ብቕድሚ ትማሊ ዕለት 08 ነሓሰ 2013 ብለይቲ አብ ከባቢ ሃይኮታ ብዝወቕዓ ቡሩቱዕ ዝናብ ነታ ብሚኒስትሪ ሕርሻ አብቲ ከባቢ ዝተሰርሓት ዲጋን መእለይ ውሕጅን አፍሪሱ ነቲ አብቲ ከባቢ ዝነብር ህዝቢ ብማይ የዕለቕሊቕዎ። በዚ ዘጋጠመ ሓደጋ ድማ ሓያለ ገዛውቲ ዓንዩን ንብረት ብውሕጅ ተወሲዱን ከቢድ ክሳራ አስዒቡን አሎ።

ስርዓት ህግደፍ ነቲ ዘጋጠመ ሓደጋ ብመንገዲ ቴቪ ኤረ እንተገለጾ እኳ ነበርቲ ናይዚ ከባቢ ዝኸነ ሓገዝ አየቕረበሉምን። እቲ ስርዓት ናይዚ ሓደጋ ቀንዲ ተሓታቲ እቲ ስርዓት ኢዩ። ስለዝኸነ ድማ እዞም ገዳያት ግቡእ ካሕሳ ክረኽቡ ይግባእ። ስለምንታይ እዚ መእለይ ውሕጅ ክስራሕ ከሉ ምፍራስ አብ ዘጋጥመሉ ግዜ ነቲ አብ ትሕቲ እዚ ዲጋን መእለይ ውሕጅን ዝነብር ህዝቢ ከቢድ ጉድኣት ከምዘብጽሕ ፍሉጥ ክንሱ ወይ መከላኽሊ ሓደጋ ምስራሕ ወይውን ነታ ዓዲ ካብቲ ቦታ ንምርሓቕ ዝተወሰደ ስጉምቲ አይነበረን። ኩሎም ድስርሖ ዲጋታትን መእለይ ውሕጃትን ደቂቕ ከባብያዊ መጽናዕትን ብቐንዱ ድማ ነቶም ነበርቲ ህዝቢ እናተወከሱ ደይስርሑ ብምኻኖም ከብጽሕዎ ዝኽእሉ ጉድኣት ንምግማቱ ኣየጸግምን ኢዩ።

ስርዓት ህገደፍ አብ ንኡስ ዞባ ጎልጅ ‘ዲጋ ገርሰት’ ብዘይ ከባብያዊ መጽናዕቲ {ኢነቫይሮምንታል አስ} ዓብይ ዲጋ ሰሪሑ። እዛ ዲጋ ዝተሀነጸትሉ ሮባ ዓብይ ሩባ ኢዩ። መበገሲ እዚ ሩባ ካብ መንሱራን ካብ ደቡባዊ ክፋል አውራጃ ሃማሴን ማይ ክዖ ዝውሕዝ ኢዩ። እዛ ዲጋ ብሙሩጽ ሓመድ ብጉልበት ሰራዊትን ማሽነሪን ተደግዲጉ ዝተሰርሓ ኢዩ። እንተኸነ ግን እቲ አብ ግምት ዝኣተወ እቲ ዲጋን ከፍርዩ ዝኽእል ሰፍሓት መሬትን ድኣ እምበር ብዛዕባ ትሕቲ ዲጋ ዝነበር ህዝብን ምጭዳድ ወይ መፍራስ ምስ ዘጋጥም ከስዕቦ ዝኽእል አብ ግምት አይአተወን። ከተማ ጎልጅ አብ ትሕቲ እዚ ዓብይ ዲጋ ስለትርከብ አብ መጻኢ ንኸጋጥም ዝኽእል ሓደጋ ዝኸነ መከላኺሊ ስለዘየሎ እዛ ከተማ ምስ ነበርታ አብ ትሕቲ ከቢድ ኩነት ኢያ ትነብር ዘላ። እዛ ዲጋ ብቐጥታ ብሓላፍነት አቶ ኢሳያስ አፍወርቂን ብመንገዲ ናይ ህግደፍ ናይ ህንጻ ኮንትራክተርን ዝተሰርሓት ኮይና ሚኒስትሪ ሕርሻ አብዚ መስርሕ ዋላ ሓደ ኢድ ዘየብሉ ምኻኑ ዝተፈላለየ ክኢላታት ሕርሻ ይእንፍቱ። ብቐጥታ ብኢሳያስ አፍወርቂ ዝእለ ስራሕ ብምንባሩ አብቲ ዞባ ዘለው ክኢላታት ሕርሻ ብፍርሒ ዝኣክል ሞያዊ አብርክቶ ክገብሩ አይክአሉን። ፕሬዝደንት ኢሳያስ በዚ ምኽንያት ኢዩ አብ 2005-2007 ንጋሽ ባርካ ዝመላለስ ዝነበረ። ቀንዲ ሕመረት ናይዛ ዲጋ እዚኣ ንፕሮፖጋንዳ ዝዓለመ ኢዩ ኒሩ። ብኻልእ ሸነኽ ድማ ነቲ ሰራዊት ብዘይ ስራሕ ኮፍ ምባል ካልእ ሳዕቤን ከፍጥር ስለዝኽእል አብዚ ከምዚ ዝኣመሰለ ስርሓት ጸሚድካ ንነዊሕ ግዜ ንምሓዙ ካብ ዝምሃዙ ፕሮጀክትታት ሓደ ኢዩ።

ሰላም ንኤርትራና!

ወዲ ባርካ