ተጋዳላይ ኣርኣያ ካሕሳይ ማሉ ካብ ኣዲኡ ወ/ሮ ትበርህ ኣብርሀን ኣቦኡ ብላታ ካሕሳይ ማሉን ብዕለት 13/12/1947 ኣብ ደቂ ጽንዓ ተወልደ። ክሳብ ሻሙናይ ክፍሊ ኣብ ድባርዋ ተማሂሩ ካልኣይ ደረጃ ትምህርቱ ኣብ ኣስመራ ዝርከብ ቤት ትምህርቲ ጥልያን(ቦተጎ) ተማሂሩ መሃንድስ(ጆመትራ) ኮይኑ ተመረቐ።

ስውእ ተጋዳላይ ኣርኣያ ካሕሳይ ማሉ ብዝነበሮ ብርቱዕ ፍቕሪ ሃገር ተደሪኹ ብ1975 ኤርትራ ሃገሩ ካብ መግዛእቲ ንምልቓቕ ምስ ተጋድሎ ሕርነት ኤርትራ(ተ.ሓ.ኤ) ተሰለፈ። ካብ 1978 ጀሚሩ ክኣ ኣብቲ ኣብ ሮማ ዚርከብ ቤት ጽሕፈት ተ.ሓ.ኤ. ብትግሃት ሰርሐ። እዚ እንዳገበረ ኣብ ኩሉ መዳያት መነባብሮ ኤርትራውያን ኣብ ሮማ ኢጣልያ ይነጥፍ ነበረ። ወገን፡ ሃይማኖት፡ ዓሌት ከይፈለየ ንኾሎም ኤሪትራውያን በመገዲ ማሕበረ ሰብ ኤርትራ ኣብ ሮማ ከምኡ ክኣ ብናቱ ተበግሶ ኣብ ምምሃር መንእሰያትን ቆልዑን፡ ነቶም ኣብ ኣርያፖርቶ ብፖሊስ ዚተሓዙ ዝነበሩ ስደተኛታት ኤርትራውያን ኣብቲ ዘለውዎ ቦታ ከይዱ ብቋንቋን ብኻልእ መልክዕን ብምትሕብባር ከኡ ድማ ኣብ ዝተፈላለየ ካልእ ጕዳያት ደኺመ ከይበለ ይጓየ ነበረ።

ስውእ ተጋዳላይ ኣርኣያ ካሕሳይ ካብ 1996 ጀሚሩ ኣብ ቤት ጽሕፈት ማሕበር ሰራሕተኛታት ኢጣልያ (CSL) ኪሰርሕ ጸኒሑ ብሃንደበት ሕማም ብዕለት 10/10/2013 ካብዛ ዕለም ብሞት ተፈልየ። ስነ ስርዓት ቀብሩ ብዕለት 26/10/2013 ኣብቲ ኣብ ሮማ ዝርከብ መቓብር(Prima Porta) ተፈጸመ።

ተጋዳላይ ኣርኣያ ካሕሳይ ዓቃል፡ ለዋህ፡ ወገን ከይፈለየ ንዅሉ ማዕረ ገሩ ዚቐርብ ፍሉጥ ሰብ ነበረ። ንስድራ ቤቱ ጥራይ ዘይኮነ ንዅሎም ተቐማጦ ሮማን ንብጾቱን ጎዲሉዎም ኢዩ።

ከም ዝፍለጥ ኣቡኡ ብላታ ካሕሳይ ማሉ ኤርትራ ንኤርትራውያን ይብሉ ከምዝነበሩ ታሪኾም ብጽሐፍ ሰፊሩ ይርከብ ሕጂ’ውን ታሪኽ ስዉእ ተጋዳላይ ኣርኣያ ካሕሳይ ማሉ ንዘልኣለም ክዝከር ኢዩ።

ዘልኣለማዊ ዝኽሪ ንስውኣትና!

ብጾቱ ካብ ሮማ