ሎም ዘበን ክረምቲ ካብ ወጻኢ ናብ ኤርትራ ናይ ዝኣተዉ ኤርትራውያን ቁጽሪ ካብ 1991 ጀሚሩ በብዓመቱ ምስ ዝነበረ ብዝሒ በጻሕቲ ብምውድዳር፣ ካብ ማንም ግዜ ኣዝዩ ዝተሓተ ከምዝነበረ ንጸብጻባት መዓርፎ ነፈርቲ ኣስመራ ብምውካስ ምንጭታት ካብ ኣስመራ ሓቢሮም።

ቀንዲ ምኽንያት ምጕዳል በጻሕቲ ሕጽረት ኣገልግሎታትን ሃለኽትን ብሕልፊ ድማ እቲ ንቡር ስኢኑ ዘሎ ምቍራጽ ኤለትሪክ ምዃኑ ኸኣ ኣረዲኦም።

ኣብ ፈለማ ናይዚ ዓመት’ዚ ዓዲ በጺሖም ዝተመልሱ ኤርትራውያን ነቲ ደረት ዘይብሉ ምቍራጽ መብራህቲ ብምረት ከውርዩሉ ኸለዉ፣ ብዝያዳ ናይቶም ዓሚ ኽረምቲ ምስ ስድራቤቶም ኤርትራ ዝበጽሑ ‘ሞ ቀጭውጨው ኢሉዎም ዝተመልሱ ቆልዑ ተኣማኒ ምስክርነት ባህጊ መገሻ መዛኑኦም ኣብ ምጕዳል ዓቢ ግደ ከምዝነበሮ እቶም ናብቲ ጉዳይ ቅርበት ዘለዎም ምንጭታት ኣገንዚቦም።

እቶም ንደቆም ዝኸውን ቀለብ ወርሕን ናይ ሶላር መብራህትን ካብ ወጻኢ ቆጺሮም ከይዶም ክንሶም “ኣብ ኤርትራ ጸገም ዝብሃል የለን” እናበሉ ነቲ ንህዝቢ ኤርትራ ሓኒቑዎ ዘሎ ቅልውላው መነባብሮ ክሽፍኑ ዝፍትኑ፣ ህግደፍ ኣብ መዓርፎ ነፈርቲ ንዘቐብሎም ናይ እንቋዕ ደሓን መጻእኩም ዕንበባ ብዘይቃልዓለም ዝሓቝፍዎ ዝነበሩ ዕዉራት ደገፍቲ ናይቲ ምልካዊ ስርዓት ከይተረፈ፣ ነቲ ሽግር ብቐጻሊ ምኽዋሉ የሐሊሉዎም ብዓወታ ከዕልሉሉ ጀሚሮም ምህላዎም ‘ውን ኣብቲ ኩነታት ጽልዋ ነይሩዎ እዩ።

እዚ ከምዚ ኢሉ ኸሎ፣ ስርዓት ህግደፍ፣ ካብ ወጻኢ ቴለፎን ክድወለሎም ከሎ ብዛዕባ ምጥፋእ ኤለትሪክ ኣብ ኤርትራ ምዝራብ ነውሪ ምዃኑ ንስድራቤታት ብወረወረ የፈራርሕ ከምዘሎ ‘ውን ተፈሊጡ።