ኣብ ወተሃደራዊ መደበር ታዕሊም ሳዋ ክስልጥኑ ዝጸንሑ፣ ትማሊ ቀዳም 26 ሓምለ ነናብ ገዝኦም ንዕረፍቲ ክኸዱ ዝተፈቕደሎም ኣባላት መበል 27 ዙርያ፣ ናይ ማትሪክ (መልቀቂ ፈተና) ውጽኢቶም ንምፍላጥ ድሕሪ ወርሒ ናብ ሳዋ ክምለሱ ብሓላፊ መዓስከር ሳዋ ኮለኔል ደበሳይ ግደ ተኣዚዞም ከምዘለዉ ምንጭታት ካብ ኣስመራ ሓቢሮም።

ቀንዲ ምኽንያት ናይ’ዚ ምልካዊ ስርዓት ኢሳይያስ ኣሊሙዎ ዘሎ ውዲት ‘ዚ፣  ነቶም መሕለፊ ውጽኢት ዘይረኸቡ ብኡ ኣቢሉ ኣብ ሳዋ ኣትሪፉ ናብ ዝደለዮ ከዋፍሮም ስለዝደለየ ምዃኑ ወለድን ተማሃሮን ይዛረቡ ከምዘለዉ እቶም ምንጭታት የረድኡ።

ኣብ 24 ዙርያ፣ኣብተማሃሮድሕሪ ዘጋጠመ 2 ነፍሰ ቅትለትን ብዙሕ ናይ ነፍሰቅትለት ፈተነታት ንውጽኢት ማትሪክ ተመሃሮ 25ን 26ንዙርያታት ናብ ቤቶም ምስ ተመልሱ ክንገሩ ከም ዝተገብረ ይዝከር።

ብዘይካ’ዚ ናብ ኮለጃት መሕለፊ ነጥቢ ዘይረከቡ ተመሃሮ 26 ዙርያ ናብ ሳዋ ክምደቡ ኢሎም ድሕሪ ምኻዶም፣  ንመዓልታት  ብኣጋር ድሕሪ ምጉዓዝ ኣብ ኣፍዓበት ንኣዋርሕ ኣብ በረኻ ይኽርትቱ ምህላዎም ይፍለጥ።

እዚ ምልካዊ ስርዓት ኢሳይያስ ኣዳልዩዎ ውጥን፣ ምስቲ ኣብ ዜና ኣሰና ተጠቒሱ ዝነበረ ብኢሳይያስ ካብ ኣዘዝቲ ብርጌድ ንላዕሊ ኣብ ሳዋ ዝተኻየደ፣ ምጽንቃቕ መሳርዕ ሓይልታት ምክልኻል ኤርትራ ዝተኣሳሰረ ቀጥታዊ ግብረመልሲ እዩ።

እዚ ከምዚሉ እንከሎ፣ ንሳዋ ክብገሱ ካብ ዝነበሮም ተመሃሮ 11 ክፍሊ ብዙሓት ተመሃሮ ተሪፎም ይርከቡ።

በቲ ሓበሬታ መሰረት ካብ ኣስመራ ካልኣይ ደረጃ ቤት ትምህርቲ ባርካ ብድሮፕ ኣውት ጥራይ 54 ተማሃሮ ተሪፎም ኣለዉ። ካብ ካልኣይ ደረጃ ቀይሕ ባሕሪ ‘ውን  ልዕሊ 200 ተማሃሮ ከምዝተረፉ ተፈሊጡ ‘ሎ።  እዚ ተርእዮ’ዚ  ኣብ ኩለን ናይ ኣስመራ ቤትትምህርትታት ዘሎ ተርእዮ ምዃኑ ይሕበር።

እቲ ቁጽሪ ብልክዕ ኳ እንተዘይተፈልጠ፣ ሎሚ ዘበን ናብ ሳዋ ዝኸዱ ቁጽሪ ተማሃሮ ካብ 10 ሽሕ ከምዘይበዝሕ ሓበሬታታት ኣሎ።

ሓንቲ ኣደ ምስዚ ጉዳይ’ዚ ብዝተኣሳሰር ካብ ኣስመራ ዝለኣኸቶ ደብዳበ፣-

ሰላም ድምጺ ኣሰና ሓንቲ ነገር ከነካፍለኩም፣ እቶም ቀዳሞት ናይ 26 ዙርያ ኣገልግሎት ወዲኦም ምስ ተመልሱ ውጽኢት ኣብ ኣስመራ እዮም ተነጊሮም። ካልኣይ ተመለሱ ምስ ተባህሉ ዝተመልሰ ተመሊሱ ገለ ከኣ ኣብ ገዝኡ ኮፍ ኢሉ። ሕጂ ግን እዞም መበል 27 ዙርያ ናይ ሓደ ወርሒ ዕረፍቲ ጥራይ ተዋሂቡዎም፣ ድሕሪ ሓደ ወርሒ ናብ ሳዋ ተመሊስኩም ኢኹም ውጺእት ትንገሩ ተባሂሎም፣ መታን ኣብቲ ካልኣይ ጻውዒት ኣብ ገዝኦም ከይተርፉ። ሕጂ ገዛውትና፣ ብሉኡ ደቅና ከይንሰድድ ናይ ውጺኢት ባዕሉ ይፈልጥ፣ ደቅና ይዓብዩና ይብል ኣሎ። ምኽንያቱ፣ እቶም ናይ መብል 26 ዙርያ ካልኣይ ምስ ወሰዱዎም ኣብ በረኻ እዮም ደርብዮሞም ዘለዉ። ኣማኑኤል፣ ብፍላይ ነዞም ኣብ ስደት ደቆም ሓቝፎም፣ ዓድና ጽቡቕ ኣሎ ዝብሉ ኤርትራውያን ዓገብ በሉልና። ፍላይ ከኣ ነተን ቃንዛና ምስቋር ኣብዩወን ዘለዋ ኣዴታት ኣምላኽ መስጣ ደቅና ኣብ ደቀን የርእየን ። እንተ ንህዝቢ ኤርትራ ግን ኣምላኽ ራህዋ ይፍጠረሉ። ኣማኑኤል ሓወይ፣ ኣብ ዓለም ተራእዩ ዘይፈልጥ መዓት እዩ ኣብ ዓድና ወሪዱ ዘሎ። ኣምላኽ ይሓግዘና።

ሓንቲ ወላዲት ካብ ኣስመራ