ተጋ/ የማነ ተ/ገርግሽ

“ኣብ ዘይመዓልትኻ ኣይምወትን`ዩ”

ብኣወልኼር ዓ/ሓፊዝ

ተጋ/ የማነ፤ ከመዮ ዝበልካዮ ንሓደ መዓልቲ ዘዋግእ ብረት ተጸሚዱልካ፤ብለይትን ቀትርን፤ብሰብኡትን ኣንስትን ተሰሊኻ፤ብዘየድምጽ ብረት ኣልግብ ኣቢሎም ከቃብጹኻ`ሞ ንዘልኣለም ምስ ምስጢራትካ ተቀቢርካ ንኽተርፍ ዝተጻውደ ኮንቱ ዕጥቂ መኺኑስ፤ ሃንዳሲ ቅትለትካ ብተመሳሳሊ ናይ ይቀተል ብይን ቀዲሙካ ክቅተል ምርኣይ ወዲ ሰብ ኣብ ዘይማዓልቱ ከምዘይመውት ዘረጋግጽ ሓቂ`ዩ። እቲ ነፍስና  ክትእመነሉ ዘይትደሊ ሓቂ ! ።

ኩቡር የማነ፡ ክትሰማማዓኒ ተስፋ እናገበርኩ፤ ብወገነይ ነዚ ዘቅረብካዮ ናይ ታሪኽ ቃለ-ምስክር ከይሃብካ እንተትመውት (እንተትቅተል)`ዩ ሞት ዝቁጸር ነይሩ። ሕጂ`ውን ፈጣሪ ዕድመን ጥዕናን ሂቡካ ነዚ ቃለ-ምስክር ብስምካ ክትስንዶ ብዙሕ ተስፋ እገብር።

ንቃለ-ማሕተትካ እናተኸታተልኩ። ንሓድሽ ውሳኔ ኣብ ጉዕዞ ቃልስኻ ይኹን ኣቅጣጫኻ ንምንጻር ዝደረኸካ ተርእዮታትን ትዕዝብትን ክትገልጽ እንኮለኻ ቅንዕናኻ ጎሊሁ ተራእዩኒ`ዩ። ብቁዕ ሰብ ማለት`ኮ ኣብታ ኣብ ጌጋ ምህላዉ ዝተገንዘበላ ግዜ ደው ኢሉ ሓሲቡ ጉዕዘኡ ዘስተኻኽል`ዩ። ዘንእደካ`ዩ።

ብተወሳኺ፤ ካብቲ ደስ ዘብል ኣቀራርባኻ፤ እቲ ንሃገርካ ንህዝብኻ ዝተመነኻዮ ነጻነት ብኻብ ኢድካ ወጻኢ ብዝኾነ ምኽንያት ክረጋገጽ እንተዘይተኻእለ ኣብ ነፍስኻ ግና ከምዘውዓልካዮ (ከም ዘንጸባረቅካዮ) ንዘተኮረ ሰብ ጎሊሁ`ዩ።በቲ 2ይ ገጽ ናይ ቃልስና ታሪኽ ዝኾነ ታሪኽ ተሓኤ ብዙሕ ክትከታተሎ ዕድል ዘይረኸብካ ተረክቦታት ከም ዘሎ ንብዙሓት ተጋደልቲ ጀብሃ ብሩህ`ኳ እንተኾነ፤እዚ`ውን ብዘየገድስ ኣብ ጀብሃ ድዩ ኣብ ሻዕብያ ከምኡ`ውን ኣብ ሃገር ኤርትራ ዝተፈጸመ ታሪኽ ሕማቁን ጽቡቁን ታሪኽ ህዝቢ ኤርትራ`ዩ።

ነቲ ብጻይካ እናተበደለ ካብ ቅድሚ ዓይንኻ እናተሰወረ፤ እናተቀንጸለ …………. ኮታ በደልን ሃስያን እናረኤኻ ዓገብ ዘይምባል ዘይምሕታት ዘይምጽራይ …………  ክሳብ`ታ ካራ ኣብ ክሳድካ ትትከል ምጽባይ ዘገረመካ ባህሪ ምዃኑን ከም ህዝቢ ዝተዓደለና ባህሪ ከይከውን ከጠራጥረካ ዝቀረበ ኾይኑ ተሰሚዑኒ፤ብወገነይ እቲ ተርእዮ`ቲ በቲ ኣብ ሻዕብያ ዝነበረ ስልቲ ኣሰራርሓ ዝተፈጥረ ማሕበራዊ ከባቢ (ቢኣ)ዝወለዶ፤ ብምስፋሕ ሓይሊ ሻዕብያ ርኡይ እናኾነ ዝኸደ ባህሊ`ምበር ዝጸንሔን ውህቡን ጠባይ ህዝቢ ኤርትራ ኣይኮነን። ኤርትራውያን ካራ ክሳብ ኣብ ክሳዶም ትትከል ዘይተጸበይሉ ተርእዮታት`ውን ኣሎ። ገለ ካብ ዝዝከረኒ፤ንኣብነት ኣብ ተሓኤ፡

