ተሳትፎ ደለይቲ ለውጢ ኖርወይ ኣብ ቦሎኛ

ህግደፍ፡ ኣዝዩ ግፍዐኛ ጕጅለ ኣብ ርእሲ ምዃኑ፡ ቀንዲ ጸገሙ ብዘይካይ ብዛዕባ ጕዳይ ሃገር ዝምልከቶ ሰብ የሎን ብምባል፡ ምሕደራ ሃገር ንበይኑ ክብሕት ምድላዩ እዩ። ንሱ ከይኣኽሎ፡ ነዚ ነገር’ዚ ብሕጋዊ ኣገባብ ዘይኮነ ብደረጃ ውልቀምልኪ የካይዶ። ስለዚ፡ ደለይቲ ለውጢ ነዚ ጋሕማጥ ጕጅለ’ዚ ካብ ገጽ ምድሪ ሓግሒግና ክንኣልዮ እንተዄንና ብቅኑዕ መትከል ክንምራሕን እዚ ዓመጸኛ ጕጅለ’ዚ ዝገብሮ ጌጋታት ክንደግምን የብልናን። ፍትሒ ክነምጽእ ንቃለስ ስለ ዘለና፡ ኩላትናተቓለስቲፍልልያትናሃብትናምዃኑኣሚንናብሓባርኣንጻርጭፍራ ህግደፍክንምክትይግብኣና።ፍልልያትናብምንጻርንብምክብባርንንናይጽባሕዲሞክራሲያዊትኤርትራውሕስነት’ዩ ካብዝብልመሰረታዊእምነትተበጊስናድማኣብሞንጎናፍቕርንሰላምንምትሕብባርንከነስፍንክንክእል ግድነት ይኸውን።ልዕሊ ዅሉ ድማ ነፍስወከፍ ኤርትራዊ፡ ፍልልያቱ ዝበየገድስ በብዝጥዕሞ ኣገባብ  ክውደብን ኣንጻር ውልቀምልኪ ክቃለስን መሰል ከም ዘለዎ ክንፈልጥ የድሊ። ካብዚ መትከላት’ዚ ብምብጋስ’ዩ ድማ ምምስራት ጽላል ኤርትራውያን ደለይቲ ለውጢ ኣብ ኖርወይ ኣድላዪ ኮይኑ ዝተረኽበ።

ቅድሚ ሕጂ ኣብ መራኸቡ ብዙሓን ከም ዝተገልጸ፡ ጽላል ኤርትራውያን ደለይቲ ለውጢ ኣብ ኖርወይ ካብ ዝምስረት ድሮ ክልተ ዓመት ቀሪቡዎ ኣሎ። ርግጽ’ዩ ብመጠን’ቲ ንምነዮን ንብህጎን ኣድሚዑ ክንብል’ኳ እንተ ዘይደፈርና፡ ብዓቕሙ ዓበይቲ ዓወታት ከም ዝተጐናጸፈ ይትረፍ ንሕና ኣብቲ ቃልሲ ዘለና፡ ህግደፍ ይኹን ደገፍቱ ዝምስክሩዎ ሓቂ ኮይኑ’ሎ። ናይ ዝኾነ ቃልሲ ሓይሊ ካብ ውሽጣዊ ኵነታት ስለ ዝብገስ ድማ እቲ ዝዓበየ ዓወት ጽላል፡ ሓድነት ኣባላቱ ኣብ ዝለዓለ ደረጃ ክብ ኣቢሉን ተወሃሂዱን ክሰርሕ ምኽኣሉ ጥራይ ዘይኮነ፡ ኣብ ባይታ’ውን ኣደልዲሉ ክረግጽ ምኽኣሉ እዩ። ብፍላይ ኣብ ምዕራባውያን ሃገራት ናብራኻ ኣጣጢሕካ፡ ጥዑም እናበላዕካን ጥዑም እናሰተኻን፡ ቀዳምነት ንውልቃዊ ህይወትካ እናሃብካን ዝቕይደካ ድሲፕሊን ኣብ ዘይብሉን ክተካይዶ ኣብ ትፍትነሉ ግዜ፡ እቲ ዘጋጥም ጸገማት ዝተዓጻጸፈ ይኸውን። ነዚ ካብ ውሽጣዊ ኵነታት ሃገር ርሒቕካ ኣብ ስደት ምህላው ክውሰኾ ከሎ ድማ እቲ ጕዳይ ዝያዳ ይተሓላለኽ። ስለዚ፡ ነዚ ዅሉ ኣወሃሂድካ ነቲ ቃልሲ ክትኣልን ክትመርሕን ምፍታን ቀሊል ብድሆ ከም ዘይኮነ ርዱእ ይመስል።

