መደበር ተለቪዥን ስርዓት ህግደፍ፡ ብ30 ታሕሳስ 2017 ኣብ ዝመሓላለፈቶ ዜና፡ ኣብ ከተማ ዓዲዃላ 02 ተባሂሉ ኣብ ዝጽዋዕ ከባቢ ብዘጋጠመ ባርዕ ሓዊ፡ ኣብ ንብረትን መንበሪ ኣባይትን ጉድኣት ከምዘወረደ ብተንቀሳቃሲ ስእሊ ዝተሰነየ ሓበሬታ ኣቅሪባ። ኣብቲ ዜና፡ ህዝቢ ኣብ ናሕሲ ኣባይቲ ብምድያብን ኣብ መሬትኑ ኮይኑ፡ ብሳንኬሎታት፡ ጀሪካናትን መገለል ማይን ተጠቂሙ ብዘይ መከላኸሊ ምስ ትክን ሓውን እናተቃለሰ፡ ነቲ ባርዕ ከጥፍእን ንብረት ክወጽእን ተራእዩ። ብመሰረት’ቲ ዝቀረበ ዜና፡ ብዕድል ኣብ ህይወት ሰብ ዝወረደ ጉድኣት ከምዘየለ’ኳ እንተተገልጸ፡ ንድኻ ደርሆ ትጸድፎ ከምዝብሃል፡ ነቲ ብኽቱር ድኽነት ዝጣራዕ ዘሎ ህዝብና፡ ንዓመታትጨቅቕ ኢሉ ዘጥረዮ ንብረት ብሓንቲ መዓልቲ ብሓዊ ክህሞኽ፡ ግዳም ሓደር ክኽውንን እንከሎ ንምትክኡ ክሳብ ክንደይ ከቢድ ከምዝኾነ ንምግማቱ ኣየጸግምን። ህዝብና ኣብ እዋን ራህዋን ጸበባን ብመን ሕራይ ዘርእዮ ምድግጋፍን ትብዓትን ንቡር ስለዝኾነ፡ ንጽቡቅ ባህሉ ምትንታን ዘድልዮ ኣይኮነን። እቲ ዝሕዝን፡ ኣብቲ ዝተቃልሐ ዜና፡ ንጋሕማጥ ኣሰራርሓ ስርዓት ህግደፍ ዳግም ዘነጽር ሓበሬታ ምዝርግሑን ንግዳያት ባርዕ ሓዊ ምውንጃልን’ዩ። ሓላፊ ሕግን ስርዓትን ንኡስ ዞባ ዓዲ ዃላ ኣቶ ፍስሃየ በራኺ፡ ነታ ከተማ ዝተመደበት ዘመናዊት መጥፍኢት ሓዊ ማኪና ብዘይተፈልጠ ምኽንያት ኣብ ቦታኣ ብዘይምርካባ እቲ ሓደጋ ኣብ ዘጋጠመሉ ህጹጽ ፍታሕ ክርከብ ከምዘይተኻእለ ገሊጹ። ዝገርም’ዩ! “ኣይትብከ እንድዩ ዘብክየኒ” ከምዝብሃል፡ ነታ ከተማ ዝተመደበት ዘመናዊት መጥፍኢት ሓዊ ማኪና ብዘይ ተፈልጠ ምኽንያት ኣብ ቦታኣ ኣይተረኽበትን ክበሃል፡ ዘሕፍርን ሓላፍነት ዝጎደሎን ጥራይ ዘይኮነ፡ ብገበንን ሓላፍነትን ዘሕትት’ዩ። ምስ ደገዝማቲ መን ተማጓቲ ስለዝኾነ ግን፡ ምልካዊ ምምሕዳር ስርዓት ህግደፍ ኣብ ልዕሊ ህዝብና ብፍላጥን ብሸለልትነትን ዘነውርን ዘስካሕክሕን ገበናት እንተፈጸመ፡ ዝሓቶ ኣካል የለን።

