ይዝከረኒ ብ2000 ዓ.ም. G13 ሓደ ደብዳቤ ናብ ኣቶ ኢሳያስ ኣብ ዝጻሓፈሉ ግዜ፡ “መሰረታዊ-ለውጢ ወይስ ጽገና” (Fundamental Or Cosmetic Change) ዝብል ሓደ ዓንቀጽ ብእንግሊዝኛ ጺሒፈ ነይረ። ኣብቲ ግዜ’ቲ ከማሓላልፎ ዝደለኹ መልእኽቲ፡ “ናብ ኣቶ ኢሳያስ ደብዳቤ ብምጽሓፍ ኣብ ኤርትራ መሰረታዊ- ለውጢ ኣይርከብን” ክብል ስለ ዝደለኹ ኢዩ ነይሩ። ከምቲ ዝበልኩዎ ድማ ኣሽንኳይዶ ለውጢ ክርከብስ፡ ነቶም ደብዳቤ ሒዞም ዝኸዱ ኤርትራውያን ምሁራት እኳ ብግቡእ ከዘራርቦም ኣይከኣለን።

እዚ ናይ መሰረታዊ-ለውጥን ጽገናን ሕቶ ንህዝቢ ኤርትራ ናይ ሞትን ሂወትን ሕቶ ኢዩ። ህዝቢ ኤርትራ ን30 ዓመታት ተቓሊሱ፡ሓፍ ዘይብል መስዋእቲ ከፊሉ፡ እዚ ኣብ ሃገርና ዘሎ ስርዓት ኣፍርዩ። ኣይኮነን ንዓና ንኤርትራውያንስ፡ ንሕብርተሰብ-ዓለም ዘስደመመ ስርዓት ኢዩ። እዚ ምሒር ጨካን፡ ህዝቢ ዘጥፍእ ዘሎ ስርዓት ብመሰረቱ ኣብዚ ምዕቡል ግዜ’ዚ ክፍጠር ዘይግብኦ ኢዩ።

እሞ ሕጅ’ውን ከም ብሓድሽ ሀ-ኢልና ቃልሲ ጀሚርና። እኖሆለይ ዛጊድ ን22 ዓመታት መሪር ቃልሲ ነሕልፍ ኣሎና። ምስኪን ህዝቢ ሕጅ’ውን ሓፍ ዘይብል መስዋእቲ ይኸፍል ኣሎ። ንዓይ ካብ ስርዓት ህግደፍ ክሃድም(ክትሃድም) ኣብ ሲናይ ምድረ-በዳ ብበደዊን ኰላሊቱ(ታ) ዝሰኣነ(ት) ኤርትረዊ(ት) መስዋእቲ ኢዩ። ካብ ማእሰርትን መግረፍትን ስርዓት ኢሳያስ ክሃደሙ በማኢታት ኣብ ፎቖዶ ባሕርታት ዝጣሓሉ ዕሸል መንእሰያት ከቢድ መስዋእቲ ኢዩ። ተቓዊምካ ወይ ተዛሪብካ ተባሂሉ(ተባሂላ) ኣብ ዒራ-ዒሮ ቤት-ማእሰርቲ ዝምወት(ትመውት) ዘሎ(ላ) ኤርትራዊ(ት) መስዋእቲ ኢዩ። ከምኡ’ውን ኣይንረስዕ፡ ካብ ብረታዊ ቃልሲ ኣትሒዞም ይሕመቕ ይጸብቕ፡ ይሓይል ይድከም ኣብ ቅደመ ግንባር ዝስውኡ ዘለው ተጋደልቲ’ውን መስዋእቲ ኢዩ። ስለ’ዚ ሕጅ’ውን ከም ናይ ትማሊ ሓደ ዲክታተራዊ ዘይኮነ፡ ሓደ ፍትሓውን ዲሞክራስያውን ስርዓት ክትከል ስለ ዘለዎ ኢዩ። ሓቂ ክንዛረብ እንዀይኑ፡ ብረታዊ ቃልሲ ህዝቢ ኤርትራ ሓደ ባዕዳዊ መራሒ ዝነበረ ወጺኡ፡ ብሓደ ሃገራዊ ግን ከኣ ህልም ዘበለ ጸረ-ህዝቢ ዝኾነ ዲክታተራዊ መራሒ ኢዩ ተተኪኡ። ሓንቲ ባዕዳዊት ዝነበረት ባንደራ ድማ ብሓንቲ ሃገራዊት ባንደራ ተተኪኣ። ካሊእ ከም ስርዓት መጠን ህዝቢ ብሰላም ዝነብረሉ፡ ናብርኡ ዝማሓየሸሉ ስርዓት ከም ዘይኰነ፡ ሎምስ ልብም ዝበሉ ደገፍቲ እቲ ስርዓት እውን ከይተረፉ ዘይኽሕድዎ ኢዩ። ሓቂ ክንዛረብ እንተ ኾይኑ፡ ስርዓት ህግደፍ  ኣስመራ ምስኣተወ  ሓሙሽተ ዓመት ከይመልኤ ደኸ’ኮነን ህዝቢ ኣስመራ “ደርግ ይሓይሽና” ዝበሎም።

