ብስም ኩሉ ደላይ ሰላመን ደሞክራሰያዊ ለውጥን ኣገናዕ ምንቅስቓስ መናእሰያት  E.Y.G.M. ኣመሪካ፡፡እቲ ኣብ ልዕሊ ማፍያዊ  መሪሕነት ህ.ግ. ደ.ፍ. ኢሳይያስን መሰልቱን ዝወሰድኩሞ ተባዕ ተበግሶ፡ ውጹዓት ወገናት ጸባ ዘስተየን ባብ ለውጢ ምሉእ ብምሉእ ንኽርሓው ንዝተታኸስና ዘበራበረን እዋናዊ ጉዳያትና ኢዩ፡፡ኢሳይያስን መሳስይቱን ድሕሪ ደጊም ገጽ ኒውዮርክ ኣይክርእዩን ኢዮም፡፡ ዘይከም ሓሶታዊ ኣተኣታትወኦም ወጮ ተጎመጊሞም ኣድጊ ተወጢሖም ከም ዝምለሱ ኮይኖም ኣለዉ፡፡ ኣብ ዘይ ውጻእ ጎደናታት ሽኩሽኳ ተሸሚሙ ዝርከብ ህ.ግ.ደ.ፍ. ኣብ ቅድሚ ህዝብን ማሕበረሰብ ዓለምን  ጉልባቡ ቀሊዕኩም ዕርቃኑ ኣውጺእኩሞ ኢኹም፡፡ ደጊመ ብስም ኩሉ ደላይ ደሞከራስያዊ  ለውጢ ኣበጀኹም ምንቅስቓስ መናእሰያት ኣመሪካ፡፡ ለውጢ ብውሑዳት ብውፉያት ብተባዓት ኢዩ ዝብገስ፡፡ ከምቲ ንጣር ቁልዒ ንሰፋሕትን ዑሙራትን ጫካታት እተባርዕን እትሁምኽን ሰዓብቲ ለውጢ ውን ዓሰርተታት ኣማኢት ኣሽሓት ኢዮም፡፡ ወዲ ሰብ ብባህሪኡ ደላይ ለውጥን  ናጽነትን ስለ ዝኾነ፡፡ድሮ ውን ኣዝዮም ዓበይቲ ደሞክራስያውያን ምንቅስቓሳት መናእሰያት ኣበየ ኩርንዑ ክፍጠሩን ክተኣኻኸቡን ጀሚሮመ ኣለዉ፡፡ ነቲ ኣብ ጽምዋ በረኻታት ሳሕል ንቑሓት ንጹሃን ኤርትራውያን ተጋደልቲ እናበለዐ ዝመጸ፡ ኣብዚ 20 ዓመታት ነጻነት ብእዉጅ መልክዕ ብተመከቱለይ ዝደጋገሞ በዓል ደም ኩሉ ህዝቢ ኤርትራ ዝኾነ ሓለቓ ሸፋቱ ኦሜርታ ኢሳይያስ ምሕረት ኣይግበኦን ኢዩ፡፡

ኣብ ወርሒ ሓምለ ተጻወቲ ኩዕሶ እግሪ ኤርትራውያን ኣብ ታንዛንያ ኢዶም ዝሃቡሉ ዕለታት ኢዩ፡፡ዓሰርተው ሰለስተ ኣባላት ጋንታ ቀይሕ ባሕሪ ናብ ሃገርና ፍጹም ኣይንምለስን ብምባል ኣውያቶም ንማሕበረ ሰብ ዓለም ዘቃልሑሉ ግዜ፡፡ሹዑ ስለምንታይ? ተባሂሎም ምስ ተሓተቱ ‹‹ኤርትራ እታ ካብ ዓለም ዝዓበየት ቤት ማሕቡስ ኢያ፡፡ ብዙሓት  ቤተሰብና፡ መታዓብይትና፡መማህርትና፡ ኣረ ኩሉ ንጹህ ዜጋ ብኣልማማ ዝተኣሰረላ ገሃነም ኢያ፡፡››ብምባል ብቕጽበት ዑቕባ ክወሃቦም ተማሒጺኖም፡፡ብርግጽ ሓቆም ኢዮም፡፡ ኣብታ ንኣስታት 20 ዓመታት ብዘይ ቅዋምን ግዝኣተ ሕግን ብሃሳሰ ለባም ትጓዓዝ ዘላ ሃገርና ብስርዓት ህ.