከርታ ቅድሚ 100 ዓመት ዝተኻየደ ኵናት ብሓንቲ ሰኽራም ሰበይቲ ምርኻሱ እናቖጠዖም፣ እቲ ልዕልን ትሕትን 25 ዓመታት ጥራይ ዝገበረ ጥሉል መስዋእቲ ኤርትራውያን ብጽዩፍ ቃላት ክለዓል ከሎ ዝፈጥሮ ህዝባዊ ቁጥዐ ከቢድ ምዃኑ ‘ውን ክስወጦም ኣለዎ።

Source: Metro