ክቡራት ኣንበብቲ! ስለምንታይ ኢየ ድኣ ሎሚ’ኸ ደጊመ ብዛዕባ መሰረታዊ-ለውጥን ጽገናን ክጽሕፍ ሃቂነ? እዚ በጺሕናዮ ዘሎና መድረኽ ኣዝዩ ተኣፋፊ ኢዩ። ዳርጋ ሃገርና ሎሚ ኣብ ሓደ ቀራና መንገዲ በጺሓ ክበሃል ይከኣል። እቲ ወድዓዊ ኩነታት ኣዝዩ በሲሉ፡ እቲ በዓል-በታዊ ኩነታት ድማ ኣዝዩ ድሒሩ ይርከብ። ኣብ ውሽጥን ኣብ ደገን ዘሎ ህዝብና ጭቆና መሪርዎ፡ ኣንጻር ስርዓት ህግደፍ በቢዘለዎ ክልዓዓል ይረኤ።መንእሰያትና ኣብ ሙሉእ ኩርናዓት ናይ ዓለም ባዕሎም ንለውጢ ክልዓዓሉ ክትርኢ ኣዝዩ ተስፋ ዝህብ መድረኽ ኢዩ። እንተ ኾነ ግን እዚ ህዝባዊ ምልዕዓል’ዚ ብግቡእ ክትሓዝን ክእለን ኣለዎ ይመስለኒ።

መስከረም-ነት እውን ከም ልማዱ ሓደ ብዛዕባ መሰረታዊ-ለውጥን ጽገናን ዝምልከት ሓደ ዘሕፍር ገለ ክልተ መስመራት ጺሒፉ። ምዃን’ኳ ሎምስ ዝኾነ ተቓዋሚ ኤርትራዊ እዚ ሰብ’ዚ ሓደ መሳርሒ ናይ ህግደፍ ምዃኑ ፈሊጥዎ ኢዩ። ንኾነ ግን ከምዚ ዘስዕብ ፎርሙላ ኢዩ ኣቐሚጡ፤

“መሰረታዊ ለውጢ = ብናይ ግዳም ኢድ-ኣእታውነት፡ ኣብ ታንክታት ወያኔ ተወጢሕካ ክመጽእ ዝደለ ዘሎ ለውጢ
ጽገና= ደገፍቲ መንግስቲ ኤርትራን ህግደፋውያን ኣሕዋትናን ኣሕትናን ዝረዓሙዎ፡ ንኹሉ ዘሳተፈ፡ ካብ ውሽጢ ሃገር ዝብገስ ሰላማውን ህዱእን ቁዋማዊ ለውጢ”

ብርግጽ ንውዲ ጀነራል ጎትኦምን ደገፍቲ ስርዓት ህግደፍን ሓቶ መሰረታዊ-ለውጥን ጽገናን ኣገዳሲ ኣይኮነን። እንተ ተኻኢሉስ ብዘይ ጽገና’ውን ስርዓት ህግደፍ ከም-ዘለዎ ክቕጽል ኢዮም ዝደልዩዎ። ስለዚ በረኣእያን ሕልናን እዚ ሰብ’ዚ ካብ “ብኢትዮጵያ ከም ጎረበት ሃገር ተሓጊዘካ መሰረታዊ-ለውጢ፡ ጽገና ይሓሽ” ኢዩ ዝብለና ዘሎ። ንህዝቢ ኤርትራ ግን ከምቲ ኣቐድም ኣቢለ ዝጠቐስኩዎ ሕቶ መሰረታዊ-ለውጥን ጽገናን ናይ ህወትን ሞትን ጉዳይ ኢዩ።

