ምልካዊ ስርዓት ኢሳይያስ ሃገራዊ ኣገልግሎት ኣብ 18 ኣዋርሕ ከምዝድረት ከምዝገበረ ብፍላይ ንዲፕሎማሰኛታት ንምትላል ዝዘርግሖ ወረ ጻዕዳ ሓሶት ምዃኑ ከምዘረጋገጸ፣ ኣምኒስቲ ኢንተርናሽናል ኣብ ዘውጽኦ 57 ገጻት ዘለዎ ሰፊሕ ጸብጻብ መስኪሩ።

ኣሚኒስቲ ኢንተርናሺናል፣ ካብ መፋርቕ 2014 ንደሓር ናብ ስደት ምስ ዝመጽኡ ልዕሊ 72 ኤርትራውያን ኣብ ዘካየዶ ቃለመጥየቓት ተመርኵሱ ኣብ ዘዳለዎ ጸብጻብ፣ ኣብ ንውሓት ግዜ ይኹን ምረት ስቅያትን መከራን እቶም ተገዲዶም ዝተዓስከሩ ዜጋታት ዝተራእየ ዋላ ሓደ ለውጢ ከምዘየልቦ ኣገንዚቡ። ኣብ ቃለመጠየቓቱ ሰብኡተን ወይ ድማ ኣንስቶም ኣብ ኣገልግሎት 20 ዓመት ዝገበሩ ግዳያት ከምዝረኸበ ‘ውን ጠቒሱ።

እቲ ጸብጻብ፣ ኣብ ልዕሊ ኤርትራውያን ዜጋታት ብሰንኪ ‘ቲ ደረት ኣልቦ ሃገራዊ ኣገልግሎት ናይቲ ስርዓት ዝወርድ ዘሎ መዳርግቲ ዘይብሉ ኣደራዕ ይቕጽል ኳ እንተሎ፣ ገለ መንግስታት ኤውሮጳ ንመደናገሪ መግለጺታት ናይቲ ስርዓት ብምእማን፣ ንኤርትራውያን ስደተኛታት ከም ናይ ቁጠባ ስደተኛታት ኣምሲሎም ከናፍሱዎ ንዝጸንሑ ሓሶት ዘቃልዕ ምዃኑ ‘ውን እቲ መግለጺ ብተወሳኺ የብርህ።

እቲ ብሰንኪ ደረት ኣልቦ ሃገራዊ ኣገልግሎት መዕገቲ ተሳኢኑዎ ዘሎ ዋሕዚ ስደት ኤርትራውያን ከም ኣካል ናይቲ ዓለማዊ ሰብኣዊ ቅልውላው ኣቓልቦ ተዋሂቡዎ፣ ንኤርትራውያን ኣህጉራዊ ዑቕባ ክወሃቦም ከምዝግብእ ‘ውን ኣትሪሩ ጸዊዑ።

ምልካዊ ስርዓት ኢሳይያስ፣ ነቶም ደሞምን ረሃጾምን ኣብ ዝኸዓዉሉ መሬት ዓደቦኦም መሰረታዊ መሰላት ምንባር ነፊጉ ዘንፈጾም ኤርትራውያን፣ ማሕበረሰብ ዓለም ዑቕባ ከይህቦም ብምጽዋዕ ካልኣይ ግዜ ክቕጽዑ ቀጻሊ ጎስጓሳት ከካይድ ጸኒሑ እዩ። እዚ ሃገራዊ ኣገልግሎት ኣብ 18 ኣዋርሕ ከምዝተደረተ ኣምሲሉ ብፍላይ ን ወጻእተኛታት ንምድንጋር ዝገበሮ ናይ ሓሶት ዘመተ፣ በዚ ናይ ኣምኒስቲ ኢንተርናሽን ምስክርነት ምቅልዑ ድማ ነቶም መዓልቦኦም ጠፊኦም ከርተት ዝብሉ ዘለዉ መሳኪን ኤርትራውያን ስደተኛታት ዓቢ ደገፍ እዩ።