መንግስቲ ዓዲ እንግሊዝ ኣብቲ ኣቀራርብኡ ይኹን ውጽኢቱ ዝንቡዕ ኮይኑ ብምርካብ ዝተነጽገ ጸብጻብ ደንማርክ ተመርኵሱ ብዘዳለዎ መምርሒ ንኤርትራውያን ስደተኛታት ዑቕባ ይነፍጎም ከምዘሎ ዘ ጋርድያን ሎሚ ሓሙስ ኣብ ዝዘርግሖ ዜና ሓቢሩ።

ዘ ጋርድያን፣ እቶም ሆም ኦፊስ ዓዲ እንግሊዝ ነቲ መርርሒ ምምማይ ኤርትራውያን ስደተኛታት ኣብ ምውዳድ ኣጸቢቑ ንዝተወከሶ ጸብጻብ ደንማርክ ዘዳለዉ ክኢላታት ንገዛእ ርእሶም፣ እቲ ዘካየዱዎ መጽናዕቲ ዘይጭቡጥን ዝንቡዕን ምንባሩ ተኣሚኖም ነብሶም ካብቲ ሰነድ ኣግሊሎም እናሃለዉ፣ ሆም ኦፊስ ነቲ ዘይርጡብ መምርሒ ገና ይጥቀመሉ ከምዘሎ የገንዝብ።

በዚ መሰረት ኣቐዲሙ 73 ሚእታዊት ተቐባልነት ዝረክብ ዝነበረ ሕቶ ዑቕባ ኤርትራውያን 34 ሚእታዊት ጥራይ ኮይኑ ምህላዉ ‘ውን የረድእ።

እቶም ን 20 ዓመታት ኣብ ኣገልግሎት ስደተኛታት ደንማርክ ዝዓየዩ፣ ኩነታት ኤርትራ ክዕዘቡ ዝተላእኩ ክልተ ምኩራት ሰራሕተኛታት፣ ክፍሊ ኤምግሬሽን ደንማርክ ንውጽኢት ናይቲ ጸብጻብ ኣብ ክዉንነት ኤርትራ ተመርኵሱ ዘይኮነስ ንኤርትራውያን ስደተኛታት ንምንጻግ ብዝጥዕሞ መንገዲ ከዳልዉዎ ጸቕጢ ከምዝገበረሎም ብምምልካት ብወለንትኦም ናይ ስራሕ ቦታኦም ከምዝገደፉዎ ‘ውን እቲ ጋዜጣ የፍልጥ።