ስርዓት ህግደፍ፥ ምሉእ ብምሉእ ምቁጽጻሩ ክጥዕሞ፥ ኣብቲ ቤተ ክርስቲያን ከምድላየይ ክዕንድር ይዕንቅፉኒ እዮም ንዝበሎም፥ ምሁራትን ለባማትን ደቂ እታ ቤተ ክርስቲያን  ፓትርያርክ ኣቡነ እንጦንዮስ፥ እንኮ ናይ ስነ መለኮት ምሁር ኣቡነ መቃርዮስ፥ ናይ ታሪኽ ገዳማትን ታሪኽ ኤርትራን ፈላጥ መምህር ተወልደብርሃን ዓምደመስቀል፥ ናይ ትርጓሜ መጻሕፍቲ መምህር መጋቤ ምሥጢር መብራህቱ ሞባእ፥ ናይ ቀኖናን ሰርዓት ቤተ ክርስቲያን ተሓታቲ መርጌታ ተወልደ መድህን መንግስቱ፥ ዝተፈላለዩ መጻሕፍቲ ናብ ቋንቋ ትግርኛ ዝተርጎሙ መምህር ዓምደብርሃን ገብረማርያም፥ ናይ ባሕረ ሓሳብን ኣቡሻክርን ምሁር ዘውገ ምሁራን መርጌታ ይትባረኽ በርሀ፥ ንብዙሕ ዓመታት ኣብ ቤተ ትምህርቲ ሰንበት ዓቢይ ኣስተዋጽኦ ዝገበሩን ምሁራንን ናይ ስነ መለኮት ምሁር ቀሺ ገብረመድህን ገብረጊዮርጊስ፥ መርጌታ ሰመረኣብ ወልደገብርኤል፥ ቀሺ ዶር ፍጹም ብርሃን ገብረንጉስ፥ ቀሺ ዶር ተኽለኣብ መንግስተኣብ፥ መንቋሕቃሕታ ዘለዎም ኣዝዮም ብዙሓት መነኮሳትን ካህናት ዲያቆናትን ደቂ ቤተ ክርስቲያን ስሞም ብምጽላም፥ ብምእሳር፥ ብምስጓግ፥ ከቢድ ማህሰይቲ ኣውሪዱ ነታ ቤተ ክርስቲያን የማህምናን ይኸፋፍላን ኣሎ።

ከም መቐጸልታ ናይዚ ድማ ኣብ ወጻኢ ሃገራት ንዝርከባ ቤተክርስትያናት ብኢድ ኣዙር ብኤምባሲታቱ ኣቢሉ ንምቁጽጻር ኣብ ውሽጢ ቤተ ክርስቲያናት ሃሱሳት ብምውፋር፥ ከቢድ ዕንወት ይፍጽም ኣሎ።

ኣብ ዝሓለፈ ቅንያት ኣብ እስራኤል ዝርከብ ብስም እንዳመድሃኔ ኣለም ዝፍለጥ ቤተ ክርስቲያን ምሉእ ብምሉእ ኣብ ቁጽጽሩ ንምእታው፥ መንግስቲ ህግደፍ ብኢድ ዮፍታሄን ኤምባሲ ህግደፍ ተስፋማርያም ተኸስተን፥  ዘይተሓለለ ናይ ዕንወት ጻዕሪ የካይድ ኣሎ።

ኣብ መንጎ ተመሃሮ ትምህርቲ ሰንበትን ውሉደ ክህነትን ብዝወልዕዎ ህውከት ድማ እቲ ቤተ ክርስቲያን ኣብ ምክፍፋል ይርከብ። ብፍላይ ነቶም ከም መሳርሒ ውሽጣውሽጢ ክጥቀሙሎም ዝጸንሑ ናይ ቤተ ክርስቲያን ሓላፊ ቀሺ ጸጋይ ኣበራ፥ ብምኽንያት ናይ ጸጥታ ጸገም ኣመኽንዮም ገንዘብ ናይቲ ቤተ ክርስቲያን ናብ ኤምባሲ ክወሃብ እሞ፥ ብኡ ኣቢሉ ናብ ኣስመራ ክለኣኽ ዮፍታሄን ተስፋማርያም ተኸስተን ብዝተሰማምዑሉ፥ እቶም ካህን ኣየረክብን ስለ ዝበሉ፥ ከቢድ ጸለመን ምፍርራህን ይወርዶም ኣሎ ንህይወቶምውን ኣብ ስግኣት ይርከቡ።

ኣቐድም ኣቢሉ ብስም እቶም ሃሱሳት ህግደፍ ኣብ ውሽጢ ቤተ ክርስትያን ዝርከቡ፥ ብስም ገዳማት ኣመኽኒኻ ዝተላእከ ገንዘብ፥ ክልተ ኣዛብእ ዮፍታሄን ኣባ ሉቃስን፥ ንዓይ ንዓይ ተባሂሎም፥ ድሕሪ ምስሕሓቦም፥ ክሳብ ኣብ መንጎ ጳጳሳት ምክፍፋል በጺሖም ኣለዉ።

ገለ ጳጳሳት ብገርሆም ኣይበልዑ ኣይሰተዩ ምስ ዮፍታሄ ክውግኑ ከለዉ፥ ገለ ድማ ምስ ኣባ ሉቃስ ኮይኖም፥  ተከፋፊሎም ኣብ ከቢድ ምፍጣጥ ይርከቡ።

ኣብ ዝሓለፈ ወርሒ መስከረም፥ ዮፍታሄን ጸሓፊኡ ኣቶ ሃብቶም ርእሶምን፥ ካብ ምሉእ ናይ ሓላፍነት ስልጣን ክወርዱ፥ ጳጳሳት ብብዝሒ ድምጺ ወሲኖም። እንተ ኾነ ዮፍታሄ ናብ ፕረሲደንት ህግደፍ ጠሪዑ፥ ክትንከፍ ከም ዘይክእል፥ ኣብ ስልጣኑ ክጸንሕን ውህስነት ረኺቡ ኣሎ።

ድሕሪ እዚ ውሳኔ ገለ ዝፈርሁ ጳጳሳት መትከሎም ለዊጦም እታ ዋና ኣማሓዳሪ እትብል ስም ተለዊጣ ጸሓፊ ምምሕዳር ዝብል ስም ንክሕዝ  ምስ ዮፍታሄ ወጊኖም ኣለዉ። ባእሲ ዮፍታሄን ኣባ ሉቃስን ጉዳይ ገዘብ ነዓይ ነዓይ እምበር ጉዳይ ቤተ ክርስቲያን ከም ዘይኮነ ዝተረድኦም ጳጳሳት ድማ ጸግዖም ሒዞም ይዕዘቡ ኣለዉ።