ናይ መስከረም-ነትን ስርዓት ህግደፍን ስዓብቱን ኣይምገረመናን። እቲ ዘገርም ንስርዓት ህግደፍ ዝቓወሙ ተቓወምቲ ባእታታት ጽሑፋቶም ኣብዚ ወብ-ሳይተ’ዚ ምስቃሎም ኢዩ። እዚ ወብ-ሳይት’ዚ ኮ ድኽመትን ዕንወትን ጠቕላላ ተቓወምቲ ውድባትን ስልፍታታትን ኤርትራ  ዝምነ፡ ካብ ምሕዝነት ጀሚርካ ስጋብ ሃገራዊ ባይቶ ንድሞክራስያዊ ለውጢ ዝተገብረን ዝግበርን ጉባኤታት ድኽመትን ፍሽለትን ዝመነ መሳርሒ ስርዓት ህግደፍ ዝኾነ ኢንተርነት መርበብ ኢዩ። በንጻሩ ድማ ናይ ስርዓት ህግደፍ ጽቡቚነት ሃሰስ(እንተ ኾነ ድኣ እናሳኣነ’ምበር) እና በለ ከይደቀሰ ዝሓድር ሰብ ኢዩ።

ኣብ ቦሎኛ ዝተኻየደ ጉባኤ’ውን ሪኢናዮን ሰሚዕናዮን። ካብ 90 ዘይበዝሕ ህዝቢ ዝተኻፈሎ። እዚ ከረድኣካ ዝኽእል ንህዝቢ ዝጠቅም ፖለቲካዊ መደብ ስለ ዘይብሉ፡ ህዝቢ ክድግፎ ኣይካኣለን። ኣብ መጨረሻ ከኣ ፈሺሉ ክበሃል ይከኣል። ናይ መደበር መስከረም  ይኹን ናይ ቦለኛ ተሳተፍቲ ሓንቲ ናይ ሓባር ዓላማ ኣላቶም።ንሳ ድማ “ኣብ ኢትዮጵያ  ኮይኖም ንስርዓት ህግደፍ ዝቃለሱ ኣትሪርካ ምቅዋም”  እትብል ኢያ። እዚኣ ድማ ንገዛእ-ርእሳ ፖለቲካ ኣይኮነትን። እንታይ ድኣ ናይ ህግደፍ “ንተቓወምቲ እተዳኽም ተባሂላ ዝተማህዘት” ፕሮፖጋንዳ ኢያ። እዛ ዝኣረገት ፕሮፖጋንዳ ሒዞም ኢዮም ብተቓወምቲ ኣብ ኢትዮጵያ ዝግበር ጉድለታት ሃሰስ ክብሉ ዝውዕሉን ዝሓድሩን ዘለው።

ብመሰረቱ ስርዓት ህግደፍ ምስ ኢትዮጵያ ኣብ ግጭት ክኣቱ ዝገበሮ፡ ጉዳይ ዶብ ኣይኮነ ገለ ኣይኮነ። ኣብ ቁጠባ ዝተመስረተ ምስሕሓብ ኢዩ። ድሕሪ ዅናት ግን ስርዓት ህግደፍ ዘስግኦ ብኢትዮጵያ ዝድገፉ ኤርትራውያን ተቓወምቲ ሓይልታት ኢዮም። እዛ ነጥቢ እዚኣ ብቐላል ትረኤ ኣይኮነትን። ስርዓት ህግደፍ ነዛ መስኮት እዚኣ ክዓጹ ዘይፍንቅሎ እምኒ የለን። ኩላትና ከም እንፈልጦ ኣብ ሱዳን ኣዒጽይዋ ኢዩ። ነዛ ተሪፋ ዘላ መስኮት ንምዕጻው ኢዩ’ምበኣር ስርዓት ህግደፍ ብተዘዋዋሪ በዞም ጉጅለታትን ባእታታትን ዝቃለስ ዘሎ። እዛ ሓንቲ መቃወሚት ባይታ ምስ ተዓጽወት ድማ ናብ ስርዓት ህግደፍ ኢድካ መሃብ ማለት ኢዩ። ኣብ ኤውሮጳ ወይ ኣሜሪካ ኮይና ድና ክንቃለስ?እወ! ልክዕ ኢዩ። “ሕጅ’ኸ ተቓወምትና እንታይ ኣፈሪዮም?” ዝብል ሕቶ ከም ዝሕተት ብሩህ ኢዩ። ግቡእ ኢዩ ድማ። እዚ ነጥብ’ዚ ጸኒሐ ክመለሶ ኢየ።

