ምልካዊ ስርዓት ኢሳይያስ፡ ኣብ ሕመኣ ዓቢ ናይ ተደናገጽቱን ግሩሃትን ፈስቲቫል  ክገብር ምስጢራዊ ምድላዋት የካይድ

እቲ ህዝባዊ ተቓውሞ ኤርትራውያን ኣብ ውሽጢ ሃገር ኣብ ድርኩኺት ናይ ዓዲ ሃሎ ቤተመንግስቱ  በጺሑ፡ ኣብ ወጻኢ `ውን ብናይ ይኣክል ንምልኪ ምንቅስቓስ ተዋጢሩ ኣብ ጭንቀት ዝርከብ ዘሎ ምልካዊ ስርዓት ኢሳይያስ፡ ኣብ ወጻኢ ህዝባዊ ደገፍ ዘለዎ መሲሉ ብምርኣይ ነቲ ኣብ ውሽጢ ሃገር ፍኒሕኒሕ ዝብል ዘሎ ናይ ለውጢ ምንቅስቓስ፡ ከምኡ `ውን ንህዝቢ ኤርትራ ብሓፈሻ ተስፋ ብምቚራጽ ዕድመ ስልጣኑ ዋላ ንሓጺር እዋን ንምልቃብ፡ ኣብ ሕቡራት መንግስታት ኣመሪካ፡ ኣዝዩ ዓቢ ፈስቲቫል ከካይድ ፍሉይ ምስጢራዊ ምድላዋት ይገብር ከምዘሎ ምንጭታት ሓቢሮም።

እቲ ኣብዚ ቀረባ እዋናት፡ ኣብ በይ ኤርያ ክካየድ ተወጢኑ ዘሎ፡ ዋላ ካብቶም ብዝለዓለ ደረጃ ነቲ ስርዓት ዘገልግሉዎ ዘለዉ ቀንዲ መጋበርያታት ከይተረፈ ዛጊት ብምስጢር ተታሒዙ ዘሎ ኣኼባ፡ ነቶም ኣብ መላእ ሰሜን ኣመሪካ ዝርከቡ ተደናገጽቲ፡ እንተተኻኢሉ ድማ ነቶም ነቲ ስርዓት ብዓውታ ተቓውሞኦም ዘይገለጹ ኤርትራውያን ታርጌት ዝገበር ኮይኑ፡ ኣብ ኣመሪካ ተራእዩ ዘይፈልጥ ብዝሒ ኤርትራውያን ዝሳተፉዎ ኣኼባ ብምክያድ ግዝያዊ ናይ ፕሮፖጋንዳ መኽሰብ ረኺብካ ነቲ ኣብ ህዝቢ ኤርትራ ዓሲሉ ዘሎ ናብ ለውጢ መንፈስ ከምዝብከል ምግባር እዩ።

እቲ ስርዓት ዋሕዲ ተሳታፍቲ ከየጋጥሞ መታን፡ ነቶም ናይ መጓዕዝያን መጽንሕን ሕጽረታት ዘለዎም ብዝተፈላለየ መልክዕ ወጻኢታቶም ባዕሉ ክሽፍነሎም ወጢኑ ከምዘሎ `ውን ተፈሊጡ `ሎ።

ብመሰረት`ቲ ሓበሬታ፡ ነታ ናይ ኤርትራ ዓሚቚ ፍልጠት ዘይብላ ስነጥበበኛ ቲፋኒ ሓድሽ ከም (Motivator) መስሓቢ መንእሰያት ክጥቀሙላ ክዕድሙዋ ከለዉ፡ ንተመሳሳሊ ዕላማ፡ ነቲ ኣብ ዝሓለፈ ቀረባ እዋን ዝተቐትለ ኤርትራዊ ዘርኢ ዘለዎ ስነጥበበኛ ኒፕሲ ሃስል `ውን ብስሙ ዝጽዋዕ ሓደ ኩርናዕ ክሓዝኡሉ መዲቦም ኣለዉ።

ነቶም ክረኽቡዎም ዝኸኣሉ፡ ብብዝሒ ስነጥበበኛታት ኣሳቲፎም ነቲ ኣጋጣሚ ብዝተኻእለ መጠን ከድምቑዎ፡ ነቶም ኣብዚ ቀረባ እዋናት ይኣክል ኢሎም ኣብ ጎኒ ህዝቦም ደው ከምዝበሉ ብዜማን መደረን ብዓውታ ዝገለጹ ስነጥበበኛታት `ውን ንእግረመንገዶም መልእኽቲ ንምትሕልላፍ ድሌት ከምዘለዎም `ውን ተፈሊጡ `ሎ።

