ብምኽንያት መበል 52 ዓመት ምጅማር ብረታዊ ቃልሲ ህዝብታት ኤርትራ፡

ብደሞክራስያዊ ግንባር ሓድነት ኤርትራ /ደግሓኤ/ ዝወጸ ውድባዊ መግለጺ፡-

ባሕቲ መስከረም 1961  ህዝብታት ኤርትራ ብባዕዳውያን ገዛእቲ ዝወርዶም ዝነበረ ኩለ-መዳያዊ ግፍዕታት፡ግህሰታት ሃገራዊ ነጻነት፡ ሓርነታዊ ልዕላውነት፣ ባህላዊ ጽቕጠት፣ ምዝመዛ፣ ስእነት ፍትሕን  ርትዕን  ንሓንሳብን ንሓዋሩን ንምውጋድ ክብሉ፡  ብሰላማዊ ኣገባብ ሓቲቶምን ተቓሊሶምን ኣወንታዊ መልሲ ምስ ሰኣኑ፡ መሰሎም ብዕጥቃዊ ቃልሲ ከረጋግጹ ዝተበገሱላ ዕለት ስለዝኾነት፡ ኣብ ምዕራፍ ታሪኽ ህዝብታት ኤርትራ ዓቢ ቦታ ዝሓዘትን እትኽበርን ታሪኻዊት ዕለት’ያ።

እዚ ናይ ሰላማዊ መስርሕ ቃልሲ ጸንቂቑ ብምጥቃም ዝተጀመረ ብረታዊ ቃልሲ ናይ ህዝብታትና ግን፡ ከም’ቲ ፍትሓውነቱን ዝተኸፍሎ መስዋእትን ኣብ ሓጺር ግዜ ክዕወት ኣይበቕዐን።  ዝተማለአን ውሕስነት ዘለዎ ህዝባዊ ዓወትን  ከረጋገጽ’ውን ኣይከኣለን። ናይ’ዚ መሰረታዊ ጠንቂ ድማ፡ ኣብ ምምራሕ ሰውራና ኣብ ምጅማር ይኹን ኣብ’ቲ መስርሕ ዝተሳተፉ ፖለቲካዊ ሓይልታት፡ ክኒዮ ምርግጋጽ ሃገራዊ ነጻነት ንዝተማለኣ ህዝባዊ ደሞክራስያዊ ዕላማታት፡ ክርእን ክቕበልን ዝኽእል ፖለቲካዊ ባህርን ብቕዓትን ብሓፈሻ ብዘይምውናኖም ዝተፈጥረ ኩለ-መዳያዊ ጸገማት’ዩ።  ስለዚ ከኣ ህዝባዊ ቃልስና ኩሉ መዳያዊ መስዋእቲ ዋጋ ቃልሲ ከፊሉ ኣብ ግንቦት 1991 ባዕዳዊ መግዛእቲ ኣባሪሩ ሃገራዊ ልዑላውነት ካብ ምርግጋጽ ንላዕሊ፡ ሰብኣውን ደሞክራስያውን መሰላት ናይ ህዝብታትና፡  ቁጠባዊ ረብሓን ምዕባለን  ዘረጋግጽ መንግስቲ ክንተክል ኣይከኣልናን። ብሓጺሩ ኣብ ትሕቲ ስማዊ ሃገራዊ ነጻነት ኮይና፡ ናብ ሓድሽ መግዛእትን ጭቆናን ተሳጢሕና ንዕስራን ክልተን /22/ ዓመታት ምሉእ እናተሳቐና መጺእናን ንሳቐ ኣለናን።

