ነቲ ኣብ ገማግም ባሕሪ ላምፓዱሳ ዘጋጠመ፣ ንኤርትራውያን ጥራይ ዘይኮነ እንተላይ ንዓለም ኣስካሕኪሑ ዘሎ ጃምላዊ ህልቂት ልዕሊ300 ኤርትራውያን፣ ሞት ኣፍሪቃውያን ስደተኛታት ኢሉ ብምንእኣስ፣ እንተተመሰለሉ ንሰሙን መመላእታ ሓቢኡዎ ዝጸንሐ ጥስጡስ ስርዓት ኢሳይያስ፣ በቲ ንመላእ ህዝቢ ኤርትራ ደም ዘንብዐ መሪር ሓዘንን ዘየቋርጽ ዋጭዋጭታ ዓለምን ተደሪኹ ከይፈተወ ተኣሚኑሉ።

እቲ ቀንዲ ጠንቂ ምብትታንን ህልቂትን ኤርትራውያን ዝኾነ ስርዓት ኢሳይያስ፣ ነቲ ብ 3 ጥቅምቲ ኣብ ልዕሊ 500 ኤርትራውያን ስደተኛታት ዘጋጠመ ሓደጋ ኣመልኪቱ ሎሚ 9 ጥቅምቲ ኣብ ዘውጽኦ ንብዓት ሓርገጽን ምስምስን ዝበዝሖ መግለጺ፣ “ቀዳመይቲ ተሓታቲት ናይቲ ህልቂት ኣመሪካ እያ” ክብል ክትሰምዖ ዘደንጹ ክሲ መስሪቱ።

እንተኾነ፣ እቲ ድሕሪ ሰሙን መመላእታ፣ “ጸብጻባት ማዕከናት ዜና ከምዝበልዎ” ኢሉ ‘መንግስታዊ’ መግለጺኡ ዝጀመረ፣ ህዝቢ ኤርትራ ሰንፈላል ኮይኑ ከሎ ቁጽሪ ኤርትራውያን ግዳያት ክፈልጥ ዘይፈተነን ዘይተገደሰን ስርዓት፣ እቲ ከቢድ ሓደጋ ዝያዳ ጽልእን ናዕብን ከየምጽኣሉ ስለዝሰጋአ እዩ ክዛረበሉ ተገዲዱ።

መንግስቲ ጥልያን ኣብ ጽባሕ ‘ቲ ኣማኢት ኤርትራውያን ዘህለቐ ሓደጋ ሃገራዊ መዓልቲ ሓዘን ኣዊጁ ኸሎ፣ ኣብ ማዕከናት ዜናኡ ብዛዕባ ኣብ ጎልጅ ዝተኸትባ ኣባጊዕ ዝዛረብ ዝነበረ ስርዓት ኢሳይያስ፣ ሕጂ መርድእ ብዙሓት ግዳያት ድሮ ናብ ስድራቤታት በጺሑ፣ ሓዘን ተፋሪቑ ኣብ ዘለወሉ እዋን እንተኾነለይ ኢሉ ብሃሰሰ ለባም ዝሓንጠጦ መግለጺ ግን ፋይዳ የብሉን። ቅንጣብ ሓልዮት ዜጋታት ከምዘይብሉ ኣብ ልቢ ህዝቢ ኤርትራ ብዓንተቦ ተመዝጊቡ፣ እቲ ዕንወት ድሮ ተፈጺሙ እዩ።

እቲ ዓመጽን ዕንደራን ዝመለለይኡ ዝኣጎለ ምሕደራ ስርዓት ኢሳይያስ ብዝፈጠሮ ፖለቲካውን ቁጠባውን ማሕበራውን ቅልውላው፣ ንህዝቢ ኤርትራ ብሕልፊ ድማ ነቶም ቀንዲ ግዳያት ውድቀቱ ኮይኖም ዘለዉ መንእሰያት ኤርትራ ተስፋ ኣቕሪጹ ናብ ኩሉ መኣዝናት ስደት ከምዝበተኖም፣ ካብ ሞት ክሃድሙ ክብሉ ድማ ናብ ሞት ይኣትዉ ከምዘለዉ ህጻናት ኤርትራ ከይተረፈ ዝፈልጡዎ መባእታዊ ፖለቲካ እዩ።

ስርዓት ኢሳይያስ ነቲ ዘስካሕክሕ ቅዝፈት ኤርትራውያን፣ ናይ ኣፍሪቃውያን እናበለ ንሰሙን ካብ ኤርትራ ከርሕቖ፣ ሕጂ ድማ ካልኦት ‘ውን ኣለዉ እናበሉ ክጅልሑዎ ‘ኳ እንተፈተኑ፣ ካብቲ ሓደጋ ዝደሓኑ ውጻእ መዓት ኤርትራውያን ኣብ ናይ ሰኑይ መደብ ምስ ድምጺ ኣሰና ኣብ ዝገበሩዎ ቃለመጠየቕ ከምዝሓበሩዎ፣ ካብቶም ኣብታ ጃልባ ተሳፊሮም ዝነበሩ 518 ስደተኛታት 8 ኢትዮጵያውያን ክኾኑ ከለዉ፣ 512 ኤርትራውያን እዮም።

በዚ ትማሊ ኣብ ገምገም ባሕሪ ላምፐዱዛ ዝወረደ ናይ ኣስታት 350 ኤርትራውያን ህልቂት፣ ከምኡ ‘ውን ኣብዚ ዝሓለፈ ዓመታት ኣብ መድረበዳ ሰሃራን ሲናይን ማእከላይ ባሕርን ብተደጋጋሚ ዘጋጠመ ቅዝፈት ኣሽሓት ዕሸላትን መንእሰያትን ኤርትራ ዝሕተቱ ኸኣ ኢሳይያስን መጋበርያኡን እዮም።