ኣብ መፋርቕ ወርሒ ጉንቦት ኣብ እንዱርማን (ካርቱም) ተኣኻኺቦም ብመሰጋገርቲ ተመሪሖም ናብ ሊብያ ካብ ዝጓዓዙ ዝነበሩ ዛጊት ልክዕ ቁጽሮም ዘይተፈልጠ ኤርትራውያን፣ ኣብ ምድረበዳ ሰሃራ ብማይ ጽምእን ጥምየትን ከምዝሞቱ ካብቲ ኩነታት ዝደሓኑ ናይ ዓይኒ መሰኻኽር ሓቢሮም።

እቶም ተጻውሮ ዘይንበሮም ትሕቲ ዕድመ ምዃኖም ዝእመነሎም ግዳያት፣ ካብቶም ካብ ሱዳን ሒዞሞም ዝመጹ መሰጋገርቲ ናብ ሊብያውያን ምስ ተረከቡ፣ እቶም ሊብያውያን ብመስተን ሓሽሽን ሃለዋቶም ኣጥፊኦም ኣለይመለይ ክብሉዎም ስለዘይከኣሉ ብሸለልትነት ከምዝጠፍኡ እቲ ሓበሬታ የረድእ።

ዋላ ኳ ኣብ እዋኑ ቀጻሊ ሓበሬታ እንተዘይተረኽበ፣ ኣብ ምድረበዳ ሰሃራ ብዙሓት ኤርትራውያን፣ ብድኻምን ጽምእን ከምኡ ‘ውን ሸለልትነትን ዓመጽን መሰጋገርቲ ብቐጻሊ ኣካላዊ ጉዳኣትን ሞትን ይወርዶም ከምዘሎ ደንግዮም ዝበጽሑና ሓበሬታታት የመልክቱ።