ኣብ ዝተፈላለያ ሃገራት ኤውሮጳ ዝርከቡ ኤርትራውያን፣ ፓርላማ ሆላንድ ምልካዊ ስርዓት ኢሳይያስ መሓውሩ ናብ ወጻኢ ብምዝርጋሕ ዘካይዶ ዘሎ ዘይሕጋዊ ተግባራት ንምእዳብን ውሕስነትን ኤርትራውያን ስደተኛታት ንምሕላውን ኣብዚ ቀርባ መዓልታት ዘሕለፎም ኣገደስቲ ውሳኔታት ኣብነታውያን ምዃኖም ብምግንዛብ፣ እተን ዝነብሩለን ሃገራት ተመሳሳሊ ስጉምታት ክወስዳ ዝተወሃሃደ ጻዕሪ ከካይዱ ከምዝግባእ ኣተሓሳሲቦም።

ፓርላማ ሆላንድ ነቶም ኣብ ዝሓለፈ እዋን ኣብ ዜናታት ኣሰና ጠቒስናዮም ዝነበርና እማመታት ዳርጋ ንኹሎም ብምጽዳቕ መንግስቲ ‘ታ ሃገር ኣብ ልዕሊ ስዉራትን ቅሉዓት ትካላትን መጋበርያታት ናይቲ ስርዓትን ጭቡጥ ስጉምቲ ክወስድ ድምጹ ብምሃብ እማመታት ኣጽዲቑ ኣሎ።

ብመሰረት እቲ ዝበዝሓና ሓበሬታ ጽማቝ ናይቶም ጸዲቖም ዘለዉ እማመታት ከምዚ ዝስዕብ እዩ።

1 ይ – ኣብ ሆላንድ ዝርከብ ኤምባሲ ስርዓት ህግደፍ ነቲ ስርዓት ዘርብሕ ግብሪ ኣብ ምእካብ ዓቢ ተራ ከምዝጻወት ፍሉጥ ኣብ ርእሲ ምዃኑ ኣብ ኔዘርላንድስ ንዝርከቡ ኤርትራውያን ነቲ 2 ሚእታዊት ግብሪ ክኸፍሉ ስለዝህድድን ዘፈራርሕን፣ ኣምባሳደር ናይቲ ስርዓት ብመንግስቲ ሆላንድ ተጸዊዑ ግብሪ ምእካብን ምስኡ ዝተኣሳሰር ናይ ምፍርራሕ ተግባራትን ደው ከብል መጠንቀቕታ ክወሃቦ፣ ከምኡ እንተዘይገይሩ ግን እቲ እምባሲ ምሉእብምልእ ክዕጾ፣

2ይ – 50 ሚእታዊት ናይቶም ኣብ ሆላንድ ዝነበሩ ኤርትራውያን ስደተኛታት ጽግዕተኛታት መንግስታዊ ደገፍ ብምዃኖም፣ ኤርትራውያን፣ ነቲ ስርዓት 2 ካብ ሚእቲ ክኸፍሉ ከለዉ ብተዘዋዋሪ መንግስቲ ሆላንድ ንናይ ወጻኢ ሓይልታት ግብሪ ይኸፍል ኣሎ ማለት ስለዝኾነ፣ መንግስቲ ሆላንድ ነዚ ዘይግቡእ ክፍሊት ደው ዘብለሉ እማመታት ከውጽእ

3ይ –  ስርዓት ህግደፍ ሓደ ኣብ ዓለም ካብ ዝርከቡ ዝኸፍኡ ምልካውያን ስርዓታት ኮይኑ፣ ኤርትራውያን ብሰንኪ ሕጽረት ቁጠባዊ ምዕባለ ዘይኮነ ብሰንኪ ዓመጽን ግፍዕን ናይቲ ስርዓት ይስደዱ ስለዘለዉ፣ እቲ ብሕብረት ኤውሮጳ ነቲ ስርዓት ክወሃብ ዝተባህለ ናይ 200 ሚልዮን ይሮ ሓገዝ ኣብ ክንዲ ኣብ ኤርትራ ኣብ ጎረባብቲ ሃገራት ተዓቝቦም ንዘለዉ ኤርትራውያን ስደተኛታት ንምሕብሓብ ክውዕል

