ኣብ ከባቢ ዳህላክ ኣብ ዝርከባ ክልተ ዴሴታት ኤርትራ፡ ዝኾነ ኤርትራዊ ዘይብሎም ብዝሒ ዘለዎም ኣሃዱታት ሰራዊት ኢትዮጵያ ዓስኪሮም ከምዘለዉ ምንጭታት ካብ ኤርትራ ሓቢሮም።

እቶም ኣሃዱታት ሰራዊት ኢትዮጵያ፡ ንመዓልታዊ ጠለባቶም ዘድሊ ምሉእ ዕጥቅን ስንቅን ኩሉ ካብ ጅዳ፡ ስዑዲ ዓረብ ከምዝመጽኦም፡ ኣብ ዙርያ ናይተን ንሳቶም ዓስኪሮምለን ዘለዉ ደሴታት ብቐጻሊ ሓደስቲ መራኽብ ከምዝረኣያን `ውን እቲ ሓበሬታ የረድእ።

ነተን መራክብ ሓንሳብ ናይ ስዑዲ ሓንሳብ ናይ ኢትዮጵያ ዝልጠፍ ኣስማት እናቐያየሩ ከምዘንቀሳቕሱወን `ውን እቲ ሓበሬታ የገንዝብ።

ውልቀመላኺ ኢሳይያስ ንዝበዝሑ ኣባላት ሓይሊ ባሕሪ ኤርትራ ክሳብ ናይ ሰለስተ ወርሒ ዝተናውሐ ዕረፍቲ ሂቡ ከምዝበተኖም ኣብ ዝቐደሙ ዜናታትና ተጠቒሱ እዩ።

እዚ ከምዚ ኢሉ ኸሎ፡ ምኽትል ኢታ ማጆር ሹም ሰራዊት ኢትዮጵያ ጀነራል ብርሃኑ ጁላ፡ ምስ ጋዜጣ ዘመን ናይ ኢትዮጵያ ኣብ ዝገበሮ ቃለመጠየቕ፡ ሓይሊ ባሕሪ ኢትዮጵያ ቆይሙ ከምዘሎ ምጥቃሱ፡ ዘሓበሻ ዝተባህለ ናይ መርበብ ማሕበራዊ ሚድያ ሓቢሩ።

እቲ ኣዛዚ ሰራዊት፡ ኢትዮጵያ ኣብ ቀይሕ ባሕርን ህንዳዊ ውቅያኖስ ወተሃደራዊ መዓስከራት ከምዘለዋ ምጥቃሱ `ውን እቲ መርበብ ይገልጽ።