ምልካዊ ስርዓት ህግደፍ ኣብዚ ቕንያት ‘ዚ ባጤራ ናቕፋ ብሓዱሽ ወረቐት ክቕየር ምዃኑ ድሕሪ ምእዋጁ ኣብ ህዝቢ ተፈጢሩዎ ዘሎ ሸገርገር ብኢሱ ኣብ ዝለዓለ ጥርዚ በጺሑ ከምዘሎ ምንጭታት ሓቢሮም።

ኣብ ዝሓለፈ ዜና ከምዝጠቐስናዮ፣ እቲ ስርዓት፣ ብመሰረት እቲ ኣዋጅ፣ ሓደ ውልቀሰብ 20 ሽሕ ናቕፋ ጥረ ገንዘብ ጥራይ ክቕይር ከምዝፍቀደሉ ስለዝገለጸ፣ እቶም ካብኡ ንላዕሊ መጠን ገንዘብ ሒዞሞ ዘለዉ ኣብ ኢዶም ከይሓውዮም ዝፈረሑ ተገልገልቲ ነቲ ገንዘብ ብንብረት ክሕዙዎ ኣብ ዘካይዱዎ ዘለዉ ጻዕሪ፣ ኣብ ርእሲ ገዛን ወርቅን ዝኣመሰሉ ንብረት ምግዛእ፣ ካርድ ቴለፎን ብብዝሒ ናይ ምዕዳግ ዝምባለ ገኒኑ ‘ሎ።

በዚ ምኽንያት፣ እቲ ንግራም 1200 ናቕፋ ዝነበረ ዋጋ ወርቂ ናብ ልዕሊ 1800 ናቕፋ ንሂሩ ከምዘሎ ‘ውን ይፍለጥ። እቲ ቀቅድሚ ‘ቲ ኣዋጅ ክኸብር ጀሚሩ ክሳብ ንሚእቲ ዶላር ናብ 4 ሽሕ ናቕፋ ወሪዱ ዝነበረ ሸርፊ ‘ውን ናብ 5 ሽሕ ናቕፋ ገጹ ክብ ኢሉ ከምዘሎ ይንገር።

ነዚ ሃንደበት ዝተኣወጀ ምቕያር ሓዱሽ ባጤራ ናቕፋ ምስ ምጥፋእ ሃለዋት ውልቀመላኺ ኢሳይያስ ኣተኣሳሲሮም ዝረኣዩዎ ተዓዘብቲ ብወገኖም፣ ህዝቢ ኤርትራ፣ ኣብዚ ናይ ምቕያር ናቕፋ ሃለውሳ ተዋሒጡ፣ ነቲ ከቢድ ፖለቲካዊ ሳዕቤን ዘለዎ ምጥፋእ ሃለዋት ኢሳይያስ ከይድህበሉ ሞ፣ ህዝቢ ኣብቲ ናይ ናቕፋ ዕግርገር ተጸሚዱ ከሎ ብድሕሪ መጋረጃ ስልጣኖም ከደልድሉ ሰበስልጣን ህግደፍ ዝኣለሙዎ ውዲት ክኸውን ከምዝኽእል ይእምቱ።

ዛጊት ብዛዕባ ሃለዋት ኢሳይያስ ጭቡጥ ሓበሬታ የለን። እቲ ኤረ ቲቢ ነቲ ኣብ ጽርግያ ብዛዕብኡ ዝጋዋሕ ዘሎ ወረ ንምህዳእ ብደረቕ ስእሊ ዝተሰነየ ዜና ርክብ ምስ ልኡኻት ቻይና ክትብል ዝዘርግሓቶ ሓበሪታ ነዚ ዝጸንሐ ምጥርጣር መሊሱ ኣግዲዱዎ ‘ሎ።

ሃለዋት ኢሳይያስ ዋላ ኳ እንተዘይተረጋገጸ፣ ከምቲ ቀዳማይ ሚኒስተር ኢትዮጵያ ነበር መለስ ዜናዊ ኣቐዲሙ ዓሪፉ ክንሱ፣ ሰበስልጣን ኢትዮጵያ ኩነታቱ ብምስጢር ሒዞም ብሕቡእ ስርዓቶም ንምድልዳል  ዝተጠቕሙሉ ሜላ፣ ሰበስልጣን ህግደፍ ‘ውን ተመሳሳሊ ስልቲ ክጥቀሙ ከምዝኽእሉ እቶም ተዓዘብቲ የጠንቅቑ።