ሕብረት ኤውሮጳ ዘይምርግጋእን ዘይስርሩዕ ዋሕዚ ስደትኛታትን ቀርኒ ኣፍሪቃ ንምዕጋት ናይ 170 ሚልዮን ይሮ ወፍሪ ከካይድ ንዘውጽኦ ውጥን ከምዘጽደቖ ብቕድሚ ትማሊ ካብ ብራስለስ ኣብ ዘወጽኦ ጋዜጣዊ መግለጺ ኣፍሊጡ።

እቲ ሓበሬታ፣ ሕብረት ኤውሮጳ፣ ዘይምርግጋእ ንምህዳእ፣ ከምኡ ‘ውን ጠንቂ ስደትን ግዱድ ምዝንባልን ሃገራት ቀርኒ ኣፍሪቃ ንዝኾኑ ሰበባት ንምግጣም 11 ናይ ተግባር ውጥናት ዝትግበረሉ ማዕከን ሕብረት ኤውሮጳ ኣዋዲዱ ከምዘሎ እዩ ዝጠቅስ። 25 ሚልዮን ይሮ ካብቲ ምወላ ንኣብነት፣ “ኣብ ኤርትራ፣ ጅቡትን ኬንያን ማሕበረ -ቁጠባዊ ጸገማት መንእሰያት ንምፍታሕ ናይ ስራሕ ዕድላት ኣብ ዝፈጥሩ ፕሮጀክትታት ክውዕል እዩ” ይብል።

ይኹን’ምበር ኣብ ናይ ኤርትራ ኩነታት ኣተኵርና እንተተመልከትና፣ እቲ ንኤርትራውያን መንእሰያት ሃገሮም ክገድፉ ዘገድዶም ዘሎ ዝዓበየ ጠንቂ፣ ብልሹው ውልቀምልካዊ ምሕደራ ናይቲ ስርዓት እዩ። እቲ ማሕበራዊ ቁጠባዊ ጸገም ንገዛእ ርእሱ ውጽኢት ናይዚ ውድቀት’ዚ እዩ።

ሕብረት ኤውሮጳ፣ ነዚ ስጉምቲ ‘ዚ ዝወስድ ዘሎ፣  ብዝያዳ ነቲ ኣዕለቕሊቑዎ ዘሎ ዋሕዚ ስደተኛታት ቀርኒ ኣፍሪቃ ንምዕጋት ኳ እንተኾነ፣ ነቶም ቀንዲ ጸገማት ብግቡእ ኣብ ምልላይ ድሮ ፈሺሉ ስለዘሎ ዕላምኡ ኣብ ምውቃዕ ክዕወት ከምዘይክእል ተዓዘብቲ ይእምቱ።