ኣብ ሽወደንን ዝርከቡ ኤርትራውያን፡ ካብ ነርወይን ካልኦት ሃገራት ስካንዲነቭያን ንሰዓታት ተጓዒዞም ናብ ስቶክሆልም ምስ ዝመጹ ሓያለ ኤርትርውያን ደለይቲ ለውጢ ተሓባቢሮም፡ ማዕከናት ዜና ሽወደን ምእንቲ ናጽነት ፕረስን ዲሞክራስን ኣብ ኤርትራ ንዘካይዳኦ ቀጻሊ ጎስጓሳት ዝድግፍ፡ ንዲክታተርያዊ ስርዓት ህግደፍ ዝዅንን፡ ውዕዉዕ ሰላምዊ ሰልፊ ኣካይዶም።
እቲ ሎሚ 7 ጥቅምቲ ድሕሪ ቀትሪ ዝተኻየደ ሰላማዊ ሰልፊ፡ ነቲ ደገፍቲ ህግደፍ ንማዕከናት ዜና ሽወደን ብምጽራር ኣብ ስቶክሆልም ከካይዱዎ ንዝወዓሉ ሰልፊ ንምቅዋም ዝተዳለወ እዩ።
ደገፍቲ ስርዓት ህግደፍ፡ ካብ ኤርትራውያን ደለይቲ ለውጢ ተቓውሞ ከየጋጥሞም መታን፡ ነቲ ቦታ ብምስጢር ሒዞሞ ኳ እንተቐነዩ፡ እቶም ደለይቲ ለውጢ ኣብ ሓጺር ግዜ ተወዳዲቦም ምዕሩግ ሰላማዊ ሰልፊ ብምክያድ ኤርትራውያን ምስ ህዝብን መንግስትን ማዕከናት ዜናን ሽወደን ዘለዎም ምሕዝነት ከምዘረጋገጹ ምስ ኣሰና ዝተዘራረቡ ተሳተፍቲ ሓቢሮም።
እቶም ኣብ ዲሞክራስን ነጻነት ፕረስን ዝኣምኑ ግዱሳት ኤርትራውያን ደለይቲ ለውጢ በቲ ዝዘንብ ዝነበረ ብርቱዕ ማይ ከይተሰናኸሉ ዘስምዑዎ ድምጺ፡ ኣቓልቦ ህዝብን ጋዜጠኛታትን ሽወደን ከምዝሰሓበ ‘ውን ኣገንዚቦም።
ሓንቲ ሽወድናዊት ጋዜጠኛ ኣብቲ ኣጋጣሚ ንኣሰና ኣብ ዝሃበቶ ሓበሬታ፡ “እቶም ዲሞክራስያዊ መሰሎም ብምጥቃሞም ንጋዜጠኛታት ሽወደን ዝነቕፉ ዘለዉ ኤርትራውያን ስደተኛታት፡ መንግስትና ጽቡቕ እዩ ዝገብር ዘሎ ዝብሉ እንተኾይኖም፡ ዓዶም ካብ ምኻድ ዝክልክሎም ነገር ደኣ እንታይ እዩ” ብምባል ከምዝደንጸዋ ገሊጻ።
ንሃዋህውን ኣካይዳን ናይቲ ሰላማዊ ሰልፊ ብሰፊሑ ንምክትታል ድምጺ ኣሰና ስምዑ