ኢራን ኣብ ጀኔቫ ድሕሪ ዝተኻየደ መዓልታት ዝወሰደ ጽዑቕ ዘተ፣ ሎሚ ንጉሆ 24 ሕዳር፣ ንኵልየራዊ ንጥፈታታ ብኸፊል ከተጕድል፣ ኣመሪካ ምስ እትርከበን 6 ወንነቲ ንኵልየር ዝኾና ሃገራት ከምዝተሰማምዐት ኣህጉራዊ ማዕከናት ዜና ሓቢረን።

ኢራን፣ ኣምሳያ ናይቲ ኣትያቶ ዘላ ውዕል፣ ብሰንኪ ኣህጉራዊ እገዳ ክትከስሮ ዝጸንሐት 7 ቢልዮን ዶላር ዝግመት ቁጠባዊ ንጥፈታት ሕድገት ክግበረላ እዩ።

ፕረዚደንት ሕቡራት መንግስታት ኣመሪካ ባራክ ኦባማ፣ እቲ ውዕል ንኢራን ንኵልየራዊ ኣጽዋር ካብ ምምዕባል ብኸፊል ዝዓግታ ስምምዕ ምዃኑ ብምጥቃስ ብኣውንታ ከምዝተቐበሎ ተገሊጹ።

በቲ ውዕል መሰረት፣ ኢራን ኣህጉራውያን ተኸታተልቲ ንኵሌየራዊ ትካላት ናይታ ሃገር ነጻ ኮይኖም ክዕዘቡ ዝሓሸ ኣፍደገ ክትከፍተሎም፣ ከምኡ ‘ውን ዩራንዩም ናይ ምኽዕባት ንጥፈታታ ከተጕድል እያ።

እቲ ኣብ መንጎ ኢራንን ወንነቲ ንኵልየር ዝኾና 6 ሃገራትን ዝተበጽሐ ኣፈናዊ ስምምዕ፣ ኣብ ዓለም ከም ታሪኻዊ ምዕባለ ናይቲ ቀጺሉ ክስዕብ ትጽቢት ዝግበረሉ ዝዓበየ ውዕል ብተስፋ ይዝረበሉ ‘ኳ እንተሎ፣ እስራኤል ነቲ ውዕል ብምንቃፍ፣ በቲ ስምምዕ ከምዘይትቕየድ ኣፍሊጣ።

እዚ ናይ ሎሚ ስምምዕ፣ ንልዕሊ 30 ዓመታት ኣህጉራዊ ተነጽሎ ኣጋጢሙዋ ዝጸንሐት ኢራን፣ ካብ ግሉልነት ክትድሕን ኣብ እትገብሮ ጉዕዞ ኣሰር ዘለዎ ሓደ ዓቢ ስጉምቲ ንቕድሚት እዩ።