ሎሚ ዓመት ጽምብል ምጅማር ብረታዊ ቃልስና ንመበል 52 ዓመት ከነኽብር እንከለና፡ ኣብ ሃገርናን ህዝብታትናን ሰፊኑ ዘሎ ኩለ-መዳያዊ ኣጸጋምን ኣስጋእን  ኩነታት ክንመዝን እንከለና ድማ፡  ህዝብታትና ሰብኣውን ደሞክራስያውን መሰል፡ ቁጠባዊ ረብሓን  ሰላምን ምርግጋእን ፍትሓዊ ምሕደራን ካብ ምስኣን ንላዕሊ፡ ብፍልጠቶም፣ ብጉልበቶም፣ ብውላዶም መሊኦም ኣብ ትሕቲ ዋንነት ናይ’ቲ ኣረሜናዊ ጉጅለ ወዲቖም እናገልገሉ፡ ዝተሓተን ዝለዓለን ደረጃ ዕድመ ዘይፈሊ፡ ብጃምላ ብረት ዓጢቖም፡ ንህግደፍ ከገልግሉ፡ ካብ ስልጣን ምስ ኣልገሰ ድማ፡  ሰላምን ምርግጋእን ከይረኽቡ ብዝዓለመ ፖለቲካዊ ውዲት፡ ዝከላበትሉ ዘለው መድረኽ’ዩ። ከምኡ’ውን ህዝብታትና ካብ ማሕበረ-ሰብ ዓለም መሰጋገሪ ሓገዝ ከይረኽቡ ተኸልኪሎም ብጥሜትን ሳዕቤናቱን  ዝሳቐይሉ፡  ናብ ስደት ብቐጻሊ ኣብ ዝውሕዝሉን፡ ንኣደራዕ ስደት እናተሳጥሑን ከም ህዝብን ሃገርን ላዕላውነቶም ሓሊዮም ንምቕጻል ኣብ ኣሰካፊ ኩነታት ኮይኖም ብሓደ ገጽ፣  በቲ ካልእ ገጽ ድማ፡ ካብ ዝወርዶም ዘሎ ጭቆናን ምዝመዛን ንምንጋፍ ክብሉ፡ ኣንጻር ምልኪ ንደሞክራስያዊ ለውጢ እናተቓለሱን’ዮም ዘጸንብልዋ ዘለው።

ኩነታት ኣረሜናዊ መንግስቲ ህግደፍ ዝምልከት ድማ፡ ከም መንግስቲ ክህሉን ከቐጽልዎን ዝኽእሉ ፖለቲካዊ ረቛሒታትን ዕድላትን እናተጸንቀቐ ውሽጣዊ ስኒትን ምትእምማንን ኣጥፊኡ፡ ክሳብ ኣብ ላዕለዋይ ጽሕፍታት ስልጣን ዝነበሩ እሙናት ኣካላቱ ራሕሪሐሞ ዝሃድምሉ፡ ኣብ’ቲ ዝተኣማመነሉ ዝነበረ ወተሃደራዊ፡ ጸጥታውን ስለያውን  ትካላቱ፡ ብሓይሊ ካብ ስልጣን ንምውጋዱ ቅሉዕ ፈተነታት ዝተገብረሉን ኣብ ከቢድ ስግኣት ዝኣተወሉን ኩነታት ይርከብ። ኣብ መሓውራቱ /ትካላቱ/ እምነት ስኢኑ፡  ንገዛእ ርእሱን፡ ኣገደስትን ተሃወስትን ዝበሃሉ ሃገራውን መንግስታውን ትካላት ብናይ ግዳም ሓይሊ ክሕሎን ክከላኸልን ዝግደደሉ ኩነታት’ዩ በጺሑ ዘሎ። ኣብ ቁጠባዊ መዳይ፡- በቲ ክኽተሎ ዝጸንሐ ገባትን ራሳይን ኣሰራርሕኡን ክዓግብ  ብዘይምኽኣሉ፡ ናይ ወጻኢ ሸርፊ ንምርካብ ዝኣወጆ ፖሊሲ” ቁጠባዊ ወፍሪ”  ፈሽሉን ተስፋ ቆሪጹን  ከም’ቲ ልሙድ ዞባዊ ሰላም ብምህዋኽ ንምጥቃም ሓደስቲ ዓሰብቲ ኣብ ምንዳይን ህዝብናን ሃገርናን ናብ ዝኸፍአ ሓደጋ ክሳጥሑ ዝገብር ኩነታት ተኸቲሉ ኣብ ፖለቲካዊ ምንቁልቋል ይርከብ ኣሎ።

እዚ ኣብ ልዕሊ ህዝብታትና  ተፈጢሩ ዘሎ ኩለ-መዳያዊ ጸገማትን ኣሰካፊ ኣንፈቱን፡ ህግደፍ ዘርእዮ ዘሎ ምንቁልቋልን ተደማሚሩ ክምዘን እንከሎ፡ ሎሚ ዓመት ካብ ዝኾነ ግዜ ንላዕሊ፡ ቀጻልነት ህዝብታትና ከም ጥሙር ህዝብን ልዕላዊት ሃገርን   ዝፈጥሮ ዘሎ ስግኣት ናብ ዝለዓለ ደረጃ  ዘበርኽን ንምዕጻፉ ሓያል ቃልሲ ከነካይድዝጠልበና ዘሎ ተርእዮ’ዩ።

