ሓድሽ ስናዕ፡  ማሕበር ኤርትራውያን ምንቅስቓስ ንለውጢ ፡  ንጥፍኣት ስምረት ዝዓለመ ድዩ?

ኣብ መደበር ኣሰና ብኤርትራውያን ምንቅስቓስ ንለውጢ(EMC) ኢሉ ባዕሉ ዝሰየመ ማሕበር ኣውጺእዎ ዘሎ መግለጺ ዘስደምም ኮይኑ ረኺበዮ፡ ፤ ጽሑፉ ክጅምሮ ከሎ ብጸለመ ስለ ዝጀመሮ መጀመርያ ጉጅለ መንእሰያት ህግደፍ መሲሉኒ ንሓደ ሓደ ሰባት ደዊለ መንነቶም እንተ ሓተትኩ ግን እቲ ዝሓሰብክዎ ኣብ ሽም ተጋግየ ከምዝነበርኩ እኳ እንተፈለጥኩ ኣብ ትሕዝቶ እቲ ጽሑፍ ግን ወሪድዎም መንእሰያት ህግደፍ ክሳብ ክንድዚ ሽርሒ ካበይ ኣምጺኦሞ ዘብል ኢዩ፡ ፤እዞም ኤርትራውያን ምንቅስቓስ ንለውጢ ብዝብል ሽም ከም ከልቢ ዝነብሑ ዘለዉ መንዮም? ክሳብ ክንደይ ብዝሒ ኣለዎም? ኣበይ ኢዩ ቤት ጽሕፈቶም? ንመን’ከ ይውክሉ? ዕላምኦም’ከ እንታይ ኢዩ? ብመጀመርያ ኣቶ ኣማንኤል ኢያሱ እዚ ከምዚ ዓይነት ጽሑፋት ክመጾ ከሎ መርሚሩን ኣጣሊሉን ድዩ ዘውጽኦ? ንሱ’ኸ ዝፈልጦ ነገር ኣሎ? እዞም ዝሓቱ ዘለዉ መንነቶም መን ምዃኖም ይፈልጥ’ዶ ይኸውን? ኣብቲ ኣብ ደብረ ዘይቲ ዝተኻየደ ጉባኤ ተሳቲፎም ድዮም? ዝብሉ ብዙሓት ሕቶታት ካብ ህዝቢ ይሕተቱ ኣለዉ? አቶ ኣማንኤል ኢያሱ ከም ጋዜጠኛ መጠን ነዚ ከጻርን ብሓቀኛ መንገዲ ከውጽኦን ይግብኦ ይመስለኒ፡ ፤ ኣሽማቶም ዘይንፈልጦ ተሓቢኦም ንዝጽሕፍዎ ኣዕናዊ ጽሑፋት ግን ህዝቢ ክጎድእ ስለ ዝኽእል ኣቶ ኣማንኤል ከም ደላዪ ለውጢ መጠን ዝወጽኦ ጽሑፋት ሽምን መንነትን ዘለዎ ክኸውን ይግባእ አብል፡ ፤

እዚ ሓድሽ ስናዕ ጉጅለ ዝፍንዎ ዘሎ ሓሶትን ጸለመን መንን ካበይን ከምዝኾነ ክንግምቶ ዘጸግም ኣይኮነን፡ ፤ ማሕበር መንእሰያት ንድሕነት ሃገር ክምልሰሉ ዘለዎ ጉዳይ እኳ እንተኾነ ንሕና ከም ህዝቢ ግን ተዓዘብቲ ክንከውን ምርጫና ኣይኮነን፡ ፤ ኣንጻር ስምረት ተላዒሉ ዘሎ ናይ ኣጥፊእካ ጥፋእ ጸለመን ሓሶትን ከምቶም ቅድሚ ሕጂ ዝሓለፉ ሓሰውትን ቀጠፍትን ክሓልፉ ምዃኖም ዘጠራጥር የብሉን፡ ፤ አቲ ዘሕዝን ንምንታይ ኣብ ድሮ ጉባኤ ስምረት ከምዚ ዓይነት ገስረጥ ስራሕ ይስራሕ ኢዩ፡ ፡ 16 ኣዋርሕ ኣበይ ከምዝነበሩ ዘይፍለጡ ሎሚ ደኣ ነጢሮም ንስምረት ከም አውራጃዊት ክውንጅልዋ ምስ ምንታይ ይቑጸር? ስምረት እግሪ ተኺላ ኣብ ምስጓም ዝበጽሓትሉ እዋን እዞም ሰባት እዚኣቶም ናብ ፍሑኽ ፍሑኽ ክመልስዋ ዓቢ ጻዕሪ የካይዱ ኣለዉ፡ ፤ እቲ ሓቂ ግን እግሪ ዝተኸለ ቆልዓ ናብ ፍሑኽ ፍሑኽ ክምለስ ከምዘይክእል ፈሊጥና ስምረት እውን ካብ እግሪ ምትካል ሓሊፋ ስጉምታ ቅልጣፌ ወሲኻ ትሕንበብ ከምዘላ ክስቆሮም ይግባእ፡ ፤