እንደገና፡ እዞም ጉጅለታትን ባእታታትን እዚኣቶም  ንኢትዮጵያ ከም ሓንቲ ጸላኢት ሃገር ይሪእዋ። እስከ ነዚ ሕቶ’ዚ ብስምዒት ከይትዓብለልና ብሳይንሳዊ መንገዲ ማለት ብስነመጎት ንርኣዮ። መጀመርያ ኢትዮጵያ ክብሉ ከለው ነየነይቲ ኢትዮጵያ ኢዮም? ነታ ብዘበነ ሃጸይ ሃይለስላሴን ደርግን ዝነበረት ኢትዮጵያ ድዮም ወይስ  ነታ ናይ ሎሚ  ናይ ዘበነ ኢህኣደግ ኢትዮጵያ? ብርግጽ እታ ብግዜ ሃይለስላሴን ደርግን ዝነበረት ኢትዮጵያ፡ እቶም መንግስታት ጸላእቲ ህዝቢ ኤርትራ ነይሮም። እቲ ህዝቢ ግን ከም ህዝቢ መጠን ጸላእቲ ህዝቢ ኤርትራ ኣይነበሩን። እዚ ሕጂ ዘሎ መንግስቲ ይኹን ህዝቢ ግን ፈታዊ ህዝቢ ኤርትራ’ምበር ጸላኢ ኣይ ኮነን። ቅድም-ቅድም እዞም ሎሚ መንግስቲ ኣቚሞም ዘለው ሰልፍታት ዳርጋ መብዛሕትኦም ኣብ ግዜ ቃልሲ ከለው ንመሰል ህዝቢ ኤርትራ ዝደገፉ ኢዮም። ብፍላይ ህዝባዊ ግንባር ምስ  ህዝባዊ ወያኔ ሓርነት ትግራይ ምሕዘነት ፈጢሮም ብሓንሳብ ተሓጋጊዞም ንደርግ ኣወዲቖምዎ ኢዮም። ድሕሪ ናጽነት’ውን፡ እዚ ሕጂ ዘሎ መንግስቲ ንኤርትራ ቀዳማይ ከም ሃገር ዝኣመነላ መንግስቲ ኢዩ። በቲ ፍትሓዊ ኣረኣእያኡ ኣብ ህዝቢ ኤርትራ ምኽንያት ድማ ብገለ ተቓወምቲ ሓይልታት ኢትዮጵያ ብዙሕ ሽግራት ኣጋጢምዎን የጋጥሞ ኣሎን። ኰይኑ ግን  ኣብ መንጎ ክልቲኡ ሃገራት እቲ ዘይቅዱስ ኵናት ኣጋጢሙ። እቲ ኵናት ከመይን መን ከም ዝጀመሮን ኩላትና ንፈልጦ ኢና። ምትንታኑ ኣየድልን። ድሕሪ ኵናት እውን ሓቂ ክንዛርብ እንተ ኮይኑ፡ እዚ መንግስቲ’ዚ ኣብ ልዕሊ ህዝቢ ኤርትራ ዘለዎ ኣረኣእያ ኣይተቐየረን። ብዘይ ገለ ገደብ ስደተኛታትና ሓንጎፋይ ኢሉ ይቕበል ኣሎ። ንብዙሓት መንእሰያትና ኣብ ሃገሮም ዘይረኸብዎ ናይ ትምህርቲ ዕድል ይህብ ኣሎ። እሞ ሰማዝሃገርኩም ከመይ ገርና ኢና ነዚ ከምዚ ዝኣመሰለ መንግሰቲ “ጸላኢ” እንብሎ? ስርዓት ህግደፍ ስለ ዝጸልዎ ንጽላኣዮ እንተ ኮየኑ ካሊእ ነገር ኢዩ። እምበኣረይ ህዝቢ ዝኣስርን ዝቐትልን ዘስድድን ዘሎ ጸላኢ ህዝቢ ኤርትራ ስርዓት ህግደፍ ኢዩ። ገለና’ውን መንግሰቲ ኢትዮጵያ ዶብ ንኽሕንጸጽ ፈቓደኛ ዘይምኻኑ ንወቕሶ። ልክዕ ኢዩ፡ ዶብ ምሕንጻጽ ኩላትና ኢና እንደልዮ። እሞ እንተዘይ ኮነ’ኸ? ንዓይ ዶብ ምሕንጻጽ ቀዳመነት ኣይኮነን። ቀዳምነት ንዓይ ህዝቢ ዘህልቕ ዘሎ ስርዓት ምእላይ ኢዩ። ዶብ ዊዒሉ ሓዲሩ ምሕንጻጹ ኣይተርፎን። ኣብ ዝኸዶ የብሉን። ህዝቢ ምስ በረሰ ግን ኣይርከብን። እኳ ድኣ ኣብ ኤርትራ ሓደ ፍትሓውን ዲሞክራስያውን ስርዓት ምስ ተተኽለ ዶብ ንምሕንጻጽ ቀሊል ይኸውን። ኢትዮጵያ’ውን ኣብ ምትግባሩ ሰጋእ እትብል ኣይመስለንን። ኣብ ዓለምና ብዙሓት ጎረባብቲ ሃገራት ናይ ዶብ ግጭት ኣናሃለን ንብዙሕ ዓመታት በሰላም ዝነበራን ዝነበራን ኣለዋ። ከም ሓድ-ሕድ ጸላእቲ ግን ኣይረኣኣያን። በዚ ኮይኑ በቲ ግን ኣብ ኤርትራ ዶብ ብምሕነጻጽ ስርዓት ህግደፍ ክእለ ኣይኽእልን። ኣይሕግዝን ከኣ።

