ሃማደኤ

ድስቲ ኵስኵስቲ ኢሰያስ

ጭፍራ ህግደፍ ጽብብ ክብሎ ከሎ፡ መሳርሒኡ ካብ ዘቘመን ማሕበራት ንሃማደኤ እዩ ዝዓበየ መደብ ዝህበን። ሃማደኤ ድማ ከም ድስቱ ኵስኵስቱ መጠን ብዕሙት ዓይነን፡ “እሺ ሕራይ” ዝቕበልኦ።

ኣብ ጀርመን ዝርከባ ኣባላት ሃማደኤ ን22 ሕዳር 2014፡ ኣብ ጐፒንገን (Göppingen) ሓንቲ ከተማ ናይ ጀርመን መበል 35 ዓመት ምምስራት ሃመደኤ ከብዕላ ይዳለዋ ኣለዋ። ቅድሚ ሓሙሽተ ዓመት ኣብ ማንሃይም (Mannheim) ጀርመን መበል 30 ዓመት ኣብዒለን ምንባረን ዝዝከር ኮይኑ፡ ሕጂ ድሕሪ ሓሙሽተ ዓመት ነቶም ዝተረፉ መንእሰያት ኤርትራ ምእንቲ ከጽንት ኣብ ስልጣኑ ንኽጸንሕ፡ ንፕሮፓጋንዳን መእከቢ ገንዘብን ክኾኖ ዝሃበን ዕማም እዩ። ሃማደኤ ድማ ከም መጋበርያኡ መጠን ነዚ ዅሉ ምጾታት እናረኣያ፡ “እሺ!” ኢለን ተቐቢልንኦ። ኣብዚ ዝሕሰብ ዘሎ ርኹስ ናይ ሆይሆይታን ዳንኬራን ውጥን፡ ደረፍትን ሙዚቀኛታትን ካብ ኤርትራ ከመጽኡ ከም መደብ ተታሒዙ ኣሎ። ኣብ ካልኦት ከተማታት ኤውሮፓ’ውን ክቕጽል መደብ ከም ዘሎ ይፍለጥ።

ኣየ  ልቦና ሃ. . ማ. . ደ. . ኤ!  “ኢሰያስ ንህዝብና ኣጽንቶ! ኣብ ስልጣንካ ጽናሕ’ሞ ንህዝብና ድሃኮ! ንመንእሰያት ደቅና ሰላም ኣይትሃቦም፡ ኣጥፍኣዮም” ይብሎኦ ከም ዘለዋ ካን ምርዳእ ስኢኑወን ድዩ? በሽሓት ዝቝጸራ፡ ገለ ካብኣተን ኣሕዋተን፡ ገለ ድማ ደቀን ዝኣኽላ ደቂኣንስትዮ ኤርትራ ብራሻይዳን ብበደዊንን ተዓሚጸንን ተቐቲለንን’የን። ብሓፈሻኡ መንእሰያት ኤርትራ ንደቂተባዕትዮ ደሚርካ፡ መግለጺ ዘይርከቦ ስቓይ ወሪዱወን ጥራይ ዘይኮነ፡ ከም እንስሳ እናተጠብሓ ኰላሊተን ወሲዶም ዝተረፈ ኣካላተን ድማ ሓመድ ኣዳም ከይለበሳ ዝተደርበያ ኣሽሓት’የን።

ኣብ ምድረበዳ ሲናይ፡ ኣልማዝ እትብሃል ጓልኣንስተይቲ፡ “እዚ’ውን ይሓልፍ፡” ዝብል መዓንጣ ከብድኻ ዘሕርር ቃላት ኣብ ከውሒ ወቒራ ከም ዝጸሓፈት ብዙሕ ሰብ ዝዝክሮ እዩ። ብዕለት 3 ጥቅምቲ 2013 ድማ ኣብ ደሴት ላምፔዱሳ ኢጣልያ፡ ኣብ ሓደ ረፍዲ እቲ ንዓለም ዘንቀጥቀጠ ናይ 367 ኤርትራውያን ቅዝፈት ኣጋጢሙ። ሓንቲ ካብቶም ግዳያት ድማ እታ ኣብ ባሕሪ ሓሪሳስ ንዓለም ብዓለማ ዝርንዝሕ ዝንብዐት ምስ ዕትብታ ዝተረኽበት ኣደ ነይራ። ነዚ ይትረፍ ክትሰምዖን ክትርእዮን፡ ክትሓስቦ’ውን ዘስካሕክሕ ፍጻሜ እናረኣያን እናስምዓን እየን’ምበኣር ሃማደኤ ንጭፍራ ኢሰያስ ከሳስያ ሃተምተም ብምባል ድቃስ ስኢነን ዝሓድራ ዘለዋ። ሕጂ ኸኣ ሕሉፍ ሓሊፉ፡ ንህዝብና ብደምሒት የርግጾ ኣሎ። ኣብ ውሽጢ ኤርትራ ዘሎ ጭቈና ዝመልኦ ህይወት ዝመረሮ መንእሰይ ድማ እግረይ ኣውጽእኒ ብምባል ሽም ከም ዘይብሉ ንህቢ ፈቐዶኡ ፋሕ ብትን ይብል ኣሎ።

ኣብ ከምዚ ኵነታት፡ ኣቡናት ካቶሊክ ናይ ኤርትራውያን መንእሰያት ናብ ስደት ምጥፋእ ስለ ዘተሓሳሰቦም፡ “ሓውካ ኣበይ ኣሎ?” ኣብ ዝብል ጽሑፎም፡ “መዓር ቀሪብካሉ ካልእ መዓር ከናዲ ዝኸይድ ሰብ የሎን” ናብ ስርዓት ኢሰያስ ነቐፌታኦም ኣቕሪቦም። ኣይግዳደን ሃማደኤ ግን ሽግር ህዝበን ዘይኮነ፡ ንዲክታተር ኢሰያስ የሳስያ ኣለዋ።

ዝኾነ ፍጡር ንውሱን እዋን ክጋገ ይኽእል’ዩ። ንዅሉ ግን ዶብ ኣለዎ። ስለዚ፡ በጃኻትክን ሃማደኤ፡ ህዝብና ይጠፍእ ኣሎ፡ ዓዲ ኹላትና ይበርስ ኣሎ። ስለዚ፡ “ኣብ ክንዲ ንሓደ ዲክታተር ብምስሳይ ዘይሃስስ ታሪኻዊ ገበን ትፍጽማ፡ ኣብ ጐድኒ ህዝብኽንን መንእሰያት ደቅኽንን ደው በላ። እንተ ወሓደ ኢድክንን እግርኽንን ኣክባ’ሞ፡ እዚ ንባዕሉ ሓደ ክብሪ ወይ ተቓውሞ ኣንጻር ዲክታተር ኢሰያስ ክኸውን እዩ፡” ብምባል ለበዋይ ከቕርበልክን እፈቱ።

ዓወት ኣብ ጸበባ ንዘሎ ህዝብና

ጽገ መንገሻ ካስል ጀርመን