እዋናዊ መተሓሳሰቢ ኣብ ከተማ ኣስመራ፣ ብሓፈሻ ኸኣ ኣብ መላእ ኤርትራ ንእትርከብ ህዝብን ሓይልታት ምክልኻልን ኤርትራ

ኣብ’ዚ ቕንያት ‘ዚ ዋና ከተማና ኣስመራ ኣብ ኣዝዩ ክብ ዝበል ወጥሪ ትርከብ ኣላ። እሙናት ምንጭታትና ካብ ኣስመራ ከም ዝሓበሩዎ፣ ቀንዲ ምኽንያት ናይዚ ሓዱሽ ተኣፋፊ ኩነታት፣ ኣብዚ ሳልስቲ ክሳብ 10 ሽሕ ዝበጽሕ ስራዊት ደምሒት ንኣስመራ ከቢቡዋ ምህላዉ እዩ።

እቲ ብኣብያ ዕቑር ሰራዊትን ኣባላት ሃገራዊ ኣገልግሎትን ተጨኒቑ ዘሎ ምልካዊ ስርዓት ኢሳይያስ፣ እቶም ዝመልመሎም ዕጡቓት ደምሒት ከይልለዩ ምእንቲ  ጸልማት ከደኖ (ብለይቲ) ኣዋፊሩ፣ ህዝቢ ብምዝንጋዕ ሰፊሕን ጽዑቕን ግፋ ከካይድ ምዃኑ ብጭቡጥ ተፈሊጡ ‘ሎ።

ስለ’ዚ፣ ህዝቢ ከተማ ኣስመራ፣ ነቲ ካብ ህዝቢ ኤርትራ እምነት ስኢኑ ምስ ዕሱባት ሰራዊት ደምሒት ውዲት ብምእላም ክፍጽሞ ወጢኑዎ ዘሎ ናይ ተስፋ ምቝራጽ ወፍሪ ንምፍሻል ዕቱብ ጥንቃቐ ክገብርን ነንድሕዱ ክተሓላሎን መተሓሳሰቢ ነመሓላልፍ።

ኣብ ካልኦት ከተማታት ኤርትራ ዝርከብ ህዝቢ ‘ውን፣ ሎሚ ናብ ጎረበትካ ጽባሕ ንዓኻ ምዃኑ ተገንዚቡ፣ ተመሳሳሊ ጥንቃቐ ብምዝውታር፣ ነቲ ኣብ ከተማ ኣስመራ ክፍጸም ተወጢኑ ዘሎ ውዲት ብኣግኡ ሓቢሩ ክቃወም ከምዘለዎ ነዘኻኽር።

ህዝቢ ኤርትራ ብሓፈሻ፣ ብፍላይ ድማ እቲ ዶብ ሃገር ጥራይ ዘይኮነ ልኡላውነት ህዝቢ ኤርትራ ንምሕላው ‘ውን ግዴታ ዘለዎ ሓይልታት ምክልኻል ኤርትራ፣ ንህዝቡ ካብዚ ብስርዓት ኢስይያስ ምስ ዕሱባት ደምሒት ብምሽራኽ ኣጻዊዱሉ ዘሎ ናይ ውርደትን ሕሰርትን ውዲት ንኽብረት ህዝቡ ክከላኸለሉ ግዴታ ከምዘለዎ ክግንዘብ ይግባእ።

ኣብዚ ምልካዊ ስርዓት ኢሳይያስ ኣብ ናይ መወዳእታ ደረጃ ውድቀት በጺሑ፣ ብደምሒት እናተሓለወ መዓልቱ ዝጽብጽበሉ ዘሎ እዋን፣ ማዕጾ ጎረቤት ብሰራዊት ደምሒት እናተዃሕኵሐ ከምዘይሰምዐ ኣብ ዓራቱ ዘጽቅጥ ኤርትራዊ ዜጋ ክህሉ የብሉን። ይኣክል ምግድዳዕ ሓቢርካ ምናዕ።

ምልኪ ይፈረስ ሕጊ ይንገስ

24 ጥቅምቲ 2014