ኣብ ከምዚ ዝኣመሰለ፡ ብሰንኪ ውዲት ውልቀመላኺ ስርዓት ኢሳይያስ ህዝብና ተበቲኑ፡ ሃገርና ኤርትራ ሰንከልከል ኢላ ኣብ ሓደጋ ኣብ እትርከበሉ ዘላ ኣስጋኢ ኩነታት፡

1ይ – እቶም ብተደናጋጽነትኩም ኮነ ብስቕታኹም ዒላማ ፕሮፖጋንዳ ምልካዊ ስርዓት ክትኮኑ ተሓጺኹም ዘለኹም ኤርትራውያን፡ ከም ናይ ቀደም ተዓሺኹም ኣብ ከምዚ ዝኣመሰለ ዕምሪ ምልካዊ ስርዓት ኢሳይያስ ንምንዋሕ ዝዓለመ መደብ ካብ ምስታፍ ብምቑጣብ ኣብ ጎኒ ሃገርን ህዝብን ከምዘለኹም ብተግባር ከተመስክሩ፡ ሕልናኹም ዘቕስን ስጉምቲ ክትወስዱ ይግባእ።

2ይ – እቶም ኣብ ወጻኢ ብፍላይ ድማ ኣብ ሕቡራት መንግስታት ኣመሪካ እትርከቡ ኤርትራውያን ደለይቲ ፍትሒ ብግዴኹም፡ ንኹሎም እቶም ግዳይ ናይ ከምዚ ዝኣመሰለ ፕሮፖጋንዳዊ መደብ ምልካዊ ስርዓት ኢሳይያስ ክኾኑ ዝኽእሉ ቤተሰብኩም፡ ኣዕሩኽኩም፡ ጎረባብትኹም ብሓፈሻ እትፈልጡዎም ኤርትራውያን፡ ዕላማን ሃቐነን ናይቲ ስርዓት ጸረ ሃገርን ህዝብን ምዃኑ ብኹሉ መንገድታት ከምዝርድኡን ከምዝነቕሑሉን ብምግባር ሕልናዊ ውሳኔ ወሲዶም ኣብ ጎኒ ህዝብን ሃገርን ደው ክብሉ ኣብ ርእሲ ምዝኽኻር፡ ነቲ ፕሮፖጋንዳዊ ውጥን ንምፍሻል ተዓጢቕኩም ኩሉ ዓይነት ተቓውሞን ጎስጓስን ንምክያድ ክትንቀሳቐሱ ሓላፍነትን ግዴታን ከምዘለኩም `ውን ክትዝክሩ ይግባእ።

ነቶም እንተ ብግርህናን ዕሽነትን እንተ ብኻልእ ምኽንያት መሳርሒ ዓመጽን ምልክን ዝኾኑ ዘለዉ ስነጥበበኛ ቲፋኒ ሓድሽን ቤተሰብ ኒብሲ ሃስልን ኣብቲ ረሳሕ ክንፊ ታሪኽ ይቆማጥዑ ከምዘለዉ ብምዝኽኻር፡ ስለ ፍትሕን ሰብኣውነትን ደው ክብሉ ክትምሕጸኑ ሓላፍነት ኩሉ ኤርትራዊ ምዃኑ ተገንዚቡኩም ክትንቀሳቀሱሉ `ውን ሓላፍነት ኣለኩም።

ኣብ ውሽጢ ሃገር እትርከብ ህዝቢ ኤርትራ `ውን፡ እቲ ስርዓት ከምቲ ኣብ ፈላሚ ምብጻሕ ኣቢይ ኣሕመድ `ተደምረናል` ዝብላ ኣርሆታት ብገንዘብ ቆጺሩ፡ ኣብ ጽምብል ናጽነት `ውን ብናይ ኩቦን ወረቐት እናፈራርሐ ህዝቢ ኣኪቡ ነብሱ ከደዓዕስን ግሩሃት ከደናግርን ከምዝፈተነ ብዓይንኻ ዝረኣኻዮን ዝተመኮርካሉን ስለዝኾነ ዕምሪ መላኺ ኢሳይያስ ብፈስቲቫልን ኣኼባን ክናዋሕ ከምዘይክእል ካብ ምንቃሕ ሓሊፍካ ብተግባር ክትምክቶ ይግባእ።