ካሊእ፡ ካብ ተቓወምቲ ደምበ’ውን ኣብ ልዕሊ ኢትዮጵያ ዝወርድ ወቐሳ ኣሎ። ንሱ ድማ ገለና “መንግሰቲ ኢትዮጵያ እተወፍዮ ዘላ ሓገዝ፡ ከምቲ ስርዓት ህገደፍ ንተቓወምቲ ሓይልታት ኢትዮጵያ እትሕግዞ  ኣድማዒ ኣይኮነን። ዘየስርር ዘየምውት ኢዩ” ንብል። ገለና ድማ “ኢትዮጵያ ካብ ሓገዝ ሓሊፋስ ኣብ ጉዳይና ኢድ ተእቱ ኣላ” ድማ ንብል። እዚ ወቐሳታት’ዚ ነንሕድሕዱ ዝገራጮ ኢዩ። ኣየናይ ኢዩ እቲ ሓቂ? ኣነ’ኳ ሓቂ-ሓይሽ ኣብ ሓቂ ዝተመርኮስ ወቐሳ ኣይ ጸልእን። ኢትዮጵያ’ውን ኣብ እትገበሮ ሓገዝ ጉደለት ክህልዋ ይኽእል ኢዩ። ግን ንሕና’ኸ ከም ተቓወምቲ መጠን ድኽመትና ንእመን ዲና? ኢትዮጵያ ኮ ነገራውን ፖለቲካውን ሓገዝ ኢያ ከተወፍየልና እትኽእል’ምበር ክትቃለሰልና(ክተዋገአልና) ኣይኮነትን። ዝኾነ ኮይኑ ግን ኣብ ኢትዮጵያ ዘሎና ኣረኣእያ ውድዓውን መትከላውን ክኸውን ይግብኦ።

