ኣማኑኤል ተስፋስላሰ ዝተባህለ፣ ኣብ ኣዲስ ኣበባ ዩኒቨርሲቲ (ኣራት ኪሎ) ናይ ስነ ቁጽሪ (Applied Mathematics) ትምህርቱ ተኸታቲሉ ዝለዓለ ነጥቢ ዝረኸበ ብልሂ ኤርትራዊ ተማሃራይ ስደተኛ፣ ካብ ኩሎም ተማሃሮ ዝለዓለ ውጽኢት ረኺቡ ክንሱ፣ ኣብ እዋን መመረቕታ ንዕኡ ዝግባእ ናይ ወርቂ ሽልማት ካብ ናቱ ዝተሓተ ነጥቢ ዝነበራ ኢትዮጵያዊት ተማሃሪት፣ ካብ ኢድ ቀዳማይ ሚኒስተር ኢትዮጵያ ኣቶ ሃይለማርያም ደሳለኝ ከምዝተሸለመቶ ምንጭታት ሓቢሮም።

ናይ ተማሃራይ ኣማኑኤል ተስፋስላሰ GPA 3.94 ክኸውን ከሎ ናይታ ትሕቲኡ ዝነበረት ተማሃሪት GPA 3.91 እዩ ነይሩ። ይኹን እምበር፣ ኣማኑኤል ብሰንኪ ዜግነቱን ስደተኛ ብምዃኑን ሽልማት ከምዝተነፍጎ እቶም ምንጭታት ኣረዲኦም።

ተማሃራይ ኣማኑኤል፣ ቅድሚ እቲ ወግዓዊ መመረቕታ ብመሰረት ዘመዝገቦ ልዑል GPA ኣብ ኣራት ኪሎ ቀዳማይ ምዃኑ ተነጊሩዎ ኣፈናዊ ሽልማት ‘ውን ተዋሂቡዎ ክንሱ ኣብቲ ኣብ ሚልየነም ኣዳራሽ ዝተገብረ ሃገራዊ ስነስርዓት መመረቕታ ግን ድሕሪኡ ዝነበረት ኢትዮጵያዊት እቲ ወርቃዊ ሽልማት ተዋሂቡዋ።

ቅድሚ ሕጂ ኣብ እስራኤል ኣብ ቅድድም ጉያ ብተደጋጋሚ ግዜ ቀዳመይቲ እትወጽእ ዝነበረት ኤርትራዊት ትሕቲ ዕድመ ተማሃሪት ኣትለት ራሄል ገብረጻድቕ ‘ውን ስደተኛ ብምዃና ጥራይ ኣብ ክንድኣ ብድሕርኣ ዝኣተዉ እስራኤላውያን ቆልዑ ይሽለሙ ከምዝነበሩ ይዝከር። እዚ ኸኣ፣ ዕዳ ስደት ክሳብ ክንደይ ከቢድ ምዃኑ ዘጕልሕ ተወሳኺ መርኣያ እዩ። ቀዳማይ ኣብ ሃገሩ ቀዳማይ ከምዝኸውን፣ ኣብ ስደት ክብረት ከምዘይርከብ ተገንዚብና ኸኣ ሃገርና ከነምልስ ክንሰርሕን ክንቃለስን ይግባእ።