ንስምረትን ንኣቦ መንበር ፈጻሚት አካልን ምስ ጉጅለ ህግደፍ ምውድዳር ክሳብ ክንደይ ሕሱራት ምዃኖም ኢዩ ዝገልጽ፡ ፡  ቃልሲ ትኸዶ ኢኻ እምበር ኣይመጻካን ኢዩ፡ ፤ስምረት መራሕታ ኣብ ባይታ ኣውሪዳ ትቃለስ ኣላ፡ ፤ ስምረት ቃልሲ ሕጽኖት ከምዘይኮነ ኣሚና መራሕታ ኣብ ዶባት ኢትዮ ኤርትራ ሰዲዳ ብኽያት ህዝብና ሰሚዓ መፍትሒ ክትደልየሉ ለይትን መዓልትን ትጽር ኣላ፡ ፤ እዞም “ኤርትራውያን መናሰያት ንለውጢ ” ኢሎም ንባዕሎም ዝሰየሙ ስኑዓት ውልቀሰባት መጀመርታ ሃየ ኣብ ባይታ ውረዱ፡ ፤ቃልሲ ከም ሽሙ ቃልሲ ኢዩ፡ ፤ ኣብ ዊኒፐግ ካናዳ ተሓቢእካ ቁንጣሮ ሰባት ኣኣዲምካ ዝግበር ዘሎ ጸለመን ሓሶትን ስጉምቲ ከኺደኩም ከምዘይክእል ክትፈልጡ ይግብኣኩም፡ ፡  እቲ ዘሕዝን ከኣ መዝሙር ህግደፋውያን ተለቂሕካ ን ስምረት ብኣውራጃውነት ክተጸልማ ምፍታን ዘይኤርትራውነትኩም ዝገልጽ ኢዩ፡ ፤ ዝኾነ ኤርትራዊ ብኣውራጃ ይኹን ብብሔር ክቃለስ መሰሉ ምዃኑ ዘይምፍላጥኩም ተሕዝኑ፡ ፤ ጉጅለ ህግደፍ ኣከለ ጉዛይ ኢዮም ክብል ንዓመታት ዝሰርሓሉ ፍሹል ሜላ ንስኻትኩም ሰናኒዕኩም ክትጥቀምሉ ምፍታንኩም ክሳብ ክንደይ ሕሰም ህዝብና ዘይርድኣኩም ምዃኑ ኢዩ ዘረድእ፡ ፤