ክቡራን ኣንበብቲ! ነዛ ‹ሕፍቲዚኣ ክጽሕፍ ዘገደደኒ፡ ለማቕነ ኣብ ተቓውሞ ደምበና ሓደ  ኣዎንታዊ ምንቅስቓስ ስለ ዝተዓዘብኩ ኢዩ፡፡ እዚ ድማ እቲ “ምትእኽኻብ  ተጋደልቲ ናይ ህዝባዊ ግንባር ነበር” ዝብል ኢዩ። ልክዕ ከምቲ ናይ ምትእኽኻብ ተጋደልቲ ተጋደሎ ሓርነት ኤርትራ ነበር እንድግፎ፡ ነዚ’ውን ዮሃና ኢልና ንደግፎ። ከምኡ ድማ  ናይ ውዲ ባካሮን ውዲ ትካቦን ንጥፈታት  ኣዝዩ ዘሐጉስ ኢዩ። ነገር ግን ቁሩብ ዘሰክፍ እቲ ናይ መሰረታዊ-ለውጥን ጽገናን ጉዳይ ኢዩ። ከምቲ ወለዱ ተኽለ ኣብ ጽሑፉ ዝጠቐሶ፡  (ሽሕኳ ውልቀ-ሰባት ኣብ ጽሑፈይ ክጠቅስ ድስ ዘይብለኒ እንተኾነ)፡ ከም በዓል ዓንደብርሃን ወልደጊዮርጊስ ካብ መጀመርታ ስጋብ ሎሚ ጸረ-ደሞክራሰውያን ዝነበረን ከምኡ ድማ አሰፋወ ተኸስተ ብግልጺ “ስርዓት ህግደፍ ክወድቕ የብሉን” ዝብልን ኣብ ዝኾነ ፖለቲካዊ ውድብ ምእታው ንጸገና ምስጣሕ መለት ኢዩ። ስለዚ ዘየሰክፍን ዘየጠራጥርን ኣይኮነን። ከምቲ ረድኢ መሓሪ(ኣለና) ኣብ “ምትእኽኻብ ተጋደልቲ ህዝባዊ ግንባር ነበር” ዘስፈሮ ናይ ውልቀሰባት ግዝያዊ ተግባራትን መንነትን ክንመሚ ክንክእል ኣለና። ተዘይኮነ፡

ካብ ታሪኽ ንመሃር’ምበር  ብታሪኽ ኣይንነብርን፡ ብርግጽ ታሪኽ ተመኩሮ የስንቐካ ኢዩ። ታሪኽ መሃሪ ኢዩ።የማዕብለካ ድማ። ከም ስርዓት ህግደፍ “ኣነ ታሪኽ ዝሰራሕኹ ኢየ” እናበልካ ብሕሉፍ ታሪኽ ንምንባር ምፍታን ግን ባዶ ጃህራን ስንፍናን ኢዩ። እወ! ስርዓት ህግደፍ ሕጅ’ውን ካልኦት ውድባት ከም ዘይተቓለሳ፡ “ኣነ ኢየ ናጽነት ዘምጻኽልካ። ኣሜን ኢልካ ተገዛእ” ኢዩ ዝብሎ ዘሎ ንህዝቢ ኤርትራ። እሞ እዚ መድረኽ’ዚ ብጥንቃቔ ክትሓዝ ዘለዎ ተኣፋፊ መድረኽ ኢዩ። ብሓፈሻዊ ኣበሃህላ “እዚ ድኣ ኣብዚ ውድብ’ዚ ዝነበረ እንድዩ” ዝበሃለሉ ግዜ ኣይኮነን። ተኸኣኢልካን ተኸባቢርካን ነዚ ዝበርስ ዘሎ ህዝባና ምድሓን እንጣራነፈሉ መድረኽ ተበጺሑ ኢዩ። ኣብ ጽባሕ ናጽነት ዝስለፉን፡ ኣብ ጽባሕ ናጽነት ዝስልሙን ሃገራውያን ክህልው ናይ ቃልሲ ባህሪ ኢዩ’ሞ “ኣበይ ነይሩ ኢዩ” ክንብል የብልናን። እንጓዓዘሉ ዘሎና መንገዲ፡ መንግዲ መሰረታዊ-ለውጢ ክኸውን ከም ዘለዎ ጥራይ ከንጥንቀቕ ኣሎና።

ባጋጣሚ ነዛ ጽሑፈይ ክጽሕ ከሎኹ፡ እቲ ኣብ ዓሎም ውሩይ ተቓላሳይ ፕረሲደንት ነልሰን ማንደላ ካብዛ ዓለም ብሞት ሰለ ዝተፈልየ፡ ካብ ልቢ እናሓዘንኩ ኢየ። ብርግጽ ብሂወት ንዘላኣለም ዝነብር ሰብ የለን። ነገር-ግን እቶም ኣሸሓት ነብሳት ዘጥፉኡን ክነብሩ ደሓን ዝኾኑ መራሕቲ ክሓለፉ ግን ቁሩብ የሕዝነካን የሕርቐካን። ብዝኾነ ንህዝቢ ደቡብ አፈሪቃ ጽንዓት እምነ።

ዓወት ንሱር-ነቀል ለውጢ

ውድቀት ንስርዓት ህግደፍ.

ኣድሓኖም ፍትዊ

06-12-2013

Comment: A.Fitiwi1993@kpnmail.nl