– ደምበ ተቓውሞ ኤርትራ ነቲ ኣብ ልዕሊ ህዝብታትና ዝወርድ ዘሎ ጭቆናን ምዝመዛን፡ ናይ ምብትታን ሓደጋን ንምውጋድ፡ ከካይዶ ዝጸንሐን ዘሎን ኩለ-መዳያዊ ቃልሲ፡  ብኣወንታዊ ጎኑ ዝወሰድ ክተባባዕ ዘለዎን ምዃኑ ዘካትዕ ኣይኮነን።  ይኹን ደኣምበር ምስቲ ኣብ ህዝብታትናን ሃገርናን ዘንጸላሉ ዘሎ ኩለ-መዳያዊ ጸገማትን  ሓደገኛ ኣንፈትን ኣዛሚድካ ክረአ እንከሎ ግን፡ ነዚ ናይ ውድቀትን ምብትታንን ሓደጋ’ዚ ንምዕጋት ክጻወቶ ዝግባእ ተራ ኣዝዩ ንኡስ ምህላዉ፡ ካብ ውሽጣዊ  ድኽመታት ዘይተናገፈ፡ ኣብ ጉጅላውን ጃንዳውን ፖለቲካዊ ውድድርን ምጥምማትን ተቖሪኑ፡  ኣብዚ ግዜ’ዚ ክረጋገጽን ክጭበጥን ኣብ ዘይኽእል ናይ ፖለቲካዊ ስልጣንን ጠቕምን ንምርካብ ኣብ ምንዳይ ኣድሂቡ ይርከብ። ከምኡ’ውን ኣብ ክንዲ ነቶም ባዕሉ ዘቖሞም  ናይ ቃልሲ መሳርሒታት ዝኾኑ ግንባራት ዘደልድሎምን ብዘተኣማምን ኣገባብ ዘማዕብሎምን ብኣንጻሩ ክዳኸሙ ዝገብር ሓደስቲ ናይ ምትእኽኻብ ኣንፈታት ንምኽታል ዝደፍኡ መንፈሳት ኣናንጸላለውዎ ድኽመታቱ ኣብ ምእላይ ይኹን ኣብ ምምሕደር ይጽገም ኣሎ። እዚ ኣብ ደምበ ተቓውሞና  ዝረአ ዘሎ ድኽመታት፡ ደመኛ ጸላኢና መንግስቲ ህግደፍ  ከም ጽቡቕ ኣጋጣሚ ተጠቒሙ ነቲ ኣብ ልዕሊ ህዝብታትና ክፍጽሞ ዝጸንሐን ዝፍጽሞ ዘሎን ናይ ህልቂትን ዕንወትን እከይ ተግባራት ብዝኸፍአ መልክዑ ክቕጽሎ ዕድል ዝህብ ክንሃድመሉ ዘይንኽእል ወድዓዊ ሓቂ’ዩ።

ስለዚ ዝኾነ ተቓላሳይ /ተቓዋማይ/ ሓይሊ ህዝብታትናን ሃገርናን ካብ ውድቀትን ምብትታንን  ንምድሓን፡ኣብ መጻኢ፡ ሰላማዊት፡ ደሞክራስያዊት፡ ፍትሓዊትን ምዕብልትን ኤርትራ ንምህናጽ ዕላማን ባህግን ዘለዎ ኩሉ፡ ህዝብን ሃገርን ከይሓዝካ ክረጋገጽ ዝኽእል ፖለቲካዊ ስልጣን ኮነ ካልእ ረብሓታት ከምዘየለ ፈሊጡ፡ ኣብ ድሕነት ህዝብን  ሃገርን ተርኡ ክጻወት ውጹዓት ህዝብታትና ታሪኻዊ መጻዋዕታ ይገብሩልና ከም ዘለዉ ክንግንዘብ ይግባእ።

