ክቡራትን ፍቱዋትን ደቂ ኤርትራ እዚ ኣብ ታሕቲ ዘሎ ጽሑፍ ምስ ሓደ ተባዕ ኣቦ ናይ ዕድመ ብዓል ጸጋ ዚኾኑ ዝገበርኩዎ ዕላል ኢዩ።እዞም ተባዕን ብዓል ሓቦን ዝኾኑ ኣቦን፡ኣነን ድማ ኣብ ሆላንድ ንነብር።

ዚኸበርካን ዚተፈተኻን ኣማኑኤል ወደይ

ብመጀመርያ እቲ ንወዲ ሰብ ዓንዲ ሕቆ ሕይወት ዚኾነ ጥዕና’ዩሞ፡ኣብሕይወትካ ምሉእ ጥዕና፡ ኣብ መዓልታዊ ምንቅስቃሳትካ ድማ ዓወትን ኣሳልጦን እናተመነኹ፡ እግዚኣብሔር ድማ ብጽላሉ ክሕልወካ ናይ መዓልታዊ ጸሎተይ እዩ።

ኣነ ብሕይወት ክሳብዘለኹ ኣብ ጎድንኻ ኣሎኹ፡እዚ ጸልማት ድነ ክቅንጠጥ ኢዩ፡ ክወግሓልና’ዩ ኣጆኻ ዝወደይ።እዚ ትገብሮ ዘለኻ ሰናይ ግብሪ ንህዝብኻን ንሃገርካን ኣምላኽ ብዕሉ ጽላሉ የንብረልካ።

እዚ ገበል ኣፍዑት ኢሰያስ ዚብሃል ለይትን መኣልትን ክውሕጦን ክቀትሎን፡ ዝውዕልን ዝሓድርን ዘሎ፡ ከም ገጻብ ኣድጊ፡ ጭርናዕ ኮንካ ኣብ ቁስሉ ኮፍ ኢልካ ቦግቦግ ተብሎ ኣለኻ። ምስ ተሓባበርትኻን ህዝብኻን ድርብይ ክተብሎ ቀሪብካ ኢኻ።ነቲ ጽቡቅ ትገብሮ ዘለኻ፡ምእንቲ ውጹዕ ተእውዮ ዘለኻ፡ ኣፍ ውጹዓት፡ምርኩስ ድኹማት ኮንካ ንፍትሒ፡ንመሰል፡ ንዲሞክራሲ ስለ ትጭድር ዘለኻ ኣምላኽ ክሕግዘካ ኢዩ፡ ኣምላኽ ዓስቡ ክህበካ ኢዩ።እሾኽ ብበላሓ ትፍጠር ከም ዝብሃል፡ እዚ ረሳሕ ስርዓት ከም ሳዕሪ ሮማዲ ኣስፋሕፊሑ ንህዝብና ዚሳቅዮ ዘሎ፡ ንስኻ’ውን በሊሕ እሾኽ ኮንካ ትሳጽዮ ኣለኻ።

ህዝቢ ኤርትራ ካብ ዓዘቅትን ታኼላን፡ ጸሊም ናብራን ወጺኡ፡ ህዝቢ በብሃይማኖቱ ምስ ኣምላኹ ክራኸብ፡ ቅዋም ወይ ሕገ መንግስቲ ተተግቢሩ፡ ንመራሒኡ ቆጽሊ ኣንቢሩ፡ መራሒኡ መሪጹ ብዲሞክራስን ፍትሕን ቀሲኑ ክነብር፡ ሕረስ ሓረስታይ፡ ንገድ ነጋዳይ፡ ዝኾነሉ ጊዜ የምጽኣሉ።

ህዝቢ ኤርትራ፡ ክንዲ ዘኾለሰ ኢዱ ተነኺሱ፡ እዚ ኣይኮነን ሞሳኡ ኤርትራዊ። ኣታ ህዝቢ ንዘመናት ተጮቂንካ ኢኻ’ሞ፡ኣዕርፍ ክብሃል’ዩ ዝግብኦ ኔሩ። ሕጂ ግን ብኣንጻሩ፡ንሪኦ ኣለና ኣዴታትን ኣቦታትን፡ ሕቆኦምን ኣእዳወሞን ነቂዑ፡ ወሊዶም ኮስኪሶም ዘዕበይዎም ጀጋኑ ደቆም ኣወዳቶምን፡ ኣዋልዶምን፡ ደሞም ኣፍሲሶም፡ ኣዕጽምቶም ከስኪሶም ዘምጽኡዋ ናጽነት፡ብኢዱ ድማ ንስውኣት ክሒዱ፡ ሓርነት ህዝቢ መንጢሉ፡ መሳኪን ወለዲ ኣብ ማል(እንስሳ) ቀይርዎም ይነብር ኣሎ።

ኢሰያስ ዝብሃል ሰብ፡ ሰብ መሰል እንስሳ፡ንህዝቢ ኤርትራ ነንሕድሕዱ ከም ዝብኢ ክዋዳእ፡ ተላኢኹ ተመሪጹ ዝመጸ ሰብ ኢዩ። እቲ ዘገርም ከኣ ወዲ ከበሳ መሲሉ፡ ኣብ ማእከል ኣትዩ ፋሕ ብትን፡ ዘይምስምማዕ፡ ዘይምክብባር፡ ዘይምጽውዋር ባህሪ ወይ ጠባይ ኣብ ሕብረተሰብና ኣእትዩ፡ንገዛእቲ ከም ዝጥዕም ስትራተጅኡ ሓንጺጹ ተሃንዲዱ ዝመጸ ምጻእ ኢዩ። ልኣኽቱ ድማ ሚንስተር ወይ ኣማሓዳሪ ናይ ኤርትራ ዝነበሩ፡ ኣስራተ ካሳ ኣብ ቃኘው እናተራከበን፡ምስ ሓወብኡ ሚንስተር ኣብርሃ ዝብሃልን ካልኦትን ኣማሓደርትን እናተራኸበ’ዩ ስርሑ ዘገልግል ዝነበረ፡ ስለዚኢሰያስ ንኤርትራ ኣይውለዳ ብስጋ፡ ኣይንጸፋ ብኣልጋ፡ ስለዝኾነ’ዩ ድማ፡ማይ ዘይኮነ ደም ዘንብዓና ዘሎ፡ ስለዚ ህዝብና ክነቅሓሉ ዘሎዎ ነዚ ተረዲኡ፡ ኣረኣእያና ኣብ ቦትኡ ኮይኑ፡ ፍልልያትና ግን ክጸብብ ኣሎዎ፡ ምእንቲ ውጹዕ ህዝቢ።

ኣምላኽ ጥዕናን ዕድመን ይሃበኒ ኣብ ዚመጽእ ዝፈልጦ ታሪኽ ብሰፊሑ ክዝርዝር ኢየ። ክሳብ ሽዑ ግና ዕድመን ጥዕናን ንኹልና፡ ሰላምን ሓነትን፡ ፍትሕን ዲሞክራሲን፡ ንውጹዕ ህዝቢ ኤርትራ።

ካብ ደላዪ ለውጥን፡ ፍትሕን

ማይክል ተኽለ(ብራዘር)

06-05-2014