ኣማኢት ሰማእታት ላምፐዱዛ ወግዓዊ ቀብሪ ኣብ ዘይረኸቡሉ፣ ወለዶም ሬሳ ደቆም ስኢኖም ሰንፈላል ኮይኖምሉ ኣብ ዘለዉሉ ኣጋጣሚ፣ ኣብ ቦለኛ፣ ዓዲ ጥልያን ‘መበል 40 ዓመት ቦለኛ’ ብምምኽናይ ናይ ዳንኬራ ጽምብል ክገብር ዝሸብሸብ ዘሎ ሰብኣዊ እንዶ ዘይብሉ ምልካዊ ስርዓት ኢሳይያስ፣ እቲ ናይ ፈንጠዝያ ዳሱ ከይጽሙ መታን፣ ኣዴታት ዓዲ ጥልያን ኣብ ክራማት ናብ ኣስመራ ክገሻሉ ዝሓሰባኦ ትኬት ኣቐይሩ ኣብ ቦለኛ ክቕንያ ብመንገዲ ልኡኻቱ ናይ ምድንጋር ጎስጓስ የካይድ ከምዘሎ ምንጭታት ካብ ዓዲ ጥልያን ሓቢሮም።

እተን ኣዴታት ዓዲ ጥልያን፣ ሬሳ ዜጋታትና ናብ ዓዱ ከይኣተወ፣ ኣብ ክንዲ ዳስ ሓዘን ከመይ ጌርና ኣብ ቦለኛ ዳስ ጓይላ ክንተክል ኢለን፣ እቲ ስርዓት ንዘዋፈሮም ሃሱሳት ክብድሃኦም ከለዋ፣ “መንግስቲ ኤርትራ፣ መምለሲ ሬሳ ምሉእ ገንዘብ ከፊሉ’ዩ ግን ጥልያን በሊዖሞ’ እናበሉ መታለሊ መልሲ ይህቡወን ከምዘለው ክፍለጥ ተኻኢሉ’ሎ።

እዚ ከምዚ ኢሉ ኸሎ፣ ዝሓለፈ ቀዳም ኣብ ሰሜን ኣመሪካ ዝርከቡ፣ ዶክተር ኣባይ ኣስመሮምን ዶር ኣስገደ ሓጎስን ንልኡኻት ህግደፍ ኣብ ዘካየዱሎም ቴለ ኮንፈረንስ፣ ናብ ቦለኛ ዝኸይድ ሰብ ስኢና ስለዘለና፣ ከፊልና እንሰዶም ሰባት ርኸቡ ብምባል መልእኽቲ ከምዘመሓላለፉሎም ምንጭታት ሓቢሮም።

እቶም ናብቲ ኣብ ቦለኛ ከካይዱዎ መዲቦሞ ዘለዉ ፈንጠዝያ ዝሳተፍ ሰብ ብምስኣኖም፣ ኣብ ልዕሊኡ ኸኣ ደምበ ደለይቲ ፍትሒ ንምቅዋሙ ብዘካይዱዎ ዘለዉ ምድላዋት ሰጊኦም ዘለዉ ልኡኻት ምልካዊ ስርዓት ኢሳይያስ፣ ገለ ግሩሃት ከዘንግዑ መታን ብታሕቲ ታሕቲ ቲከት ምሻጥ ኳ እንተጀመሩ፣ ኣንፈቱ ተስፋ ስለዘቝረጾም ዓወንወን ክብሉ ይረኣዩ ‘ለዉ።