ኣብ ዝሓለፈ ወርሒ ታሕሳስ ኣብ ጋምብያ ኣብ ዝተኽየደ ምርጫ ተሳዒሩ ክንሱ ስልጣን ካብ ምርካብ ሓንጊዱ ዝነበረ መራሒ ጋምብያ ነበር ያሕያ ጃምዕ፣ ካብ ሰኔጋልን ናይጅርያን ተበጊሶም ናብ ወሰናስን ‘ታ ሃገር ዝኣተዉ ሓይልታ ሰራዊት ምዕራብ ኣፍሪቃ ብዝገበሩሉ ጸቕጢ ተገዲዱ ካብ ስልጣን ድሕሪ ምውራዱ ትማሊ ቀዳም 21 ጥሪ ናብ ጎረቤት ሃገር ኤኳተርያል ጊኒ ከምዝተሰደደ ሮይተርስ ሓቢሩ።

እቲ ስልጣን ምቕባጽ ስኢኑ ዝጸንሐ ውልቀመላኺ ብጸቕጢ ካብ ጋምብያ ናብ ስደት ምምርሑ፣ ኣብታ ሃገር ተኸሲቱ ንዝጸንሐ ወጥሪ ኣብ ርእሲ ምኽታሙ፣ ነቲ ኣብ ሃገራዊ ምርጫ ዝተዓወተ ኣብ ሰኔጋል ኣብ ዝርከብ ኤምባሲ ጋምብያ ቃለ ማሕላ ዝፈጸመ ኣዳማ ባሮው ናብ ሃገሩ ክምለስ መገዲ ጸሪጉሉ ‘ሎ።

እቲ ኣብ 1994 ብዕልዋ ስልጣን ምስ ጨበጠ ን22 ዓመታት ኣብ መሪሕነት ዝጸንሐ ያሕያ ጃምዕ፣ ገና ካብታ ሃገር ከይወጽአ ኸሎ ኣብ መደበር ቴለቭዥን ጋምብያ ቀሪቡ ካብ ስልጣ ክወርድ ምዃኑ ንህዝቢ ‘ታ ሃገር ብወግዒ ኣብ ዘፍለጠሉ ኣጋጣሚ፣ “ ደም ምፍሳስ ንምውጋድ ስልጣን ክገድፍ እየ” ኢሉ ቃል ከምኣተወ ይፍልጥ።

እቲ እምቢታ ከስምዕ ዝቐነየ ያሕያ ጃምዕ፣ ኣህጉራዊ ፖለቲካዊ ደገፍ ዝንበሮም ልዕሊ 7 ሽሕ ወተሃደራት ሰኔጋልን ናይጀርያን ናብታ ሃገር ድሕሪ ምእታዎም እዩ ኣማራጺ ስኢኑ ስልጣን ክለቅቕ ተገዲዱ።

ምሩጽ ፕረዚደንት ኣዳማ ባሮው፣ ፕረዚደንት ነበር ያሕያ ጃምዕ ስልጣን ክለቅቕ ምዃኑ ኣመት ድሕሪ ምርካቡ ትማሊ ኣብ ጎረቤት ሃገር ሰኔጋል ንደገፍቱ ኣብ ዝሃቦ መግለጺ፣ “ ድሕሪ ደጊም፣ ኣብ ጋምብያ፣ ኣብ ራዕዲ ዝተመስረተ ምሕደራ ኣብቂዑ እዩ” ክብል ምዝራቡ እቲ ናይ ሮይተርስ ዜና የመልክት።

እቲ ብግፍዕን ቅንጸላን ተቓወምቱ ዝፍለጥ፣ ፍልልይ ኣተሓሳስባ ዘይቅበል፣ “ሓደ ቢልዮን ዓመት ክገዝእ እየ” ኢሉ ዝጀሃር ዝነበረ ውልቀ መላኺ ያሕያ ጃምዕ ብኸምዚ ዝኣመሰለ ዞባዊ ምትሕብባር ስልጣን ለቒቑ ድሌት ህዝቢ ከኽብር ምግዳዱ፣ ነቶም ኣብ ፈቐዳ ኩርናዓት ኣፍሪቃ ብሓይሊ ዝገዝኡ ዘለዉ ምልካውያን መራሕትን ህዝቦምን ኣብነታዊ ትምህርቲ እዩ።