ጽላል ደለይቲ ለውጢ ኤርትራውያን ኣብ ኖርወይ ድማ ካብ ህሉው ኵነታት ቃልሲ ተወሊዱ። ካብ ጌጋታቱ እናተማህረ ክምዕብልን፡ በብቝሩብ ክድልድልን ክትርንዕን ብምጅማር፡ ኣብዚ እዋን እዚ ድሮ ዓዅኹስ ኣንጻር ህግደፍ ኣድማዒ ዝኾነ ዕማማት ኣብ ምክያድ ይርከብ ኣሎ። እቲ ዘካይዶ ዘሎ ቃልሲ፡ ኣብ ኵሉ ማሕበራዊ ህይወት ንዝርከቡ፡ ጸረ ህግደፍ ዝኾኑ ማሕበራት፡ ውድባትን ውልቀሰባትን ዝጥርንፍን ዘወሃህድን እዩ። ህግደፍ፡ ኣጻፍሩ ኣብ መላእ ዓለም ብምዝርጋሕ ህይወት ክዘርእ ትልኽ ኣብ ዝብለሉ ዘሎ ግዜ ድማ እቲ ቃልሲ ብደረጃ ዓለም ክወሃሃድ ግድነት እዩ። እዚ ዕማም’ዚ ወላ’ኳ ኣብ ዕሸልነት እንተ’ሎ ጽቡቕ ኣንፈት ሒዙ ከም ዘሎ ይፍለጥ። ከም መርኣያ ናይዚ፡ ኣብ መወዳእታ 2012 ኣብ ጀነቫ ብደረጃ ኤውሮጳ ዝተኻየደ ደርማስ ሰላማዊ ሰልፊን፡ ኣብዚ ቅንያት እዚ ኣብ ቦሎኛ ዝተኻየደ ተቓውሞ ንናይ ህግደፍ ፌስቲቫል ቦሎኛን ክጥቀስ ይከኣል።

ካብዚ ነጥብ’ዚ ብምብጋስ፡ ጽላል ኤርትራውያን ደለይቲ ለውጢ ኣብ ኖርወይ፡ ኣብ ስታቫንገር ኣብ ዘካየዶ ኣኼባኡ፡ ህግደፍ ደም ግዳያት ላምፔዱሳ ከይነቐጸ ኣብ ቦሎኛ ከካይዶ ንዝሓሰበ ፌስቲቫል ንምቅዋም ዝብገሱ ኣባላት ተዳሉ ኮሚቴ መዚዙ። ወላ’ኳ እቲ ግዜ ሓጺር እንተነበረ፡ ልዑል ድሌት ደለይቲ ለውጢ ስለ ዝነበረ፡ ንመግዝኢ ቲኬት 70 ሽሕ ክሮነር ክዋጻእ ከሎ፡ ኣብ ቦሎኛ ንኣባላት ዝኸውን መንቀሳቐሲ ድማ 13,000 ሽሕ ክሮነር (1460 ኤውሮ) ተዋጺኡ። እዚ ገንዘብ’ዚ ዝበዝሕ ካብኡ ብደረጃ ማሕበራት፡ እቲ ዝተረፈ ድማ ኣስማቶም ብዝገለጹን ዘይገለጹን ኣባላት ዝተዋጽአ እዩ። ኣብ ቦሎኛ ካብ ኖርወይ ዝተሳተፉ ኣባላት ጽላል ብቝጽሮም ኣስታት 40 ምዃኖም ይፍለጥ። ብወገንና፡ እቲ ኣብ ቦሎኛ ኣንጻር ፌስቲቫል ህግደፍ ዝተኻየደ ተቓውሞ ሸቶኡ ከም ዝወቕዐን፡ ምንቅስቓስ ደለይቲ ፍትሒ ሓደ መድረኽ ብምስጋር ንህግደፍ ኣብ ናይ ምክልኻል መድረኽ ከም ዘእተዉዎን ተገንዚብና ኣለና። መርኣያ ናይዚ ድማ እቶም ማእለያ ዘይብሉ ገንዘብ ዝተኸፍሎም፡ ምሉእ ዕጥቂ ናይ መበተኒ ሰላማዊ ሰልፊ ዝነበሮም ፖሊስ ኢጣልያ ምእካል ስኢኖሞ፡ “ጠፋእኩየ! ተወሳኺ ሓይሊ ፖሊስ ስደዱየ!” ክሳብ ዝብል ከም ዝገበሩዎ ኣብቲ ውዕሎ ዝተሳተፉ ደለይቲ ለውጢ ዝምስክሩዎ ሓቂ እዩ። እዚ ጽፉፍ ውዳቤ ዝነበሮ ኣብነታዊ ስርሒት’ዚ፡ ድሕሪ ሕጂ ኣብ ዝካየድ ተመሳሳሊ ንጥፈታት ክድገም ናይ ወትሩ ትጽቢትና እዩ። በዚ ኣጋጣሚ እዚ፡ ነቶም ነዚ ስርሒት’ዚ ዕዉት ኣብ ንክኸውን ብደረጃ ዝነብሩሉ ሃገር ይኹን ብደረጃ ኤውሮጳ ዝወደቡን ዝጸዓሩን ደለይቲ ለውጢ፡ ምስጋናና ወሰን ከም ዘይብሉ ክንሕብር ንፈቱ።

ቃልስና ክዕወት እዩ!

ጽላል ኤርትራውያን ደለይቲ ለውጢ ኖርወይ