ግ.ደ.ፍ. መን ዘይተኣሰረን ዘይተጨፍጨፈን፡መን ብሕታዊ ናጽነቱን መሰላቱን ዘይተመንዘዐ፡፡መን ልሳኑ ብጽኑዕ ተቖሊፉ አእዳዉ ዘይተኣስረ፡፡መን ኢሳይያስን ህ.ግ.ደ.ፍ.ን ላዕለዎት ኣዘዝቲ ሰራዊተን ኣብ ዝደልይዎን ኣብ ዘርብሖምን ከም ጊልያ ክሰርሕ ዘይተስገደደ፡፡ቶታሊተረያን መሪሕነት ህ.ግ.ደ.ፍ. ንኹሉ ፖለቲካውን ቁጠባውን ማሕበራውን መሰላትና ገቢትዎ ኢዩ፡፡ንኹቡር ሂወት ዜጋታትና ከይተረፈ ከም ግላዊ ንብረቱ ወሪስዎ ኢዩ፡፡ክትዛረብ ክትጽሕፍ ኣይትኽእል፡ ክትእከብ ክትቃወም ኣይትኽእል፡ጉቡኣትካ ፈጺምካ መሰላትካ ከትሓትት ኣይትኽእል፡ ክትምረጽ ክትመርጽ፡ኣይፋል ዓገብ ከትብል  ኩሉ ሕሩም ኢዩ፡፡ከም ዝዓወረ ገመል ብሕሻል ተወጢጥካ ህ.ግ.ደ.ፍ. ናብ ዝበለካ ምኻድን ምጽዳፍን ጥራይ ኢያ፡፡ሽዑ ሓደ በቲ ጉዳይ ሚሒር ዘተሓሳሰቦ ሪፖርተር ‹‹ኤርትራ  ዜጋታታ ተገዲዶም ክርስዑዋ ዝተቓረበት ሃገር›› ክብል ልቢ ለባማት ዝተንከፈ ጽሑፍ ኣቕሪቡ ነይሩ፡፡ ብዙሓት ንኣበሃህልኡ ብሰንኮፍ ዝተረድኡ ኣሕዋት ተጋጊኻ ኤርትራን ኤርትራውያንን ኣይትፈልጦምን ኢኻ፡፡ክብሉ ግብረ መለሲ ሂቦሞ፡፡ የግዳስ እቲ ጸሓፊ ካብ ክውንንት ኤርትራን ኤርትራውያንን ወጻኢ ኣይነበረን ኣይጸሓፈን ውን፡፡

ብዘይ ቀልዓለም ኤርትራውያን ሃገርና ንፈቱ ጥራይ ዘይኮነ ሕልፊ ውን ኣለና፡፡ ኣብ ዝኾነ ይኹን ግዜን ጽንኩር  ኩነትን ውን ነታ በኹቡር መስዋእቲ ዝተገዘምናያ ሃገርና ኤረና ኣይክንርስዓን ኢና፡፡እንተኾነ ብሰንኪ ኢሰብኣዊ መሰክሕ ተግባራት ስርዓት ህ.ግ.ደ.ፍ. ተገዲድና ካብቲ ቁኑዕ ሃገራዊ ጉዳያትና ተጓኒና ተኣሊና ዝጸናሕና ሒደት ኣይኮናን፡፡እቲ ምንታይ  መደንጾ ኣነዋሪ ተግባራት  እዚ ገባቲ ስርዓት ኣሽንኳይ ኣበፍንጭኡ ኣብ ውሽጢ ዓዲ ርሑቕ ስግር ባሕሪ ስደት ኮይና ውን ክም ንሹቕረርን ከም ንርዕድን ገይሩና ጸኒሑ ኢዩ፡፡ብደሆ ኣንጻር ግጉይ ኣረኣእያናን ኣተሓሳስባናን ክንብል ግዜ ውሲዱልና፡፡ ኢሳይያስ ኣብ ውሽጢ ዓዲ  ብቐረባ ዝረኽቦም ዜጋታትና ጥራይ ዘይኮነ ኣደስኪሉ ንዓና ውን ብማዕዶ ብወንጭፍ  ኣረኻኺቡልና ጸኒሑ ኣሎ፡፡ ሓቢርና ከይንቃለሶ ፡ ምልኪ ውሑዳን ይፍረስ ግዝኣተ ሕጊ ይንገስ ብዓውታ ከይነቃልሕን ዕድመ ስለጣኑ ንምንዋሕ ኣዝዮም ተኣፈፍቲ ፍጹም ከተኣማምኑና ዘይክእሉ ፈላለይቲ መርዝታት ነስኒሱልና፡፡ኣብ ነፍሲ ወከፍ መድርኽ ንዝተበገሱ ናይ ለውጢ ምንቅስቓሳት ንህዝቢ ከሰንብዶን ከርሕቖን ዝኽእል ቅጽል ኣስማት እናተጠቐመ ናህርታቱ ዓቂቡ ንኸይቅጽል ሓሊኽዎ ጸኒሑ ኢዩ፡፡ልኡኻት ወያነ፡ ማሕበር ኣንድነት፡ሃሱሳት አመሪካ፡ምንቅስቓስ ናይ ሓደ ኣውራጃ፡ ብሄር፡ ሃይማኖት——–ወዘተ፡፡ተወጺዐ ዝበለ ኣካል እቲ ይኹን እቲ ብዘየገድስ ኣውያቱ ከስምዕ እንታዩ ወጽዑኡ በቲ ሓቀኛ ዲሞከራስያዊ መገዲ ጉዳያቱ ክሓትት ሓጥያት ኣይኮነን፡፡ መብጽዓ እቶም ልዕሊ 65 ሽሕ ሰማእቲ ንናጽነት መሬት ጥራይ ዘይኮነ ማሕበራዊ ፍትሒ ዝነገሳ፡መሰላት ህዝቢ ዝኽበረላ፡ ነጻ ህዝባዊ ደሞከራስያዊ መንግስቲ ኣብ  ኤርትራ ምትካል ኢዩ፡፡

ዕሙታት እምነታት ልዕሊ እቲ ኣብ ኣደባባይ ዝወጸ ርካሽ ሓሶት ንሓቂ ከቢድ ሃስያ ኢዩ፡፡ዕፉን ብሽፉኑ ኣብ ከምዚ ዓይነት እምነት ዝኣመኑ እናረኣዩ ዝዓወሩ እናሰመዑ ዝጸመሙ ኣቦታት ፡ኣዴታት፡ ኣሕዋት፡መተዓብይቲ፡ መማህርቲ፡ ፡ ከም ዘለዉና ዝከሓድ ኣይኮነን፡፡ ሓደ ኣብነት ጥራይ እኹል ኢዩ፡፡ ኣብ ከተማ ኒውዮርክ (Manhattan center)  ዝተራኣየ ኣካይዳ ዘሕዝን ጥራይ ዘይኮነ በሰላታቱ ውን ዘንተእለት ዘይሃስስ ኢዩ፡፡ ኣብዛ ንነብረላ ዓለም ተራእዩን ተሰሚዑን ዘይፈልጥ ክልተ ካብ ሚእቲ (2 )ዘይከፈለ ሬሳታት ኣብ ዲያስፖራ ዝቕመጡ ዜጋታተና ኣብ ገዛእ ሃገሮምን ዓዶምን ንኸይቅበሩ ዝኽልክልን ዝግዝትን ስርዓት ክንሱ እናረአና፡ ዓገብ ኣብከንዲ ምባል ዓይንና ብጸሊም ጨርቂ ዓሚትናዮ፡፡ኣቦኦምን ኣዲኦምን ንስለ ነጻነት ዝኸፈሉ ዘኽታማት ደቂ ስዉኣት ዝኣስርን ዝቐትልን ፍንፉን ንዐዓና ዘይከውን መላኺ ስርዓት፡  ዝበኣሰ ነገራት ደጋጊሙ ንኽፍጽም ኣጣቒዕናሉ፡፡ ካብ ማእሰርትን ግፋታትን ህ.ግ.ደ.ፍ. ሪሕቕና ውግእን ወረ ውግእን ኣብዘይስማዓሉ ርሑቕ ስደት ኣብ ዲያስፖራ ኮይና መቕተሊ ኣሕዋትናን ኣሓትናን ግነዖ ዶላራት ለጊስናሉ፡፡ ዜጋታትና ሃገር ፍጹም እተንድድ ረመጽ ኮይናቶም ክትኣምኖ ውን ዘጸግም ገንዘብ ከፊሎም ንጠያይቲ እዚ ጽዩእ ስርዓት ፈንጢሶም ብጅምላ ንዝተሰደዱ ‹‹ቱሪስት›› ኢዮም ንዝበለ ገባቲ ኢሳይያስ ዓገብ ኢልና ክንውግዞ ስለ ዘይከኣልና፡፡ህዝቢ ኤርትራ ኣብ ዝሓለፉ ገዛእቲ ውን ዘይረኣዮ ብቑጽሪ ሓንቲ ባኒ ንመዓልቲ ተወሲንሉ ብመቑነን እናተዓደለ ‹‹ሓንቂቑ›› ጥሜት የብሉን ንዝበለ ትዕቢተኛ ኢሳይያስ ፎእ ኢልና ክንክዕቦ ስለ ዘይከኣልና፡፡ኤርትራውያን መናእሰያት ብዓሰርተታት ኣማኢት ኣብ ማእከላይ ባሕሪ እናጠሓሉ፡ ኣብ ምድረበዳታት ሲናይ ናውቲ ከብዶም ብኣስገዳድ ተዘሪፉም ሬሳታቶም ተደርብዩ ንኣሞራ ሰማይ እናኾነ እቲ ሓቀኛ ኤርትራዊ ሕልናና ንውሽጣዊ ስሚዒትና ዓፊኑ ስለ ዝሓበኦ፡፡ ኣመና ኣመና በዚሑ፡፡ልቦናና ናብ ዕሽነት፡ ትዕግስትና ናብ ፍርህን ልኡምነትን ተቐይሩ፡፡ስቕታና ካብ ልክዕ ንላዕሊ ዶብ ሓሊፍዎ፡፡ነዚ ፍጹም ክጽወርን ከስገርን ዘይክእል ኣዝዩ ከቢድ ጉዳይ ተዓዚቡን ኣጽኒዑን ከኣ ኢዩ እቲ ሪፖርተር‹‹ኤርትራ ዜጋታታ ተገዲዶም ክርስዕዋ ዝተቃረበት ሃገር›› ኢሉ ንኽጽሕፍ ዝተደረኸ፡፡ኣብ ግዜ ቀውዒ ርግበ ሰለሙን ተመሲሉ ኣብ ቤትና ዝኣተወ ርጉም ተመን ሓግዩ ስለ ዝኸረመ ገቢሉ ንኹልና ከውሕጥን ከሳድደናን ኪኢሉ ኢዩ፡፡ይኣከል! ሎሚ ከም ደርሆ በምዑት ደቅና ምጽዋት የብቅዕ፡፡ ዝረሰነ ማሕረሻ ነቲ ሃህ ዝበለ ኣፉ ንምለሰሉ፡፡

ህ.ግ.ደ.ፍ. ፍጹም ኣብቂዑ ኢዩ፡፡ ክሰተባህለሎም ኣብ ዘይክእል ጎደናታት ሽኩሹኳ’ዩ ተሸሚሙ ዘሎ፡፡ ከምቲ ቀዲመ ዝበልኩዎ ሎሚ ኣይገብሮምን’ዩ ኣይፍጽሞምን ኢዩ ዝበሃሉ ነገራት የለዉን፡፡ኣብ መጠረሽታ ሰዓታት በጺሖም ነፍሲ-ሄር ተባሂሎም ናብቲ ሲኦላዊ መቓብሮም የምርሑ ምህላዎም ኣይተኸወሎምን፡፡ኩሉ ዝገብርዎ ዘለዉ ከም ፍርገጥገጥ ኣውደኣመት ወጦጦ ኢዩ፡፡ስሑል ካራ ዝጨበጠ ኣእዳው ውጹዓት ካብ ዝኾነ ይኹን ግዜ ንላዕሊ ኣብ ክሳዶም ኣንጸላልዩ ኣሎ፡፡ ከቢድ ጸቕጥን ተነጽሎ ካብ ማሕበረሰብ ዓለምን ውን ኣብ ነውጺ ከምዝኣትዉ ገይርዎም ኣሎ፡፡ ኣብዚ ናይ ቀቢጸ ተስፋ ሰዓቶም ነቶም ሰብ እናተቐትለ ሓሲኹም፡ እናተኣስረ፡ቦግ ኣቢልኩም ዝበሉ ዕሙት እምነት ዝሓዙ ወገናትና ደም ክጽይቖም መዃኑ ክንዝንግዕ የብልናን፡፡ ከመቲ ንሓንቲ እምንቲ ከልቡ መንፍዓታ ንምግላጽ፡ወኻርያ ትሕዝ፡ነብሪ፡ ኣንበሳ፡ቶኽላ፡ኩሉ ትሕዝ ፡፡ ኢሉ ብኣጋንኖ ምስተዛረበ‹‹ፋሕ-ኢላ››ምስበሉ ብዘይ ስክፍታ ፋሕ ኢላ ውን ትሕዝ ኢያ ዝበሎም፡ ህ.ግ.ደ.ፍ. ፋሕ ኢላ ኣብ ምሓዝዩ ዝርከብ ዘሎ፡፡ ነቶም ከም ጸያቒ ማዕጺድ ንዝሸወተ ፍረ ከርግፉን ከጥፉኡን ካበየ ከተማታት ኣመሪካ ናብ ከተማ ኒውዮርክ ኣደራሽ ማንሃተን ሰንተር ተመሪሖም ዝመጹ ላኼማ ኤርትራዊ ሕልናኹም ነቲ ሓቀኛ ውሽጣዊ ስሚዕታትኩም ይርኣዮ ክብሎም እደሊ፡፡ እታ ኣቡኣን ኣዲኣን ክሕየሩ እንከለዉ ሕንጢት ጓል ኣርባዕተ ዓመት ዝነበረት ማኣዛ ጴጥሮስ ሰለሙን ወያነ ወይ ውን ማሕበር ኣንድነት ኣይኮንትን፡፡ ወዲ ስዉእ ሓርበኛ ጀርማኖ ናቲ ኢትዮጲያዊ ወይ ውን ሃሱስ መንግስቲ ኣመሪካ ኣይኮነን፡፡

መበገሲ ኣርእስትና ስርዓት ህ.ግ.ደ.ፍ. ኣብ ጎድና ሽኲሹኳ ምዃኑ ኣይረሳዕኩን፡፡የግዳስ ብዜካ እቶም እናፈለጡ ዝሞቱ ገለ ወገናትና ብሰንኪ ዕሙት እምነት ኣብቲ ናይ ለኻኺምካ ጥፋእ ጎደና ይሽመሙ ስለ ዘለዉ፡ ኣንፈቶም ንምፍላጥ ኢዩ፡፡እምነት ከቢድ እዩ፡፡ልዕሊ ምእማን ግን ከቢድ ጥራይ ዘይኮነ ሓደገኛ ውን እዩ፡፡ጓል መገዲ ከይንሕዝ እምበር እስኪ ሐንቲ ንእሽቶ ጆክ ካብ ዕላላት ገድሊ ብዛዕባ እምነት ከካፍለኩም፡፡ተጋዳላይ ንመሪሕነት ውድብ ህ.ግ. ሕሉፍ እምነትን ኣምልኾን ኢዩ ነይርዎ፡፡ ነፍሱ ምሉእ ብምሉእ ረሲዑ ላዕለዎት ኣዘዝቱ ብሓለፋ ዘቕቢቦም ክፉእ እናሰርሑ ኣቶኪሩ እናጠመቶም የስተባህለሎም አይነበረን፡፡ ንሱ ቦጅቦጅ ወዲ ዓኸር እናተዓንገለ መዓልታዊ ጤለ በጊዕ ክሐርዱ ግቡእ እምበር ከም በለጽን ሓለፋን ኣይረኣዮን፡፡ህ.ግ. ክሳብ ክንድዚ ኣእምሩኡ ነቲ ውድብ ዝለገሰ ፍጡር’ዩ ፈጢሩ፡፡ ኣብ መፋርቕ ሰማንያታት ተጋዳላይ መሃይምነት ንምጥፋእ ብካርቶን ናይ ጸባ ሳልሳይ ዓለም ዝማሃረሉ ዝነበረ ሕሱም እዋን’ዩ፡፡ብመሰረት ውድብ ህ.ግ. ዘዳለዎ ቀዳማይ ካልኣይ ሳልሳይ መጽሓፍ ንዓበይቲ፡፡መምህር ንተማሃሮ ቀዳማይ ዓመት ምድማር እንታይ ምዃኑ የላልዮም ነበረ፡፡ብስእልን ጭቡጣት ነገራትን ኣረዲኡ ምስ ወደአ ናብቲ ናይ ኣሃዝ ቁጽርታት ኣተወ፡፡ሽዑ 1+2=3 3+2=5 3+5=8 ኢሉ እናቐጸለ ሐደ ካብ ተማሀሮ ተገደልቲ ኣብዚኣ ብምባል ኮሎፎ፡፡ስማዕ ህ.ግ. ኣብ ክውንነትን ውድዓውነትን እምበር ብይኸውን ኣይተጓዕዘን፡፡ሕጂ ድማ እታ ይኸውን ትብል ቃል ኣጥፋኣያ፡፡1+2=3 ዘይኾነስ 1+2 5 አዩ በል በሎ ይባሃል፡፡እቲ ተጋዳላይ ብኡ ኣቢላ ይኸውን ትብል  ሳጓ ለገበቶ፡፡ሽዑ ተጋዳላይ ብሕሉፍ እምነት ኣዒንቱ ብገዛእ ኢዱ ከንቁር ከሎ ልቡ ብፍቕሪ ሃገር ነዲዱ ንናጽነት ክቱር ባህጊ ስለ ዝነበሮ ኢዩ፡፡እንተ እዚ ናይ ሎሚ ዕሙት ዕውር እምነት ግን ንኽትጸውየሉ ውን ዘሰክፍ ጥራይ ዘይኮነ ሕልናኻ ብዋጋ ክቡር ሂወት ወገናትካ ምሻጥ እዩ፡፡

ማፍያዊ መራሒ ህ.ግ.ደ.ፍ. ኢሳይያስ ኣብ ኣዳራሽ ማንሃንተን ሰንተር ‹‹ዓሰርተ ዓመት እኳ እንተተፈላለና ልበይ ወትሩ ምሳኹም  ኢያ ነይራ›› ክብል ተሰሚዑ’ዩ፡፡ወሲኹ ውን ካብ ኣኼባ ሕቡራት ሃገራት ንላዕሊ ዘገድስ ምስቶም ተመሪሖም ዝመጹ ላኼማ ምዃኑ ኣተንቢሁ’ዩ፡፡ ቅኔ ኣዘራርባ ኢሳይያስ ቁሪ ናበይ ደሊኻ ምዃኑ ክዝንጋዕ ኣይግባኦን፡፡እቲ ብጽኑዕ ተታሒዙ ን20 ዓመታት ዝድህኮ ዘሎ ህዝብና ናብ ዝኸዶ የብሉን ማለቱ ኢዩ፡፡ህግደፍ ካብ ዝኾነ ይኩን ግዜ ንላዕሊ ሎሚ ኣብ ክወጾ ዘይክእል ረግረግ ዓዘቕቲ ተሸሚሙ ኢዩ፡፡ እታ ንኢሳይያስ ተሪፋቶ ዝነበረት ሓንቲ ንእሽቶ ፈቃቕ ብመገዲ ኣኼባ ሕቡራት ሃገራት ምስቶም ኣብ ኣመሪካ ዝርከቡ ዕሙት እምነት ዝጎልበቦም ደገፍትን ላኼማን ተወላወልትን ምርኻብ ጥራይ ኢያ ነይራ፡፡ነዚ ረቂቕ ድራማዊ ሽርሒ ንምስራሕ ድማ ኢሳይያስ ህዝቢ ንምድንጋር ቀዲሙ ናብ ገለ ሃገራት ኣፍሪቃ ንምብጻሕ’ዩ ወሲኑ፡፡ ብመሰረት መደናገሪ ድራማታቱ ሃገረ ኡጋንዳን ጊኒን በጺሑ ኢዩ፡፡ እዚ ምብጻሕ እዚ ከም ሓደ ታሪኻዊ ዓወት ተቖጺሩ ኣብ ማዕከናት ዜናን ሓበሬታን እቲ ስርዓት ከም ዝዓበደ ተጋዊሑ፡፡እንቶኾነ እቲ ዝተገብረ ምብጻሕን ዑደትን ዕውት ዘይኮነ ፍሹል ኢዩ ነይሩ፡፡ዑደት ንሃገረ ኡጋንዳ ነቲ ብመገዲ በይነ መንግስታዊ ንልምዓት  IGAD  ኣብ ልዕሊ እቲ ስርዓት ዳግማይ ከቢድ እገዳ ዝጽውዕ ሓሳብ ንምስራዝ ኢዩ፡፡ብተመሳሳሊ ዑደት ናብ ሃገረ ጊኒ ውን ግዝያዊት ኣቦ መንበር ሕብረት ኣፍሪቃ ብምዃና ኣብ ኣኼባ ሕቡራት ሃገራት ኒውዮርክ ንዝፍጠር ጸቕጢ ንምብራድ ዝዓለመ ኢዩ፡፡ኩሉ እዚ ፍሹል ፈተነታት ፍረ ይኹን ዓወት ኣይረተረኽቦን፡፡ብአንጻሩኳ ድኣ እታ ኣብ ክሳድ ኢሳይያስ ዝአተወት መሸንቖቓ ክትጸብብ ኢያ ተራእያ፡፡ኢሳይያስ ምስ ላዕለዎት ሰበስልጣን መንግቲ ኣመሪካ ንኽራኸብ እግዚሄር የርእኹም ኣምላክ የመልክትኩም ኢሉ ንኽልምን ዘቕረቦ ሓሳብ ምሉእ ብምሉእ ተነጺጉ  ኢዩ፡፡ንሱ ጥራይ ዘይኮነ ናብ ከተማ ዋሽንግንተን ንኽበጽሕ ዝለመኖ ልመና ውን እርዳእካ ዘይኮነስ መልሲ ውን ኣይተዋህቦን፡፡ካብዚ ዝኸፍእ ፖለቲካዊ ውርደትን ሕፍረትን የለን፡፡ ኢሳይያስ ቀዲሙ ውን ናይ ፖሊሲ ጽገናታት ክገብር ምዃኑን ምስ መንግስቲ ዋሽንግተን ዲፕሎማስያዊ ዝምድናታት ከማሐይሽ ንመንግስቲ ኢትዮጵያ ዓገብ በሉልና ዝብልን ስቱር ደብዳቤ ናብ ባራክ ኦባማ ሰዲዱ’ዩ፡፡ነዚ ዝፈሸለ ውዲታቱ ንምሕባእ’ዩ ድማ ወግሐ ጸብሐ ነቲ ጭውነት ዝጎደሎ አኼባ ማንሃተን ሰንተር ኣብ ተለቪጅን ኤርትራ ቲቪ ኤረ ከም ሓደ ዝተባረኸ ታቦት ከርእዮ ዝፍትን ዘሎ፡፡

ኦ ክቡር ህዝቢ ኤርትራ ናይ ዝብኢ ዕርክነት ክሳብ ዝጠምዮ ጥራይ እዩ፡፡እቲ ሓደ ጊዜ መገዲ ጥፍኣት ዝሓዘ መሪሕነት ስርዓት ህ.ገ.ደ.ፍ. ካልእ መንገዲ ፍጹም ቁኑዕ ኣይመስሎን እዩ፡፡ ወዲናያ ዘለና መነጽር ነቲ ብደም ንጹሃን ዜጋታትና ዝጀብጀበ ደመኛና ዝተቐደሰ መልአኽ ገይራ ከይተርእየና ወግሐ ጸብሐ ክንውልውላን ረስሐታ ክንአልዮን አለና፡፡ሓንሳብ ብደም ንጹሃን ወገናትና ኢዱ ዝጠልቀየ ቶታሊተሪያን መሪሕነት ስትዓት ህ.ገ.ደ.ፍ. ዋላ ውን ኣብ ኣሲድ እንተተዘፍዘፈ ማክያታቱ ክጸርን ክእለይን አይክእልን ኢዩ፡፡ ኢሳይያስ ዕድመ ልከዑ ህዝብና ንኽጭፍጭፍ ዓው ብዝበለ ድምጺ ብኮንትራት ዝሰርሕ ሰብ ኣይኮንኩን ክብል ቁርጹነጊሩና ኣሎ፡፡ኢሳይያስ ካብቲ ንሃገረ ጀርመን ንጥፍኣት ዝመረሐ ንማሕበረሰብ ዓለም ጠንቂ ዕግርግርን ህልቂትን ዝኾነ አዶልፍ ሂትለር ዝፈልዮ እንትሃለወ ዜጋታትና ኣብ ፎርኖ ምጥባስ ስለ ዘይጀመረ ጥራይ ኢዩ፡፡ኣብ ባህርያት ምልኮም ግን  ሓደ ካብቲ ካልኣይ ፍልልይ የብሎምን፡፡  ሳልሳይን መወዳእታን ክፋል ናይ’ዚ ጽሑፍ’ዚ ኣብዝቕጽል፡፡ ቅድሚኡ ግን ሃገራዊ ኮምሽን ንዲሞክራስያዊ ለውጢ ንምነዋሕ ግዜ ዝወሰዶ ስጉምቲ ብልቢ ኩሉ ደላይ ለውጢ ከመስግኖ እደሊ፡፡ትርግታ ህዝቢ ሰሚዑ ተባዕ ስጉምቲ ብምውሳዱ ልቦና ዝመለኦ ውሑሉል ስራሕ ኢዩ፡፡ብዙሓት በሲሎም ክወጹ ዝግበኦም ጉዳያት ስለ ዘለዉ ዝነኣድ ቁቡል ውሳነ ኢዩ፡፡ብተወሳኺ ሃገራዊ ኮምሽን ንደሞክራስያዊ ለውጢ ብዕቱብ ከስተባህለሎም ዘለዎም ጉዳያት ከቢድ ቁጽጽርን ውሳነን ክግብረሎም ከዘኻኽር እደሊ፡፡ንረብሓ ውልቀ ሰባት ተባሂሉ ዝግበር ዘሎ ምትኹታኻት ብንጹር መገዲ ብርዕና ከነልዕል ምዃና ምፍላጥ ከድሊ ኢዩ፡፡

ዓወት ንሃገራዊ ጉባኤ

ዘልኣለማዊ ዝኽሪ ንሰማእታትና
ሚኪኤል እምባየ (ኣራንቺ)
Aranchi03 yahoo.com