ህዝቢ ኤርትራ፡ ይዝከረካ’ዶ ግንቦት 91 ብሓጎስ ክንዘልል

ካብ ምንጋጋ ሓርገጽ ወጺና ካብ ጸልማት  መስገደል

ተጋደልቲ ሓቑፍና ብዓውታ ናጽነት ጥዕምቲ ኢልና ክንዕልል

መግዛእቲ ኣፋኒና  ኣውዳውና ዘርጊሕና ናጽነት  ክንቅበል፡፡

ህዝቢ ኤርትራ፡ ይዝከረካ’ዶ ግንቦት 91፡ ክንምሕል ንፍትሒ ማዕርነት

ሕድሪ ክንፍጽም መብጽዓ ስውኣት

ብሓባር ክንምርሽ ንሰላም ንልምዓት

ብኩርዓት ክንነብር ብሓጎስ ብጽንዓት።

ግንቦት 91፡ ነዚ ዲኺ መጺኽና ንውርደት ድኽነት

ኣብ ክንዲ ናጽነት ክንሙቋሕ ብሰንሰለት

ከይሞትና ክንቅበር ክንኣቱ ኣብ ደልሃመት

መን’ዩ ጠሊሙ መብጽዓ ስወኣትና ክንሕረም ቅሳነት።

ግንቦት 91 ንገርና መን’ዩ ፈሪዱና ክንክደን ካባ ሓዘን

ሕድሩ ከይትግበር ስውእ ከይቀስን

ጥሙይ ከይዕንገል እቶትና ከይስስን

ከይንሰምር፡ ሰላም ከይሰፍን-ነኻሲ ጡብ ኣደ መን’ዩ መን።

ኣቦ ኣደ ስውእ ኣብ ዕጹው ቤት ተኾርሚኻ ደባሲ ስኢንካ

ዝጥውረካ ውላድካ ቀቢርካ በረኻ ኣስፊርካ

ኣብ ጥሙይ ከብድኻ ብይንኻ ክትነብር ተፈሪድካ

ናተይ ዝበልካዮም  ክኣስሩኻ ክገፍዑ፡ ክንዲ ዘኾለስካ ኢድካ ተነኺስካ።

ናይ ትማሊ  ብርሃንካ ነበር ኮይኑ- ብጸልማት ተሸፊኑ

ናይ ትማሊ ሕልምኻ ብዘይ ኣሰር በኒኑ-መኺኑ

ግርማኻ ተቀንጢጡ ኣዳራሽካ ዓንዩ ዳስካ ቃዚኑ

ግንቦት 91 ሕሰም ወሊዳ ሽልማታ ጥልመት ኮይኑ።

ህዝቢ ኤርትራ፡  ሓርነት ኣይረኸብካን ዓስቢ መስዋእትኻ

ሩፍታ ኣይተዓደልካን  ዋጋ እምነትካ ከልበትበትካ

ግን፡ ኣብ ስቃይ ክትነብር ኣይተረገምካን በይንኻ

ኣብ ሓንቲ ጎደና ንሓደ ዕላማ ብሓባር እንተመሪሽኻ

መዓልቲ ክመጽእ’ዩ ዘረጋግጽ ክብረትካ ሓርነትካ- ብኽቡር መስዋትኻ።

ግንቦት 91 ዝተበታተና ስድራቤታት ኣኻኽብልና

ብዝሓለፈ ይኣክል በልና ኣእዳውኪ ዘርግሕልና

መዓትና ኣቁርርልና ብስም ኩሎም ሰማእታት ደብስና

ሓቀኛ ግንቦት ተመለስና ናይ መዋእል ቅሳነት ትኸልልና ኣብ ሃገርና።

 

ጽላል ካብ ሕቡራት መንግስታት ኣመሪካ (ግንቦት 2015)