ንኣቦ መንበር ፈጻሚት ኣካል ብትውልዱ ዓዱ መዝሚዝኩም ኣንጻር ስምረት ዘመተ ምክያድኩም ተረዲኡና ኣሎ፡ ፤ ኣቦ መንበር ስምረት ኣክለጉዘታይ ክኸውን ብአምላኽ ዝተዋህቦ ጸጋ ምኳኑ ክርዳአኩም ኣለዎ ፡ ፤ኣከለ ጉዘታይ ስለዝኮነ ክቃለስ የብሉን ዝብል ሕሙም ኣተሓሳባኹም ካብ ናይ ህግደፋውያን ኣተሓሳስባ ፍልልይ የብሉን፡ ፤እቲ ሃዲሙ ዘሎ ኣቦ መንበር ባይቶ’ኸ መን’ዩ ጻድቕ ጌርዎ? ምስ አቦ መንበር ፈጻሚት አካል ክሰርሕ ዘይከአለሉ ምኽንያት ብወግዒ ክገልጽ መዓንጣ ስኢኑ ከብቅዕ ብድሕሪ መጋረጃ ኮይኑ ኣቦ መንበር ስምረት ኣውራጃዊ ኢዩ ክብሎ ክሳብ ክንደይ ናይ ምሁር ደንቆሮ ምዃኑ ኢዩ ዘረድእ፡ ፤ሽሕ አኳ ባአውራጃን ብሔረን ምቅላስ ነውሪ እንተ ዘይኮነ ስምረት ግን ኣውራጃ የብላን፡ ፤ ስምረት ኣብ ሓድነትን ፍቕርን ህዝቢ ኤርትራ አሚና ኣብ ዓድና ብልዕልና ሕጊ ዝግዛእ መንግስቲ ንኽቐውም እትቃለስ ዘላ ህዝባዊት ማሕበር ኢያ፡ ፤ ስምረት ካብ ህዝቢ ንህዝቢ አብ ህዝቢ ተጠኒሳ ዝተወልደት ራእይ ዘለዋ ማሕበር ኢያ፡ ፤ ካብ ኢትዮጵያ ሃዲምካ ቁንጣሮ መንእሰያት ብዓርከይ ዓርክኻ ሓባቢልካ ንስምረት ክትቆጺ ምፍታን ዝፈሸለ ህግደፋዊ ጠባይ ኢዩ፡ ፤ ኣቦ መንበር ባይቶ ሽግር እንተዝህልዎ ንቦርድ ስምረት ኣኼባ ጸዊዑ ብሕጋዊ መንገዲ ፍታሕ ክረክብ እንተዘይተኻኢሉ ከኣ ህዝቢ ዝሃቦ ሓላፍነት ብሕጋዊ መንገዲ ከረክብ ይግብኦ ኔሩ፡  ንሱ ግን ከም ቆልዓ ረጥሪጥዎ ኢዩ ዝኸደ፡ ፤ስምረት ናይ ዕቁብ ማሕበር ኣይኮነትን፡ ፤ ስምረት ኣብ ቤላ ቤለው እትኣምን ናይ ሃደምቲ ማሕበር ኣይኮነትን፡ ፤ ኣቦ መንበር ስምረት ከኣ ኣብ ዕላምኡ ኣሚኑ ንዝመጾ ዕንቅፋታት ኣብቲ ዘለዎ ቦታ ኮይኑ ደኣ ይምክቶ እምበር ሓዲሙ ንኣሜሪካ ኣይመጸን፡ ፤ይኣክል ጸለመ በጃኹም!!!

