ሓላፊ ወተሃደራዊ መጓዓዝያን ሎጂስትክስን ህግደፍ፡ ከምኡ ‘ውን ናይ ቀረባ ዓርክን ተለኣኣኽን ውልቀመላኺ ኢሳይያስ ኣፈወርቂ ዝነበረ ወልዱ ባርያ ኣብ ዝሓለፈ ሰሙን ከምዝተኣሰረ ምንጭታት ሓቢሮም።

ምኽንያት መእሰሪ ወልዱ ባርያ ኣይተፈልጠን። ኢሳይያስ ኣፍወርቂ፡ ክሳብ ዝምነዎ ንዝተጠቕመሎም እሙናት ኣገልገልቱ ግዜ ሓልዩ ናይ ምእሳር ኣመል ከምዘለዎ ግን ብተደጋጋሚ ተራእዩ እዩ።

ወልዱ ባርያ፡ ሳላ’ቲ ምስ ኢሳይያስ ዝጸንሖ ጥቡቕ ዕርክነት፡ ዋላ ብደረጃ መዓርግ ጀነራል ከምኣዘዝቲ ሰራዊት ንዝሰርሑ ላዕለዎት ሓለፍቲ ከይተረፈ መሊኹዎም ኳ እንተጸንሐ፡ ከምቶም ዝቐደሙ ገንሸላት መዓልቱ ኣኺላ፡ ናይ ቀይዲ ሪጋኣኡ በጺሑዎ ከምዘሎ እቶም ምንጭታት የረድኡ።

ኣብ ቦታ ወልዱ ባርያ፡ ሓላፊ ከቢድ ብረት ዝነበረ ወዲ ሞኬ (ጸሃየ መኮነን) ክሽየም ከሎ፡ ኣብ ቤት ማእሰርቲ ህግደፍ ተኣሲሩ ክላዲ ዝጸንሐ ሰለሙን ራሻይዳ ኸኣ፡ ከም ሓላፊ ከቢድ ብረት ንወዲ ሞኬ ተኪኡዎ ከምዘሎ ተፈሊጡ።

ወልዱ ባርያ፡ ከም ሓላፊ መጓዓዝያን ሎጂስትክንስን ምክልኻል፡ ነቲ ኣብ ኤርትራ ዝኸበረ ንብረት (commodity) ኮይኑ፡ ብኩቦን ዝማቓራሕ ነዳዲ ናይ ምቍጽጽጻር መዝነት ‘ውን ነይሩዎ እዩ። ኢሳይያስ ኣብ ካታሎግ ንዘዝረኣዮ ኣጽዋር ክሽምት ንወጻኢ ብብዝሒ ከምዝተላእከ ‘ውን ይፍለጥ።