ሓደ ካብቶም ንኤትራ ኣገልግሎት ዝህቡ ዝነበሩ ቀንዲ መጓዓዝያ ነፈርቲ መንገዲ ኣየር ቀጠር፣  ካብ ፈለማ ወርሒ ታሕሳስ ኣትሒዙ፣ ካብ ደውሓ ናብ ኣስመራ ዘካይዶ ዝነበረ ስሩዕ በረራ፣ “ስርሒታዊ ምኽንያታት” ዝብል ዘይንጹር ሓፈሻዊ ምኽንያት ብምሃብ ከቋርጾ ምዃኑ ሓቢሩ።

እቲ 4 ታሕሳስ በረራኡ ደው ከምዘብል ዝገለጸ መንገዲ ኣየር ቀጠር፣ ቅድሚ ዚ ዕለት’ዚ ንዘሎ ግዚያት ትኬት ዘቝረጹ ዓማዊሉ በቲ ለውጢ ከምዘይትንከፉ ብምርግጋጽ፣ ኣብ ኣስመራ ዘሎ ቤትጽሕፈቱ ንዓማዊሉ ኣማራጺ መገሻታት ኣብ ምውዳድ ንምትሕብባር ክሳብ 27 ለካቲት 2017 ኣግልግሎት ክህብ ምዃኑ ኣገንዚቡ።

መንገዲ ኣየር ቀጠር ልክዕ ኣብ ኤርትራ ናይ ክልተ ዓመት ኣገልግሎት ድሕሪ ምሃብ እዩ ስርሑ ደው ዘብል ዘሎ።

ድሕሪ ናጽነት ኣብ ኤርትራ ኣገልግሎት ዝጀመራ ሓያለ መንገዲ ኣየራት ኣገልግሎት ከምዘቋረኣ ይፍለጥ። ሓንቲ ካብኣተን መንገዲ ኣየር ስዑዲ እያ። ኣብ ስዑዲ ዓረብ ዝርከቡ ኤርትራውያን ቀጥታዊ በረራ ብምዘይምርካቦም፣ ነቲ ናብ ኣስመራ ዝገብሩዎ ዝነበሩ ናይ 55 ደቓይቕ ጉዕዞ ብዙሕ ገንዘብን ግዜን ብምጥፋእ ተዃሊሎም ይገብሩዎ ምህላዎም ነቲ ኣብ ዝሓልፈ ቅንያት ኣብ ጀዳ ኣኼባ ዝገበረሎም ልኡኽ ምልካዊ ስርዓት ኢሳይያስ ወለንኪኤል ኣብርሃ ኣሰሚዖም እዮም።

እቲ መንግስቲ እየ ዝብል ምልካዊ ስርዓት ኢሳይያስ፣ ድሕሪ 25 ዓመታት ናጽነት ንኤርትራውያን ብተዛማዲ ዝሓሸ ኣገልግሎት መንገዲ ኣየር ከውሕስ ብዘይምኽኣሉ ዘኽንኽ እዩ። ቅድሚ ግጭት ኤርትራን ኢትዮጵያን፣ እቲ ኣብ ኣስመራ ዝነበረ ቤትጽሕፈት መንገዲ ኣየር ኢትዮጵያ ካብ ኩሎም ‘ቶም ኣብ ኢትዮጵያ ዝነበሩ ጨንፈራቱ ዝበዝሖ ገያሾ ብምንእንጋድ ዝለዓለ መኽሰብ ብምርካቡ ብተደጋጋሚ ይሽለም ከምዝነበረ ይፍለጥ።