ቁጽሪ ናይቶም ብ19 መስከረም ኣብ ከተማ ሰንዓፈ ብነታጕ ዝሞቱ ሲቭል ኤርትራውያን ናብ ሸውዓተ ክብ ከም ዝበለ ምንጭታትና ካብ ኤርትራ ሓቢሮም።
ኣቐዲሙ ብመርበብ ሓበሬታ ኣሰና ከም እተገልጸ፡ ኣብ ከተማ ሰንዓፈ ናብ ቀብሪ ትጓዓዝ ዝነበረት መኪና ብነታጕ ድሕሪ ምህራማ ብኡንብኡ 5 ሰባት ክሞቱ ከለዉ እቶም ድሕሮም ዝሰዓቡ ክልተ ካብቶም ብኸቢድ ቆጺሎም ንሕክምናዊ ረዲኤት  ናብ ኣስመራ ተላኢኾም ዝነበሩ 21 ዜጋታትና እዮም። 13 ካልኦት ብፈኵስ ከምዝቖሰሉ ‘ውን ይፍለጥ።
ሽዑ ካብ ሰንዓፈ ዝበጽሓና ሓበሬታ ከምዘመልከቶ ነቲ ነታጕ መን ከምዘጻወዶ ኣይተፈልጠን። ዛጊት ሓላፍነት ዝወሰደሉ ኣካል ‘ውን የልቦን።
ደድሕሪ’ዚ ፍጻሜ፡ ስርዓት ህግደፍ ናብቲ ከባቢ ሰራዊት ብምልኣኽ ምንቅስቓስ ከምዝገበረን ጽዑቕ ተፍትሽ ከምዝተኻየደን ድሒሩ ዝምበጽሓና ሓበሬታ የረድእ።
እቲ ፈለማ ካብ ሰንዓፈ ዝበጽሓና መልእኽቲ፡ ‘ስርዓት ህግደፍ ንፖለቲካዊ ምኽንያት ክብል ባዕሉ ገይሩዎ ክኸውን ይኽእል’ዩ’ ዝብል ጥርጥራ ምስፋሩ፡ ህዝቢ ንስርዓት ህግደፍ ፈጺሙ ምእማን ስኢኑዎ ከምዘሎ ዘመልክት እዩ።
መራኸቢ ብዙሓን ስርዓት ህግደፍ ነቲ ፍርቂ መዓልቲ 19 መስከረም ኣብ ልዕሊ ህይወት ሰብ ከቢድ ጉድኣት ዘብጽሐ ዘሕዝን ፍጻሜ ከም ኣመሉ ኣጽቂጡ ከሕልፎ ኳ እንተፈተነ፡ ኣብ መርበብ ሓበሬታ ኣሰና ድሕሪ ምውጽኡ ፡ ኣብ ራብዓይ ምዓልቲ ናይቲ ፍጻሜ ትማሊ 22 መስከረም ኣብ ተሌቪዥን ከምጽኦ ተገዲዱ። እዚ ድማ እቲ ትካል ብዘይካ ምሕላው ስልጣን ስርዓት ህግደፍ ህዝባዊ ኣገልግሎትን ሓልዮት ህዝቢ ኤርትራን ከምዘይብሉ ዘመልክት እዩ።