ስለዝዀነ  ደሞክራስያዊ ግንባር ሓድነት ኤርትራ /ደግሓኤ/ በዚ ታሪኻዊ ዕለት’ዚ ህዝብታትናን ሃገርናን ካብ ውድቀትን ምብትታንን ብምድሓን  ውሑስ ቀጻልነቶም ንምርግጋጽ፡ ካባና ካብ ተቓወምቲ ውድባት ብሓፈሻ፡  ኣብ ትሕቲ ዝተፈላለያ ግንባራት ዘጽለልና ከኣ ብፍላይ፡ በቶም ኣቐዲምና ዝተሰማማዕናሎም ሓባራዊ ሃገራዊ ዕላማታትን  ዘውጻእናዮም መደባትን በብግዝይኡ እናገበርናዮም ዝመጻእና ጭቡጣት ገምጋማት፡  እንኮላይ ነቲ ኣብ መጨረሻ ነሓሰ 2013 ዝገበርናዮ ገምጋምን ስምምዕን ዝሓወሰ መሰረት ብምግባር፡ ካብ ጉጅላውን ጃንዳውን ጸቢብ ፖለቲካዊ ኣረኣእያን  ሕሳባትን ብምድሓን ብቕንዕናን ሓላፍነታዊ መንፈስን ክንቃለስ ኣለና። ሕድሕድ ምትእምማን ዝፈጥር ግሉጽ መድረኻት እናፈጠርና ኣብ ሓባራዊ ጉዳይና ክንመያየጥን፡ ኣቐዲምና ብቓልሲ ዝመስረትናዮም ሃገራዊ ግንባራትና ብሓፈሻ፡ ኤርትራዊ ሃገራዊ ባይቶ ንደሞክራስያዊ ለውጢ ካኣ ብፍላይ፡ ዘጋጥምዎ ዘለው በዳህቲ ዕንቅፋታት እንዳኣለና፡ ዕውት ጉባኤ ኣካይዱ ሰፊሕ ሃገራዊ ዓቕምታት ጠርኒፉ፡ ዘተኣማምን ግንባር ብምግባር ህዝብን ሃገርን ናይ ምድሓን  ግቡእና ንምፍጻም  ብብቕዓትን ስኒትን ክንቃለስ ይጽውዕ።

. መንእሰያት ኤርትራ ኣብ ሓርነታዊ ቃልስና ካብኦም ትጽቢት ዝግበረሉ ናይ ቃልሲ ብጽሒትን ተሳትፎን የበርክቱ ብምህላዎም፡ ህዝባዊ ቃልስና ተወሳኺ ሓይልን ውሕስነት ናይ ዓወትን ክውንን ዘኽእሎ ፖለቲካዊ ኩነታት ይምዕብል ኣሎ’ዩ።  እዚ ኣወንታዊ ተራን ተሳትፎን’ዚ፡  ከም ዘለዎ ኮይኑ ግን፡ ብዝተፈላለየ ወድዓውን ባዕላውን ምኽንያታት፡ መንእሰይ ተቓላሳይ ዓቕሙ ጠሚሩ ከም’ቲ ካብኡ ዝድለ ኣበርክቶ ክገብር ዘኽእሎ ዓቕምን  ኣካቢ ውደባን  ክጭብጥ ብዘይምኽኣሉ ዝረአ ዘሎ ብኩራት ቀሊል ኣይኮነን። ስለዝኾነ ከኣ ናይ መንእሰይ ተሳትፎን ተራን ኣብ ህዝባዊ ቃልስና ብከምቲ ዝድለ ዝተወነነ ኣይኮነን ዘሎ።  ስለዚ ድማ ህዝባዊ ቃልስና ሞተር ሕብረተሰብናን ቃልስናን ዝኾነ ደፋኢማሕበራዊ ሓይሊ መንእሰይ ብከም’ቲ ዝድለ ዘይኣሳተፈን ዘይተጠቕመን ብምዃኑ ሓደ ካብ’ቲ ድኹም ጎኑ’ዩ።