ኣብ መወዳእታ ክብሎ ዝደሊ ስምረት ጉባኤ ክትገብር ትሸባሸብ ኣላ፡ ፤ስምረት ጉድለታታን ሕጽረታታን ገምጊማ ዝእረሙ ኣሪማ ናብ ፍልይ ዝበለ መድርኽ ክትሰጋገረሉ እትኽእል መንገዲ ክትሕንጽጽ ይግብኣ፡ ፤ ስምረት ናይዞም ኣብ ሃለውለው ጊዝይኦም ዘጥፍኡ ዘለዉ ሰባት ንጎድኒ ገዲፋ ኣብ ሽግር ህዝብና ክተተኩርን መፍትሒኡ ክተናድን ኣለዋ፡ ፤ ስምረት ዝበዝሐ ክፋል መንእሰይ ኤርትራ እትመርሕ ማሕበር ከምዝኾነት መጠን ብተግባር ኣብ ባይታ ንጉጅለ ህግደፍ ክትገጥም ምዃና ንህዝቢ ክትገልጽ ኣለዋ፡ ፤ ስምረት ምስቶም ኣቐዲሞም ኣንጻር ህግደፍ ብረት ኣሎዒሎም ዘለዉ ከምእኒ ብሔረ ሳሆ፡  ኩናማ፡  ዓፋር፡  ሰራዊት ሕድሪ ሓባራዊ፡   ግንባር ፈጢራ ክትሰርሕ ጻዕትራት ክተካይድ ይግብኣ፡ ፤ ስምረት ነዚ ንርእዮ ዘለና ሸንኮለል ፖለቲካ ዝነደዩ ባአታታት ኣቃልቦ ከይሃበት ብግብሪ ኣብ ባይታ ምስ ህግደፍ ክትገጥም ዘኽእላ ቅድታት ክትሕንጽጽ ይግብኣ፡ ፤ስምረት ንነፍሲ ወከፍ ዝኾረየ ሰብ ወይ ጉጅለ ክተስተናግድ ኣይትኽእልን ኢያ፡ ፤ ስምረት ሓርነትን መሰልን ህዝቢ ክትመልስ እትቃለስ ዘላ ማሕበር እምበር ኣብ ሰማይ ዘሎ ደበና ንስልጣንን ዘውድን እተቋምት ማሕበር ኣይኮነትን፡ ፤ መንእሰይ ወለዶ ነዚ ኣሚንካ ኣብ ጎድኒ ስምረትካ ኮንካ ቃልስኻ ክትሐይል ህዝቢ ይሓተካ ኣሎ፡ ፤ ነዞም ገጽን ሽምን ዘይብሉ ጽሑፋት ኣብ አሰና ብተደጋጋሚ ዘውጽኡ ዘለዉ ናይ ሓድነትና ዘረግቲ ምስ ጉጅለ ህግደፍ ሓዊስካ ክትጉሕፎም ኣለካ፡ ፡ ብሽም መንእሰያት ኤርትራ ዝወጽእ ጸለመን ዘይቅዱስ ወፍርን ይኣክል ክትብሎም ይግብኣካ፡ ፤ህዝቢ ኤርትራ መድሓኒ ይደሊ ኣሎ፡ ስምረት ከኣ ሽግር ህዝብና ተረዲኣ ኣብ ባይታ ላዕላዋይ መሪሕንረታ ልኢኻ ትንቀሳቐስ ኣላ፡ ፤ ስምረት ካብ ካልኦት ፍልይ ዘብላ ላዕለዋይ መራሒኣ ኣብ ዶባት ኤርትራ ቤት ጽሕፈቱ ከፊቱ ንጉጅለ ህግደፍ የሻቕሎም ከምዘሎ ተረዲኡና ኣሎ፡ ፤ አዞም ንስምረት ክብትኑ ዝደልዩ ዘለው ካብ ህግደፍ ተፈልዮም ዝረኣዩ ኣይኮኑን፡ ፤ስለዚ ህግደፍ ኣተሓሳስባ ካብ ኮነ ዝኾነ ምስ ህግደፋውያን ዝመሳሰል ኣተሓሳስባ ዘለዎ ከኣ ህግደፍ ኢዩ፡ ፤ ናይ ህግደፍ መዝሙር ዝደግም ኩሉ ህግደፍ ኢዩ፡ ፤ ህግደፍ ኣውራጅሳውያን መውጽኢት ኣፉ ኢያ፡ ፡  እንሆ ከኣ ሕጂ ብሽም ደለይቲ ለውጢ ነዚ ኩሉ መንእሰይ ኤርትራ ኣውራጃዊ ክብልዎ ንሰምዕ ኣለና፡ ፤ ስምረት ካብ ጫፍ ናብ ጫፍ ኤርትራ ኣስሚራ ንዲሞክራሲያዊ ለውጢ ትቃለስ ኣላ፡ ፡  በዚ ሓሚሙ ንስምረት ኣውራጃዊት ዝብላ ግን ዝነደየ ናይ ሓንጎል ሓማ፣ም ዘለዎ ጥራሕ ኢዩ ክኸውን ዝኽእል፡ ፤

ፍትሒ ይንገስ

ወልዱ ተኽለ