ስርዓት ህግደፍ፡ ሓጋጊ፡ ፈራድን ፈጻምን ኣካል ስለዝኾነ፡ ቃሕ ዝበሎ ክትግብር ወይ ድማ ጸማም እዝኒ ክህብ ስልጣን ኣለዎ። መጥፍኢት ሓዊ ኣብ ቦታኣ ዘይምርካባን ነቲ ብሓዊ ዘጋጠመ ክሳራ ኣብ ምግታእ ከይኣክልን፡ ኣዛዚ መደበር ፖሊስ ንኡስ ዞባ ዓዲ ዃላ ሰርገንቲ መሓመድ ኑር መሓመድ ዓሊ፡ ጠንቂ ናይቲ ባርዕ ሓዊ ብሸለልትነትን ሓላፍነት ዝጎደሎን ኣጠቃቅማ ዕትሮ ጋዝ ምዃኑ፡ ብዘይ ምጽራይን ውሳኔ ቤት ፍርድን፡ ህዝቢ ከም ገበነኛ ፈሪድዎ። እቲ ሓቅን ክውንነትን፡ ኣሽምባይ ኣብ ንእሽቶን ዘይማዕበለትን ከተማ ዓዲ ዃላ፡ ዋላ ዓበይቲ ከተማታትን ብዝሒ ህዝቢ ዘለወንን፡ ስርዓት ህግደፍ ገንዘብ ምግሓጥን ትካላት ምዕጻውን እምበር፡ ብዛዕባ ድሕነት ህዝቢ ይኹን ቅድመ ጥንቃቀ ቅንጣብ ሓልዮት የብሉን። ኣብ ስርዓት ህግደፍ፡ ሰባት ኣብ ፍርዲ ከይቀረቡን ናይ እምነትን ክሕደትን ቃሎም ክህቡ መሰል ከይረኸቡ ከም ገበነኛታት ምጽላም ንቡር’ዩ። ንኣብነት፡ ኣብ ኣብያተ ማእሰርቲ ስርዓት ህግደፍ ዝርከቡ ጉጅለ 15፡ ጋዜጠናታትን ካልኦት ዘጋታትን፡ ምኽንያት መእሰሪኦም ከይተገልጸ፡ ናይ ምክልኻል መሰል ከይተዋህቦምን ዝጣበቀሎም ጠበቃ ከይተሃህቦምን፡ ሃገር ክሸጠ፡ ምስ ግብረሽበራ ርክብ ገይሮምን ንብረት ኣጠፋፊእምን” ብዝብል በይንኣዊ ክስን ቃል እሱራት ከይተሰምዐን፡ “ገበነኛታት ኢኹም” ተባሂሎም ብዘይ ፍርዲ ይሳቀዩ ኣለዉ። ኣብ መዋእል ስርዓት ህግደፍ፡ ክሱስ ኣብ ቤት ፍርዲ ቀሪቡ ቃሉ ክህብ ገበኑ ክግለጸሉን ፍርዲ ክወሃብ ካልእ ሰብኣዊ መሰሉ ክሕለወሉን ዘበት’ዩ።

ኣብ ኤርትራ፡ እዚ መሰረታዊ ሰብኣዊ መሰል ስለዘየለ’ዩ ድማ ስርዓት ህግደፍ ውልቀ መላኽን ረጋጺ ህዝብናን ዝብሎ ዘሎ። ብርግጽ፡ ኣዛዚ መደበር ፖሊስ ንኡስ ዞባ ዓዲ ዃላ ሰርገንቲ መሓመድ ኑር መሓመድ ዓሊ፡ ጠንቂ ናይቲ ባርዕ ሓዊ ብሸለልትነትን ሓላፍነት ዝጎደሎን ኣጠቃቅማ ዕትሮ ጋዝ ምዃኑ መርትዖ ኣቅርብ እንተዝብሃል፡ ከምቲ  ጉድለቱ ካብ ምእማን ንሰባት ምውንጃል ዘቀለሉ ስርዓት ህግደፍ ዝብሎ ምጉት ካልእ መልሲ ክህብ ኣይክእልን’ዩ። ብቀንዱ እቶም ንብረቶምን ኣባይቶን ከሲሮም ዘለዉን ከም ገበነኛታት ዝተቆጽሩን ግዳያት ባርዕ ሓዊ፡ እቲ ዘጋጠመ ኩነታት ብናጻ ቃል ምስክርነቶም ክህቡ እንተዝፍቀደሎም፡ መልሶም ብኣንጻር’ቲ ሰርገንተ መሓመድ ዓሊ ዝሃቦ ከምዝኸውን ዘጠራጥር ኣይኮነን።  ስርዓት ህግደፍ ዝበዝሕ ኣብ ኤርትራ ዝፍጸም ጉዳያት ብምስጢርን ስቅታን ስለዝሕዞ፡ ከምዚ ኣብ ከተማ ዓዲዃላ ዘጋጠመ ዕንወት ባርዕ ሓውን ካልእ ጸገማት ህዝብን ብዙሕ’ዩ። ሓደ ሓደ እዋን ስርዓት ህግደፍ፡ ፍጻሜታት ምዕባጥ እንተዘይመሪጹ፡ ኣበሩ ካብ ምእማን፡ ንኻልኦት ክውንጅልን ሓቅታት ክጥምዝዝን’’ዩ ዝቀዳደም።

           ጽላል ካብ ሕቡራት መንግስታት ኣመሪካ፡ 1 ጥሪ 2018

Subscribe ASSENNA YouTube to get Radio Assenna shows on time: