ኣብ ጉባኤ ካብ ዝተኣከቡ ጳጳሳት ሓደ ስሞም ዝዓቀብናዮም፥ “ንሕና እዚ ኩሉ ጸገምን ፈተናን ዝበጽሓና ዘሎ፥ ቤተ ክርስትያን ኣብ ክልተ ተመቐላ ዘላ ኣብ ሓደ ንምጥርናፋ፥ እታ እንኮ ፍታሕ ምስ ኣቡነ እንጦንዮስ ተዓሪቕና፥ እቲ ወጊዞምና ዘለዉ ውግዘት ኣልዒሎም ኣብ ንቡር ቦታኦም መሊስና፥ ኣገልግሎትና ምቕጻል እዩ። ሕጂ ምኽንያት ኣሎና። ኣባ ዲዮስቆሮስ ሓሚሞም ከይሞቱ ኣተዓሪቕና፥ ናብ ሰላም እንተዘይ ተመሊስና፥ ካልእ ፍታሕ የብልናን። ካብዚ ለይትን መዓልትን ብጥርዓንን ብጽሑፋትን ሰላም ስኢናሉ ዘሎና ድማ ነዕርፍ። እንድዒ ንኣኻትኩም ኣይፈልጥን፥ ንኣይ ግን መስቀለይ ዘይሳለሙ፥ ክርእዩኒ ከለዉ ገጾም ዝኽውሉ ሊቃውንቲ ቤተ ክርስትያን ከይተረፈ፥ የጋጥሙኒ ኣለዉ። ከምዚ ተወጋጊዝናን ተፈላሊናን እንተ ሞትና ኣይ ብታሪኽ ክብሪ ኣይ ብሰማይ ጽድቂ ንምንታይ ኢና? ሕጂኸ ኣቡነ ድዮስቁሮስ እንተ ሞቱ ካልእ ክንሸይም ዲና እዚ ውግዘት ከም ዘለዎ ከሎ? ኢሎም ብጓህን ሕርቃንን ድሕሪ ምዝራቦም፥ ንጽባሒቱ ሓላፊ ሃይማኖታዊ ጉዳያት ኮሎኔል ሰመረ በይን፥ ነዞም ሽማግለታት ኣቦታት ጳጳሳት ኣኪቡ ኣጉባኦቢዕሎምን ኣፈራሪህዎምን። “ድሕሪ ሕጂ ብዛዕባ ኣቡነ እንጦንዮስ ምስ ዝለዓል ተሓተቲ ንስኻትኩም ኢኹም። ኩልኹም ኣብዚኣ ዘሎኹም ድማ ኣቡነ እንጦንዮስ ንኽወርዱ ፈሪምኩም ኢኹም። ድሕሪ ዓሰርተ ዓመት ነዚ ኣልዒልኩም ምዝራብኩም፥ ብከቢድ ገበን ዘሕትተኩም ምዃኑ ክትፈልጡ ኣሎኩም። ክብል ምስ መጠንቀቕታን መፈራርህን ቃላት ኣዚዝዎም ኣሎ። ነቲ ኣብ ጉባኤ ዝተዘርበ ቃላት ዘበጻጽሐ፥ ካብቶም ብጸሓፍቲ ኢሎም መዲቦም ዘእተውዎም ሰለይቲ ምዃኑ እዩ ዝውረ። ኣብ ውሽጢ ኣኼባ ጳጳሳት ዝግበር ጉዳይ ከይወዓለት ከይሓደረት እያ ኣብ ቤት ጽሕፈት ህግደፍ ትበጽሕ።

ኣብ  ምወዳእታ ወርሒ ታሕሳስ 2014 ፓትርያርክ እስክንድርያ ፖፕ ቴድሮስ 2ይ፥ ኣቡነ እንጦንዮስ ኣብ ቦታኦም ክምለሱን እቲ ውግዘት ከልዕልዎን፥ ንጳጳሳትን ንመራሒ ህግደፍ ኢሳያስ ኣፈወርቂ ድሕሪ ምጽሓፎም፥ እቲ ስርዓት  መርድእ ኮይንዎ እዩ።  ግብጺ ኣብ ጉዳይ ሃገርና ትኣትወና ኣላ፥ ክብል ፖለቲካዊ መልክዕ ከትሕዞ ድማ ለይትን መዓልትን ህርድግ ይብል ኣሎ። ብፍላይ ኣብ ወጻኢ ዝርከቡ ሰዓብቲ እምነት ኦርቶዶክስ ተዋህዶ ቤተ ክርስትያን ብግልጺ ኣብ ጸሎቶም ኣቡነ እንጦንዮስ ኢሎም ይጽልዩ ብምህላዎም፥ ኣቡነ እንጦንዮስ ከምቶም ኩሎም ተኣሲሮም ዝተረስዑ፥ ዘይርስዖምን መዓልቲ መዓልቲ ዝለዓል ጉዳይ ስለ ዝኾኖን፥ ኣብ ህዝቢ ዝያዳ ተፈላጥነት እናረከበ ስለ ዝመጾ፥ ነቲ ስርዓት ከቢድ ሕማም ርእሲ እዩ ኮይንዎ ዘሎ። ስርዓት ህግደፍ ምስዚ ዘለዎ ኣንጸርጽሮትን ዓበድበድን፥ ብፍላይ ኣብዚ እዋን እዚ  ኣብ ርእሲ ኣቡነ እንጦንዮስ ናይ ቅትለት ስጉምቲ ከይወስድ ብዙሕ ህዝቢ ተዋህዶ ሃይማኖት ሰጊኡ ኣሎ።

በዚ ዝተዳህለን ስርዓት ህግደፍ  ብድሆን ኮይንዎ ንዘሎ ጉዳይ ተዋህዶ ሃይማኖት፥ ብፍላይ ኣብ ኤውሮጳን ኣሜሪካን እስራኤልን ዘለዉ ኤምባሲታትን ቆንስላትን ተሓባቢሩ ብዙሕ ጻዕርታት ከካይድ ጸኒሑ እዩ። እንተ ኾነ ከምቲ ዝመደቦ ስለ ዘይኮነሉ፥ ብጳጳሳት ኣቢሉ ከሰናብድን ከፈራርህን፥ መደብ ሓንጺጹ ይንቀሳቐስ ኣሎ። ነዚ ንምትግባር ድማ ኣብዚ ውሽጢ ጾም ኣርብዓ ካብቶም ናይ ውሽጢ ጸሓፍቲ ኢሉ ዘእተዎም ሃሱሳቱ ምስ ጳጳሳት ኣሰንዩ ናብ ኤውሮጳ ክሰዶም፥ ይሸባሸብ ኣሎ። ገለ ካብ ጳጳሳት ኣብ ጊዜ ጾም ኣርባዓ ኣብ ገዳማትና ሱባኤናን ንዕጸወሉ እምበር ንገሸሉን ኣብ ሆቴላትን ንሓድረሉን ጊዜ ኣይኮነን። ነቲ ህዝቢውን ሕማቕ ኣብነት እዩ። ግዜ ይቀየር። ብዝብል ተቓውሞ ከርእዩ ፈቲኖም። እንተ ኾነ ሰማዒ ኣይረኸቡን። ስርዓት ህግደፍ እቲ ጉዳይ ተኣፋፊ ምስ ምዃኑ ብፍርሂ ሒዝዎ ስለ ዘሎ፥ ካብቶም ዝለኣኹ ጳጳሳት ንሓደ ምሉእ መምርሒ ብምሃብ፥ ብብዝሒ ታቦታት ክዝርግሑን፥ ኣተኩሮኦም ኩሉ ግን ኣብ ምንጻልን ምጽላምን እቶም ብፖለቲካዊ ተቓዋሚ ዝጥምቶም ኣቡነ መቃርዮስን ሰዓብቶምን ክኸውን፥ ተሓቢሩ ኣሎ። ኣቡነ መቃርዮስ ኣብ መጋቢት 2011 ኣብ መደትራንያን ባሕሪ ሕይወቶም ናይ ዝጠፍኡ 450 መንእሰያት ዝተዛረብዎ ዘረባ፥ መራሒ ስርዓት ህግደፍ ኣዝዩ ተቐይምሎምን፥ ልዕሊ ዝኮነ ጸላኢ ስሞም እናጠቐሰ፥ ብቂምን ቅርሕንትን ከም ዝጽበዮም ይሕበር እዩ።

እቶም ኣብ ኤውሮጳ ዘሎኹም፥ ነዚ ነገር እዚ ተገንዚብኩም፥ ፈላሲ ናብ በዓቱ፥ ካህን ናብ ዳዊቱ፥ ምእመን ናብ ጸሎቱ እንኣትወሉ ግዜ ስለ ዝኾነ፥ ኣብዚ እዋን ጾም ኣርብዓ፥ ነዚ ከምዚ ዝኣመሰለ ናይ ጽልእን ቅርሕንትን መንፈስ ዝዘርእ፥ ክትርሕቁሉን ክትከላኸልዎን ይግባእ። እቲ ስርዓት’ውን ነዚ ትብዓትን እምነትን ናይ ህዝብና ፈሊጡ ብፈራህ መንፈስ እዩ ሒዝዎ ዘሎ።

እግዚኣብሄር ቅድስት ቤተክርስትያንናን ቅድስቲ ሃገርናን ይሓልወልና።

ግዱሳት ምእመናን ካብ ኣስመራ።