4ይ – መንግስቲ ሆላንድ ነቲ ኣሸባብ ዝብሃል ናይ ሶማል ዕጡቕ ጉጅለ ኣብ መዝገብ ናይ ኣሸበርቲ ውድባት ክምዝግቦ

5ይ – እቲ ብ መርማሪ ኮምሽን ወድብ ሕቡራት ሃገራት ዝተዘርግሐ ዘሰንብድ ጸብጻብ ‘ውን ከምዘረጋገጾ፣ ኣብ ኤርትራ ገበናት ኣንጻር ሰብኣውነት ይፍጸም ስለዘሎ፣ ነቲ ኩነታት ንምዕራይ ‘ውን ኣብ ኤርትራ ዝተራእየ ገስጋስ ስለዘየለ፣ ባይቶ ውድብ ሕቡራት ሃገራት ኣብ ኤርትራን ንዝፍጸም ዘሎ ገበናት ኣንጻር ሰብኣውነት ደው ንምባል ግቡእ ስጉምታት ክወስድ መታን፣ መንግስቲ ሆላንድ፣ እቲ ጸብጻብ ናይ መርማሪ ኮምሽን  ናብ ባይቶ ጸጥታ ከተሓላለፎ  ክጽዕር

6ይ – እቶም ኣብ ሆላንድ ዝነበሩ ዘለዉ ኤርትራውያን ስደተኛታት እቲ ስርዓትን ደገፍቱን ካብ ዘውርዱሎም ጸቕጢ ምክልኻል ክግበረሎም ስለዝግባእ፣ መንግስቲ ሆላንድ፣ ኣብ ኔዘርላንድስ ዝርከቡ ምስቲ ስርዓት ኣብ ዝተኣሳሰሩ ከም ኩርኩር ህግደፍ YPFDJ ዝኣመሰሉ ውድባት ዝርከቡ ውድባት ብንጥፈት ዝዋስኡ ሕጹያት ኣብ ዝህልዉሉ ግዜ ከምቲ ናይ COA-volunteers ጽጹይ መጽናዕትን ምጽራይን ከካይደሎም

7ይ – እቲ ኣብ ዘ ሄግ ዝርከብ ኤምባሲ ህግደፍ ኣብቲ ናይ ታህዲድን ምፍርራሕን ገንዘባዊ ምዝመዛን ዕማም ናይቲ ስርዓት መሳርሒ ምዃኑ ትዕዝብቲ ስለዘሎ፣ መንግስቲ ሆላንድ እቲ ኤምባሲ ኣብ ከምዚ ዝኣመሰለ ገበናዊ ንጥፈታት ዘለዎ ተሳታፍነት ወግዓዊ መርመራ ከካይደሉ

8ይ – ብውድብ ሕቡራት ሃገራት ከምዝተረጋገጸ እቲ ኣብ ኤርትራ ዘሎ ስርዓት ገበናት ኣንጻር ሰብኣውነት ኣብ ልዕሊ ምፍጻሙ ከም ኣሸባብ ምስ ዝኣመሰሉ ኣሸበርቲ ውድባት ስለዝተሓባበር እቲ ናይ ዲያስፖራ ግብሪ ድማ ኣብ ምወላ ናይ ከምዚ ዝኣመሰለ ሽበራዊ ንጥፈታት ስለዝውዕል እቲ ናይ ዲያስፖራ ግብሪ ኣብ ሆላንድ ከምዘይሕጋዊ ተግባር ደው ዝብለሉ መንገዲ ንምንዳይ መርመራ ከካይድ ካብ ኣማኸርቲ ኣህጉራዊ ሕጊ ምኽሪ ክውከስ

9ይ – መንግስቲ ሆላንድ ብዛዕባ ‘ቶም ኣብ ሆላንድ ዝርከቡ ወከልቲ ናይቲ ስርዓት ዝርዝራዊ ሓበሬታ ኣኪቡ ንፓርላማ ከፍልጥ

10ይ – መንግስቲ ሆላንድ ኣብ ሕብረት ኤውሮጳ ሓላፍነት ንዘለዎ ኮምሽነር ነቲ ንስርዓት ህግደፍ ክወሃብ ተወሲኑ ዘሎ ሚልዮናት ይሮ ኣደስኪሉ፣ ኣብ ክንድኡ ን ላዕለዋይ ኮምሽነር ስደተኛታት ውድብ ሕቡራት ሃገራት ከምኡ ‘ውን ዘይመንግስታውያን ማሕበራት ከምዝውዕል ክገብሮ ክሓትት ዝብሉ እዮም ።

ኣብ ካናዳ ዝርከቡ ግዱሳት ኤርትራውያን ማሕበራትን ውልቀሰባትን ቅድሚ ሓያለ እዋን ኣድላዪ ጎስጓስን ጻዕርን ብምክያድ፣ ነቲ ምልካዊ ስርዓት ኢሳይያስ ኣብታ ሃገር ዝእክቦ ዝነበረ ክልተ ካብ ሚእቲ ከም ዘይሕጋዊ ተግባር ከምዝኹነን ብምግባር፣ ንወኪል ናይቲ ስርዓት ናብ ኤርትራ ከምዝጥረዝ ገይሮሞ እዮም።