“ስነ-ጥበባውያን”

ኣቱም ጉዳም – ጎዳድም

ናፍቆት ኢልኩሞ – ንገሃንብ

ብጾትኩም ረሲዕኹም – ንገንዘብ

ንፍትሒ ኣልቦ – ዘይትብሉ ዓገብ

ን22 ዓመታት – ተረጊጹ ሰብ

እንታዩ? ናጽነት – ግፍዒ ብዘይ ገደብ

ህዝቢ እንዳጸነተ – ሃገር እንዳዓነየት።

ዓገብ ከይትብሉ – ኣፍኩም ተለኩቱ

ናይ ትማሊ ብጾትኩም – ሃላዋቶም ከይትሓቱ

ብዘይ ፍርዲ – ብዘይ ሕጊ እንዳሞቱ

ሃገር ተሽቑሪራ – ህዝቢ ተኸላቢቱ

ሞት ኤርትራውያን – ከለኩም በብዓይነቱ

ከም ከብቲ ዝተጥብሑ – ባሕሪ ዝተዋሕጡ

ንስድርኦም ረኣዩ – ንገጾም ጠምቱ

ናፍቖት’ዶ ይኸውን – ሐዘን ተገልቢጡ።

ኤርትራ ዘኽቲማ – ንውሑዳት ክጥዕሞም

ገዛኹም ትገድፉ – ማይ እንተጸምኣኩም

ማይ ባሕሪ አለና – ብጨው ዝበልዓኩም

ዝበሃሎ ሃገር ድዩ? – ብሓቂ ናፊቑኩም

ናይ ኣእምሮ ባርነት ድዩ? – ጸቒጡ ደቑሱኩም

ሐደን ክልተን’ኮ – ከም ሰብኩም ምተማሃርኩም

ልብኹም እንተተቕንዑ – ንሕልናኹም ተገዚእኹም

ይኣክል ምበልኩሞ – ንስሱዕ መራሒኹም።

መንዶ ንጽባሕ – ብቖጸራ ይሕዛ

ሞት እንተደልያ – ትወስድ ከም ዋዛ

ደቂስካ ተንሲእኻ – ንቑሩብ ኣፍዚዛ

ህግደፍ ግን ጉዳም – ን22 ዓመት ኣደንዚዛ

ብጋይላ ኣስኪራ – ሓሶታት ሚሂዛ

ንስልጣን ረብሓኣ – ትእክብ ብዘይቃንዛ

ብህይወቱ ንህዝቢ – ኣብ ቃሬዛ ኣደቂሳ

ጅግና ህዝቢ – ዝነበረ ኣንበሳ

ምስሎም መሲላ – ተንኮላት ፊሒሳ

ዘይውዳእ መብጽዓ – ይፍኑው ምልሓሳ

ሓታቲ ሲኢና – ሰባቢሩ ዘልምሳ።

ንናይ ሓሶት ምምሃዝ – ንቁጽሪ ፓቴንት

ትዕድል ንዓያሹ – ንተበለጽቲ ብድሌት

መንከ’ሎ ዘርክባ – ጳጳስ ናይ ጥልመት

ህግደፍ መሰረታ – ንሃገር ዕንወት

ኤርትራ ቃሪዳ – ሓርቢትዋ ልምዓት

መንእስያት ገይራቶም – ክቃመቱ ንስደት

መጻኢ ወለዶ ሃብቲ – ብምደብ ክጸንት።

እዙይ እንተኾይኑ – ዘላዕል ናፍቖት

ህዝቢ እንዳጸነተ – ሃገር እንዳዓነየት

ካብ ብርሃን ምዕባለ – ዝናፍቕ ዳልሀመት

ካብ በሉ ስነ-ጥበባውያን – ይኹነና ክልተ ሞት።

ከም ልቢ ኩላሊት – ኣይሽየጥን ሓሞት

እምበር ኣይምተሳእነን – ካብቶም ትሕቲ መሬት

ኣብ ስናይ ዝተሓርዱ – ብሰንኪ ሓርነት

ካብቶም በጃ ነጻነት – ዝተሰውኡ ብጾት

ይመስለኒ ነይሩ – ንዓታቶም ዝግብኦ ናፍቖት

ዓገብ ንናይ ሎሚ ህግደፍ – መናሃርያ ባርነት።

ሰለሞን ብርሃነ ሠንጋል

“ሕልና 09-28-2013”