በዚ ኣጋጣሚ  መንእሰያት ነዚ ዘጋጥሞም ዘሎ ወድዓውን ባዕላውን ብደሆታት እናተቓለሱ፡ ናይ መንእሰይ ዝበሃል ፍሉይ ፖለቲካዊ ዕላማን  መስመር ከምዘየለ ክርድኡ፣ መንእሰይ ጥራሕ ዝሓዘ ፖለቲካው ውድብ ክፍጠር ግድን ከምዘይኮነ ከስተውዕሉ፣ካብ ኢድ ምትእትታው ናይ ትምክሕተኛታት፡ ጸበብትን ተበለጽትን  ብንቕሓት እንዳተኸላኸሉ፡ ናይ መንእሰይ ዓቕሚ ኣብ ምጥርናፍ ዘገልግል፡ ፖለቲካ እምነት ናይ ነፍስ-ወከፍ መንእሰይ ዘይክልክል ስቪካዊ ማሕበር ድልዱል ውደባ ብምውናን ክቃለሱ ደሞክራስያዊ ግንባር ሓድነት ኤርትራ/ደግሓኤ/  ይጽውዕን የተባብዕን። ኤርትራውያን መንእሰያት ኣብ ዝገብርዎ ኩለ-መዳያዊ ናይ ቃልሲ ዕማማት ድማ፡ ዓቕሚ ብዝፈቕዶ መሰረት ክተሓባበርን  ሓቢሩ ክቃለስን ምዃኑ ይገልጽ።

. ውጹዓት ደቂ-ኣንስትዮ ኤርትራ ብውድብን ሓውሲ ውድብን ዝተፈላለዩ ፎሮማትን ኣገባብ ናይ ቃልስን ብምጥቃም ዓቢ ናይ ቃልሲ ኣበርክቶ ይገብራ ከም ዘለዋ መጠን፡  ውደባ ውጹዓት ደቂ-ኣንስትዮ ክድልድልን ክሰፍሕን ተደላይነቱ ዘይተሓትት ስለዝኾነ፡ ውዳበኤን ብዝያዳ ከደልድላን ከስፈሓን ኣብ ህዝባዊ ቃልስና ተሳትፎአን ከዕዝዛን ንኽበቕዓ ኩሉ ተቓላሳይ ኣወንታዊ ናይ ቃልሲ  ደገፉ ከበርክተለን ከም ዝግባእ ውድብና ደሞክራስያዊ ግንባር ሓድነት ኤርትራ ይኣምን፡ምሰኣተን ሓቢሩን ተደጋጊፉን ኣንጻር ኣረሜናዊ ስርዓት ህግደፍ ክቃለስ ድልዊ ምዃኑ ድማ በዚ ኣጋጣሚ ታሪኻዊ ዕለት ከረጋገጽ ይፈቱ።

ኣብ መደምደምታ፡-

ውጹዓት ተቓለስቲ ህዝብታት ኤርትራ! ኣብ ልዕሌኹም ዝወርድ ዘሎ ግህሰት ሰብኣውን ደሞክራስያውን መሰል፣ቁጠባዊ ምዝመዛን ራስያን ድኽነትን፣ ባህላውን መንነታውን ብረዛን ዝርገት ኣድልዎ ብልሽውናን፣ ግዱድ ስደትን ፍርሰትን፣ ምሕራም መንፈሳውን ነገራውን እምነትን ነጻነትን፣….ወዘተ በቲ ካብ ኣብራኽኩም ዝወጸ፡ ሰብኣዊ ባህርን ስነ-ምግባርን ህዝባውን ሃገራውን ዕላማን ዘይብሉ ኣረሜናዊ ጉጅለ ህግደፍ ምዃኑ መረጋገጺ ዘየድሊዮ ሓቂ’ዩ።  መፍትሒኡ ድማ፡  ከም’ቲ “ንእሾኽ ተውጻኣ እሾኽ” ዝበሃል ምስላ  ነዚ ዓመጽን ጎነጽን ጥራሕ  ዝቛንቋኡ ጉጅለ  በቲ ንሱ ዝርድኦ ቋንቋ  ጀሚርክሞ ዘለኹም ዓመጻዊ ናይ ሓርነት ቃልሲ ምውጋድ ጥራሕ ስለዝኾነ፡ በዛ ታሪኻዊት ዕለት እዚኣ ደሞክራስያዊ ግንባር ሓድነት ኤርትራ/ደግሓኤ/ ናይ ቃልሲ ዕጥቅኹምን ኒያትኩምን ኣደልዲልኩም ክትቃለሱ  ይጽውዕ።

ዕላማታት ባሕቲ መስከረም መሊኦም ንክዕወቱ ንቃለስ!

ዓወት ንሓርነታዊ ቃልስና!

ደሞክራስያዊ ግንባር ሓድነት ኤርትራ /ደግሓኤ/

01 መስከረም 2013