ሎሚ ቀዳም 18 ግንቦት 2013 ኣብ ሰዓትት ቅድሚ ቀትሪ ብሚኪኤል እምባየ (ኣራንቺ) ዝተጻሕፈት   መመረቕታ  መጽሓፍ ድርሳነ ደም ብምዕሩግ ኣገባብ ተዛዚሙ፡፡

ኣብ ጽንብል መመረቕታ መጽሓፍ ድርሳነ ደም ብርክት ዝበሉ ዕዱማት ኣብ ርእሲ ምርካቦም ድምጻዊ ምሕረትኣብ ሚኪኤልን ወዲማማን ከምኡ ውን ገጣማይ መድሃኔ ነቲ ስነ ስርዓት ድምቀት  ዝወሰኹሉ ከዋኽብቲ እውን ኣብ ተሳተፍቲ እቲ ስነ ስርዓት ጦብላሕታ ዝገድፍ መሳጢ ስነጥበባዊ ስራሓት ንተሳተፍቲ ኣቕሪቦም ኢዮም፡፡

ንመጽሓፍ ድርሳነ ደም ብዝግባእ ኣንቢቡ ንተሳተፍቲ ትሕዝቶኣ እንታይ ከም ዝመስል ብሓጺርን ገላጽን ኣገባብ ንተሳተፍቲ ዘላለለየ ዶክተር በረኸት ብርሃነ ኢዩ፡፡ ብዜኩኡ ሓጺር ናይ ደገፍን ምትብባዕን መግለጺታት ብኤርትራዊ ሃገራዊ ባይቶ፡ ኤርትራዊ ዲሞክራስያዊ ኪዳን፡ ብስምረት መናእሰያት ንድሕነት ሃገር ተዋሂቡ፡፡ ኣብ መጠረሽታ ድማ ቃል ጸሐፊ ድርሳነ ደም ብሚኪኤል እምባየ (ኣራንቺ) ንተሳተፍቲ ተዋሂቡ፡፡ 

ምኪኤል ኣብ መግለጺኡ፡ ነቶም ዕድሚኡ ኣኽቢሮም ኣብቲ መመረቕታ ዝተረኽቡ ግዱሳትን መጽሓፍ ኣብ ምሕታም ብገንዘብን ሞራልን ዝተሓባበሩዎን ተሓባበርቱ ኣመስጊኑ።

ቀጺሉ፡ “  መጽሓፍ ክትጽሕፍ  ብፍላይ ድማ ኣብ ከምዚ ኣነ ዘለኹዎ ናይ ስደት ሃዋሁ፡ ማሕለኻ ኮይኑ ኣእዳውካ ዝሓልከካ ፋይናንሳዊ መዳይ ኢዩ፡፡ ኣብ ኢትዮጵያ፡ ብሰናይ ድሌት ህዝብን መንግስትን ኢትዮጵያ ኣብ ትሕቲ ጽላል  UNHCR ብሓገዝ እናነበርካ፡ መሕተሚ መጽሓፍ ዝኸውን ገንዘብ  ክትረክብ  ኣዝዩ ከቢድ ኢዩ፡፡ እቶም ንዘለኒ ፋይናንስያዊ ሽግራት ተገንዚቦም ጽሑፍካ ኣብ መፈጸምትኡ ጥራይ ይብጻሕ እምበር ሓገዛትና ኣይክፍለየካን ኢዩ ብምባል ቃሎም ኣኽቢሮም ሓገዞም ዝለገሱለይ ኣዕሩኽተይ ድማ ልባዊ ምስጋና ይብጸሓዮም፡፡” ኢሉ።

ኣብ መጠረሽታ ኸኣ፡ “ነዚ ኣብ ሓቀኛ ፍጻሜታት ዝተመርኮሰ ጽሑፍ ክጽሕፍ እንከለኹ፡ ክልቲኡ ኣእጋረይ ኣብ ዘንድድ ረመጽ ረጊጸ፡ ከም ወርቂ ብሓዊ ኣብ ንፍተነሉ ተኣፋፊ መድረኽ ምህላውና ብምእማን እየ፡፡ ደጋጊመ ዘዘኻኽሮ ግን ጽሑፈይ ንባህርያትን ኣነዳድቓን ጽዩቕ ተግባራትን  ስርዓት ህግደፍ ሓቀኛ ፍጻሜታት ብምስናይ ዘቃልዕ እምበር ታሪኽ ኣይኮነን፡፡ ታሪኽ ብውልቀ ተበግሶን በይንኣውን ብዝኾነ መገዲ ክጸሓፍ ተኽእሎ ስለ ዘየለ፡፡” ክብል ጠቒሱ።