ህዝብን ሃገርን ንምድሓን ራእናን ዓቅምታትናን ነስምር ኣብቲ ዝብል ጭርሖ ዝጀመረ ሃገራዊ ጉባኤ ንዲሞክራስያዊ ለውጢ፡ ሕጋውነት ተሳተፍቲ ድሕሪ ምርግጋጽ ፡ ኣጀንዳታት ሰሪዑ ኣኼባኡ የካይድ ኣሎ።

ብመሰረት’ቲ ተሰሪዑ ዘሎ ኣጀንዳታት፡ ጉባኤ ጸብጻብ ኤርትራዊ ሃገራዊ ኮምሽን ድሕሪ ምስማዕ፡ ኣብ ፖለቲካዊ ቻርተር፡ መሪሕ ሓሳብ፡ ሕገ-ህንጻ፡ ከምኡ ‘ውን መሰጋገሪ ቅዋም ዝኣመሰሉ ሰነዳት ክመያየጥን ክዛተን እዩ።

ኣብዞም ዝተጠቕሱ ሰነዳት ድሕሪ ዝግበር ዘተን ምይይጥ፡ ውሽጣዊ ሕጊ ሃገራዊ ባይቶ፡ ፖለቲካዊ ለበዋታትን ውሳኔታትን ከጽድቕ፡ ምርጫ ኣባላት ሃገራዊ ባይቶ ክካየድ፡ ከምኡ’ውን ደምዳሚ ኣዋጅ ከወጽእ ትጽቢት ይግበር።

ኣቦ ወንበር ኮምሽን ንዲሞክራስያዊ ለውጢ ኣቶ ኣማሃ ደሞኒኮ፡ ንቅጥዕን ኣገባብን ኣተዓዳድማ ተሳተፍቲ ኣመልኪቱ ኣብቲ ጉባኤ ኣብ ዝሃቦ መብርሂ፡ ተሳተፍቲ ብዲሞክራስያዊ ምርጫን ሕርያን ናብ ጉባኤ ከም ዝተዓደሙ ሓቢሩ። ኣብዚ መስርሕ’ዚ ፖለቲካውን ማሕበራውን ሚዛን ንምሕላው ኮምሽን ጉባኤ ኣብ ዝተፈላለያ ክፍሊ ዓለማት ቆይመን ምስ ዝነበራ ንኡስ ኮሚተታት ብምትሕብባር ኣድላዪ ጻዕሪ ከምዘካየደ ኣገንዚቡ ። ምእንቲ’ዚ እቲ 500 ክኸውን ተመዲቡ ዝነበረ ቁጽሪ ተሳተፍቲ ክብ ከምዝበለ ኣረዲኡ።

ጉባኤ ኣብ ናይ መጀመርያ ደረጃኡ ብምህላዉ ዛጊት ኣብ ቀንዲ ትሕዝቶ ዛዕባታቱ ዓሚቕ ዘተ ኳ እንተዘየካየደ፡ ተሳተፍቲ ጉባኤ፡ ነቲ ኣብ ጥርዚ ቅልውላው ዝርከብ፡ ንኤርትራ ሃገርና ሓኒቑ ሒዙዋ ዘሎ ኩነታትን ምረት ህዝብናን ኣብ ግምት ብምእታው፡ ኣብዚ ጉባኤ ‘ዚ ብዘይካ ተዓዊትካ ምውጻእ ካልእ ኣማራጺ ከምዘየልቦ ብስሙር ድምጺ ይገልጹ ኣለዉ። ነዚ ክዉን ንምግባር፡ ስኒትን ስምረትን ተጋባእቲ ኣገዳሲ ምዃኑ ኣብ ተሳተፍቲ ግንዛበ ሓዲሩ ከምዘሎ ዘንጸባርቕ መንፈስን ሃዋህውን ድማ ኣብቲ ጉባኤ ዓሲሉ ይርከብ።