–  ብልክዕ ግዘኡ ኣይዝክሮን  (1975 ወይ1976) ሓደ ተጋ/  ንሞት ተፈሪዱ ምስ ተሰምዔ እቶም ኣብታ ዝነበራ ክፍሊ ምምሕዳር(ጋሽ) ዝነበሩ ተጋደልቲ ” ከመይ`ሉ ተጋዳላይ ንሞት ይፍረድ!” ኢሎም ሆ ምስበሉ እቲ ፍርዲ ተሳሒቡ።

– ሓደ ምስ ሓንቲ(ተጋደልቲ) ኣብ ኩነታት ጾታዊ ርክብ ተረኺቦም ከም መቅጻዕቲ ንደንከልያ ክኸይድ ድዩ ክኸዱ ምስ ተወሰነሎም፤ እቲ ውሳኔ ንኽብሪ`ቶም ኣብ ደንከል ዝጋደሉ ዘለዉ ዝትንክፍ ተቆጺሩ ተቃውሞ ምስ ተራእየ ዳግመ ርእይቶ ተገይሩሉ።

– 1976 ህ/ሓይልታት ምስ ተፈንጨለ፤ “እቲ ኣብ ሜዳ ዘሎን እቲ ናይ ወጻእን ክልተ ገጽ ናይቲ ኣብ ሃገራዊ ጉባኤ ዝኣመናሉ ውድብ ህዝባዊ ሓይልታት`ዮም” ዝብል ብብዝሒ ድምጺ መሪሕነት ዝጸደቀ መርገጽ ውድብ፤ብመሰረት ኣብ ጉባኤ ዝጸደቀ ኣሰራርሓ ኩሉ ብቀጥታ ክቅበሎ ዝግባእ ክነሱ፤ ፍርቂ ናይቲ ኣብ ህዝብን ሰራዊትን ክገልጽ ሓላፍነት ዝተሰከመ ካድር ኣንጻር`ቲ መርገጽ ደው ኢሉ! “ነቲ ኣብ ሜዳ ዘሎ ኢና ክንኣምነሉ ዘለና” ስለ ዝበለ  እንተዘይ ተጋግየ ካብ ክልተ ቅነ ዘይውሕድ ናይ ተኻቲዕካ ምርድዳእ ዕድል ተዋህበ፤ ኣብ ርእሲ`ቲ በኣቦ ወንበርን ኣባላትን ፖ/ቤት ጽሕፈትን ዝተኻየዲ ጻዕሪ ብዙሓት ኣባላት ፈጻሚት ከኣ በብግዜኡ እናመጹ ነኣማጻጽኣ ናይ`ቲ መርገጽ ክገልጹ ድሕሪ ምጽናሕ ስለ ዘይተዓወቱ፡ ነቶም ዝዓገቡ ክዋፈሩ ምስቲ ዘይዓገበ ኸኣ እቲ ጻዕሪ ክቅጽል ተገብረ።

ስለዚ ህዝቢ ኤርትራ ይኹን ካልእ ህዝቢ ዝነብረሉ ማሓበራዊ ከባቢ(ቢኣ)ዘሰክሞ ጠባይ ባህሊ`ምበር ውሁብ ዝበሃል ናይ ሓዋሩ ባህልን ልምድን የለን። ዝኾነ ህዝቢ ብሕልና ዘለዎም፡ ብዋጋ ረብሓ ህዝቢ ዘይብለጹ፡ ንኹሉ ሜዳያት ሂወት ዘድሊ ትምህርቲ ዝቀሰሙ፡ ኣብ ትሕቲ ሕጊ ኮይኖም ዝሰርሑ ዝምራሕ ኮይኑ፤ ነዚ ዘንጸባርቅ ፍትሓዊ ባህሊ ከጥሪ ግድን`ዩ።

ሕጂ ኸኣ ንድሕሪት ተመሊስካ ዝዕረ የለን።ዝኾነ ኾይኑ`ዩ። ናይ ትማሊ ሕማቅ ብናይ ጽባሕ ጽቡቅ ገርካ ጥራሕ`ዩ ዝድምሰስ። ከምቲ ጀርመን ንኣጸያፊ ዘመነ ሂትለር፤ ኣመሪካውያን ንኣጸያፊ ዘመነ ባርነት ወዲ ሰብ ዝደምሰስዎ።

የማነ ! ከምቲ ንምልኪ ንምህናጽ ክውህለል ዘለዎ ሮቋሒታት ዘሎ፤ ንፍትሒ ንምህናጽ ከኣ ክውህለል ዘለዎ ሮቋሒታት ኣሎ፤ ሓደ ካብቲ ብዙሕ እዚ ትገብሮ ዘለኻ ናይ ሓደ ጡብ ምልኪ ካብ ህንጻ ምልኪ ኣልቂቅካ ኣብ ቦትኡ ጡብ ፍትሒ ምስኳዕ`ዩ።

ንወዲ ተምነዎ ዝሃብካዮ ክብሪ ዘሎኒ ደገፍ እገልጽ።

AAHafiz (180) 15/11/2014