ኣብ ርያድ፣ ስዑዲ ዓረብ ዝርከብ ኤምባሲ ምልካዊ ስርዓት ኢሳይያስ ሬሳ ናይ ዝዓረፉ ኤርትራውያን ናብ ሃገር ኣብ ዝምለሰሉ ግዜ፣ ከም ስደተኛታት መጠን ዝምድናን ዓድን ብዘየገድስ ሬሳ ናይቶም ኣብቲ ሃገር ክቕበሩ ዘይክእሉ ዜጋታት ናብ ኤርትራ ኣብ ምስዳድ ንዝተሓባበሩ ወይ ዘመልክቱ ዜጋታት ክልተ ካብ ሚእቲ ክኸፍሉ የገድዶም ከምዘሎ ምንጭታት ኣሰና ካብ ሪያድ ሓቢሮም።

እቶም በቲ ጸያፍ ተግባር ናይቲ ገንዘብ ዝሃይማኖቱ ስርዓት ዘስካሕክሑ ዜጋታት፣ ኣብ ስዑዲ ኣብ ስደት ዝርከቡ ኤርትራውያን ከምዚ ዝኣመሰለ ሓደጋ ሞት ከጋጥም ከሎ ብዓይኒ ድንጋጸን ሕውነትን ርእዮም ገንዘቦምን ጉልበቶምን ብምውፋይ ንኡድ ምትሕብባር ከምዘርእዩ ብምጥቃስ፣ እቲ ፍቕርን ምትሕግጋዝን ኤርትራውያን ዘይወሓጠሉ እኩይ ስርዓት ግን፣ በዚ ንሬሳ ክልተ ካብ ሚእቲ ከም ምቕራጽ ዝቝጸር ጽዩፍ ተግባር ነቲ ኒሕን ምትሕልላይን ኤርትራውያን ዘርኢ ክተባባዕ ዝግብኦ ኤርትራዊ ክብሪ ይጻብኦ ምህላዉ ብቝጥዐ ኣረዲኦም።

ሓንቲ ካብቶም ቀንዲ ናይ ከምዚ ዝኣመሰለ እኩይ ፖሊሲ መጋበርያ፣ ኣብ ርያድ ከም ቆንስል ናይቲ ስርዓት ኮይና ንኣስታት 10 ዓመታት ዝተመደበት ብዓልቲ ቤቱ ነቲ ዋና መሳሰዪ ውልቀመላኺ ዝኾነ የማነ ማንኪ፣ ወይኒ ገረዝጊሄር ክትከውን ከላ፣ ጭካኒኣ ደረት ተሳኢኑዎ ከምዘሎ እቶም ምንጭታት ይጠቕሱ። ኣብቲ ሃገር ዝመደቡ ቆንስላት ቀቀልጢፎም ዝቕየሩ ክንሶም፣ ንሳ ከም ቀዋሚት ቆንስል ንኽንድዚ ዓመታት ኣብታ ሃገር ምምዳባ፣ ኣብ ልዕሊ ‘ቲ ርህራሀ ዘይብሉ ጨካን ኣተሓሕዛኣ፣ ብዓልቲ ቤቱ ነቲ ፖለቲካዊ መሳርሒ ውልቀመላኺ ዝኾነ ላዕለዋይ ብዓል ስልጣን ብምዃና ከም ሓለፋ ዝተዋህባ ስልጣን ምዃኑ ህዝቢ ብቐጻሊ ከምዘዕዘምዝም ‘ውን ኣገንዚቦም።

ብዘይካ ‘ዚ ልዕሊ 600 ካብ ኣዚለ ክሳብ 9ይ ክፍሊ ክመሃሩ ዝግብኦም ተማሃሮ፣ ስድራቤቶም ወረቐት ስለዘይብሎም ብተጻብኦ ኢምባሲ ምልካዊ ስርዓት ኢሳይያስን ዝተሓባበሮም ዘሎ ሚኒስተር ትምህርቲ ስዑድን ካብ ትምህርቲ በዅሮም ገዛ ይውዕሉ ከምዘለዉ እቶም ምንጭታት ብተወሳኺ ሓቢሮም።

ከም ንቡር ኤምባሲታት ካልኦት ሃገራት ማዕረማዕረ ዲፕሎማስያዊ ተልእኾኦም ዜጋታት ሃገሮም ንምሕብሓብ ዝዋፈሩ ኳ እንተኾኑ፣ እቲ ሓደን ናይ መወዳእታን ዕማም ኤምባሲታት ውልቀምልካዊ ስርዓት ኢሳይያስ ግን ንኤርትራውያን ምስላይን ምጭናቕን እዩ።