ምልካዊ ስርዓት ኢሳይያስ ን “ሃገራዊ ማሕበር መንእሰያትን ተማሃሮን ኤርትራ” (ሃማመተኤ) ንረብሓ ብሕትውና ስልጣኑ ኣጸቢቑ ንምቍጽጻሩ ብዝጥዕም መንገዲ ብኻልእ መልክዕ ከምብሓዱሽ ንምውዳቡ ከምዘፍረሶ ምንጭታት ካብ ኤርትራ ሓቢሮም።

በቲ ሓበሬታ መሰረት፣ መራሒ ስርዓት ህግደፍ መላኺ ኢሳይያስ ኣፈወርቂ፣ ነቲ ነዚ ዕላማ’ዚ ንምትግባር ብህግደፍ ዝተሓረዩ ሓደስቲ ኣገልገልቲ መንእሰያት ብምዕዳም ሎሚ  17 መስከረም ኣብ እምባትካላ ክካየድ ዝወዓለ ኣኼባ ከፊቱዎ።

ነቲ ንሃመማተኤ ንምብታን ብኢሳይያስ ዝወጸ መደብ፣ የማነ ማንኪ፣ ሓጎሽ ክሻን ኣልኣሚን መሓመድ ስዒድን ‘ውን ከምዝተሳተፉዎ እቲ ሓበሬታ የረድእ።

ካብ ዝሓለፈ ሓያለ ዓመታት ኣትሒዙ ሓላፊ ፖለቲካዊ ጉዳያት ህግደፍ የማነ ማንኪ፣ እቲ ማሕበር ኣብ ባይታ እናሀለወ ጎኒ ጎኒ ባዕሉ ዝቆጻጸሮ ጉጅለ መንእሰያት ኩርኩር ህግደፍ (YPGDJ) ክምልምል ከምዝጸንሐ ‘ውን ይፍለጥ።

ሃማመተኤ ልክዕ ከምቶም ከም ሃማደኤ ዝኣመሰሉ ብህግደፍ ዝተመስረቱ ማሕበራት፣ ፖለቲካዊ ዕላማ ናይቲ ስርዓት ንምውቃዕ ዝተመስረተን ክሰርሕ ዝጸንሐን ኳ እንተኾነ፣ ድሕሪ’ቲ ብ21 ጥሪ ኣብ ኣስመራ፣ ፎርቶ፣ ኣብ ዝተኻየደ ምንቅስቓስ ሓይልታት ምክልኻል ኤርትራ፣ ገለ ካብ ኣባላቱ ምትእስሳር ከምዝነበሮም ብህግደፍ ከምዝተጠርጠሩን እቲ ስርዓት ኣብቲ ማሕበር ዝነበሮ ምትእምማን ኣዝዩ ከምዘጕደለን ካብ ኤርትራ ዝተረኽቡ ሓበሬታታት ከረድኡ ጸኒሖም እዮም።

ኣብ ምምስራትን ምህናጽን ሃማመተኤ ዓቢ እጃም ዝነበሮም፣ ኣቦ ወንበሩ ነበር  ሙሕየዲን ሸንገብ ፣ ከምኡ ‘ውን ቅድሚ ናብ ሚኒስትሪ ዜና ምዝውዋሩ ምኽትል ኣቦ ወንበሩ ዝነበረ ዓሊ ዓብዱ፣ ነቲ ስርዓት ብተኸታታሊ ራሕሪሖም ኣብ ወጻኢ ፖለቲካዊ ዑቕባ ከምዝሓተቱ ይፍለጥ።