ብኣወልኼር ዓ/ሓፊዝ

ብቲቪ ኤረ ኣቢሉ ዝቀርብ መደብ መርሓባ ንወ/ሮ ለተሃንስ (ኣደ ኣርባዕተ ስዉኣት) ዓዲሙ ፤ ነቲ ከምዘይወለዳ፤ ወሊደን ከምዘይሰዋኣ ፤…….. ክሳብ ገባር-ሰናይ ነጋሲ ገ/ሚካኤል መጺኡ  ዘድሕነን ” በይነይ ኣብ ገዛ ተዓጽየ፤ ኣብ ጎልጎል ዝኽደኖ ዘይብለይ፤ብጸሓይ እናነደድኩ ብቁሪ እናተቀርፈድኩ እነብር ነይረ  ….. ” ወዘተ ዝብል ኣብ ዓዲ ሓርበኛታት  ክፍጸም ዘይኮነ ክስማዕ ዘይነበሮ ኣሕፋሪ ተርእዮ ብቁሉዕ ኣብ መራኸቢ ብዙሃን ምቅራቡ፤ ነቲ ጉቡኡ  ዘይፈጸመ መንግስቲ ኤርትራ ” ረኣይዎ በሉ ! ” ንምባል እንተኾይኑ  ዝነኣደሉ ሓላፍነታዊ መልእኽቲ`ዩ።

” ናይ መንግስቲ ይጽናሓልና`ሞ ” ሕጂ`ውን እቲ ረሃጹ እኽሉ ማዩ ጥሪቱ ውላዱ እናሃበ ንሰውራ  እናኾስኮሰ ኣብ ዝብጻሕ ዘብጸሔ ህዝቢ ንዝርእዮ ሓለፋታት ዋጋ ከይሃበ፤ ኣብ ክንዲ መንግስቲ ኾይኑ ብዝከኣሎ ንስድራቤታት ስዉኣት ክኣሊ ኣለዎ። እዚ ንመንግስቲ ዝምልከት ኣይኮነን ማለቶም ኮይኑ ኸኣ ንዕቀት`ዩ ።

ኣየናይ ንዕቀት እምበር !!!!!!! ጉቡኡ እምበር መሰሉ ዘይፈልጥ ህዝቢ ክትበሃል እንኮለኻ`ኮ ናእዳ ኣይኮነን ውርደት`ዩ።

መደብ መርሓባ ከም`ዚ ዝትሕዝትኡ ዘሕዝን ዘሕፍር ትሕዝቶ ሒዙ ዝቀርብ ዘሎ ንመጀመርቲኡ  ኣይኮነን። ቅድሚ ሕጂ`ውን ሓንቲ ኣደ ስዉኣት ዓይነን ዓዊረን ነዛ ትስተ ማይ ከምጸኣ ተሸጊረን ሓንቲ ገባሪት-ሰናይ ከም ዝጸረተን……… ዝብል ይዝከረኒ።

ምስ ጥልያን ኮይኖም ዝተዋግኡ ኣካሎም ዝጎደሉ በቲ መንግስቲ ጥልያን ዝኸሓሶም ገይሮም ገዛ ዘጥረዩ፤ ኣብ ቆንስል ጥልያን ኣስመራ እናኸዱ ብሱሩዕ መንገዲ ጻመኦም ዝወሃቡ ከም ዝነበሩ ዋላ`ኳ ኣብ ኣጻሪኻ ምፍላጥ ዕድመ ከይበጻሕኩ ካብ ኣስመራ እውጻእ እምበር እስምዕ ነይረ።

መስዋእቲ ከም ኣብ ስራሕ እንኮለኻ ዘጋጥም ሞት ተቆጺሩ ተሓሳሲብካ ዝኽፈለካ ዋጋ/ ጻማ ዓይነት ኣይኮነን። መስዋእቲ ንባዕሉ ን ክብሪ ወዲ ሰብ ዝተኸፍለ ወይ ዝኽፈል ዋጋ`ዩ። ስለዚ እቲ መስዋእቲ ዝተኸፍሎ ክብሪ ኣበይ ኣሎ`ዩ እቲ ሕቶ።

ኣብዚ መደብ መርሓባ ዘቅረበልና ዛንታ ክብሪ እዘን ኣደ ኣርባዕተ ስዉኣት ወ/ሮ ለተሃንስ ኣበይ ኣሎ ？！！！！！！

ጉቡኡ እምበር መሰሉ ዘይፈልጥ ህዝቢ ክትበሃል እንኮለኻ`ኮ ናእዳ ኣይኮነን ውርደት`ዩ።

ኣብ ጉዕዞ ሃገራዊ ሰውራ ናይ ዝተሃስዩ ሸነኽ ምእላይ(ክብረቶም ምሕላው) ምጽዋት/ሰደቃ ዘይኮነ መንግስቲ ካብ ዜጋታቱ ካብ ዝእክቦ ግብርን ማእቶት ሃገራዊ ሃብትን ኣቢሉ ክፍጽሞ ዘለዎ`ዩ። ጉቦኦም`ዩ። ክውሕድ ይኽእል ክበዝሕ ይኽእል። ኣብ ገዛኻ ዘሎ ኢኻ ተደሪርካ ትሓድር። ብዝተረፈ ኣብ እዚኦም ጸሞም ዝሓድሩላ ለይቲ፤ ጸጊቡ ክሓድር ዘሎዎ ዜጋ ክህሉ የብሉን/ ኣይነበሮን።

ሃገረይ ረቢ`ኹንኪ