እቲ ኣብ ዝሓለፈ ሰሙን ብድምጺ ኣሰና ዝተቓለሐ ቅትለት ናይቲ ካብ ተሰነይ ኣብ ኣደርሰር ተኣሲሩ ዝነበረ ደበሳይ ንጽበ በራኺ (ዑምላ) ገንዘቡ ንምዝማት ብልኡኻት ውልቀመላኺ ኢሳይያስ ዝተገብረ ውዲት ምንባሩ ምንጭታት ኣረጋጊጾም።

ብመሰረት`ቲ ዝተረኽበ ጽጹይ ሓበሬታ፡ እቶም ልኡኻት ውልቀመላኺ ኢሳይያስ ገበኖም ንምሽፋን፡ መእሰሪኡ ዘይሕጋዊ ሸርፊ ዶላር ከምዝኾነ ኳ እንተወረዩ፡ ደበሳይ ዑምላ፡ ሓደ ካብቶም ብሕጋዊ መንገዲ ገንዘብ ኣብ ምሽራፍ ዝተዋፈሩ ኮይኑ ግብሪ እናኸፈለ ዝሰርሕ ዝነበረ እዩ።

ንሱ ኣብቲ ዝሞተሉ ዕለት ካብ ቤትማእሰርቲ ክትወጽእ ኢኻ ተባሂሉ፡ ብዓልቲ ቤቱ `ውን ሓበሬታ በጺሑዋ፡ ምስኡ ዝነበረ መግቢ ነቶም ካልኦት እሱራት ሂቡ ካብቲ ቤትማእሰርቲ ምስ ወጽአ ከምእተቐትለ እቲ ሓበሬታ የረድእ።

እቶም ገበርቲ እከይ፡ ከምስሉ ንብዓልቲ ቤቱ ኣፈርክቡ ኢሎማ ከብቅዑ፡ ድሕሪ ቁሩብ ሰዓታት ካብ ተሰነይ ናብ ኣደርሰር እናተጓዕዘት፡ ብዓል ቤትኪ ሞይቱ ሬሳ ተረከቢ ከምዝበሉዋ ዝጠቐሰ ሓበሬታ፡ ጠንቂ ቅትለት ደበሳይ ንጽበ በራኺ ዘይሕጋዊ ሸርፊ ዶላር ዘይኮነ፡ ዝምታ ገንዘብ ኤርትራውያን መቂሩዎም ከም ኣዛብእ ሃነፍነፍ ዝብሉ ዘለዉ ሸፋቱ ውልቀመላኺ ስርዓት ኢሳይያስ፡ ስስዐኦም ንምርዋይ ዝፈጸሙዎ ገበን ምዃኑ ኣገንዚቡ።

በዚ እኩይ ተግባር፡ ሓንቲ ኤርትራዊት ስድራ ዘኽቲማ ኣብ ሓዘን ትርከብ ኳ እንተላ፡ እዚ ናይ ደበሳይ ዑምላ ትራጀዲ ሓደ ኣብነት ናይቲ ምልካዊ ስርዓት ኢሳይያስ ኣብ ልዕሊ ንጹሃት ኤርትራውያን ዝፍጽሞ ዘሎ ቀጻሊ ጥፍኣት እዩ። ኣብዚ እዋን`ዚ ኤርትራውያን፡ ብሰንኪ `ቶም ንስርዓተይ ጥራይ ሓልዉለይ እምበር ድላይኩም ግበሩ፡ ተባሂሎም ብኢሳይያስ ተዋፊሮም ዘለዉ ሸፋቱ ኣባላት ጸጥታ ምዩቕ እናበሉ ውሕስነት ዘይብሉ ህይወት እዮም ዘሕልፉ ዘለዉ።