በቲ ፋሽሽታዊ ምልካዊ ስርዓት ኢሳይያስ ብ 3 ሚያዝያ ኣብ ኣስመራ ዘካየዶ ናይ ተመልከተለይ ግፍዓዊ ርሸና ሓንቲ ጋል ኣንስተይቲ እትርከቦም ብድምር 6 ንጹሃት ኤርትራውያን መንእሰያት ከምዝተተቐዝፉ ካብ ኣስመራ ዝበጽሓና ሓበሬታ ኣረጋጊጹ።

እተን ኣብ ምዕራብ ኤርትራ ድሕሪ ዝተኻየደሎም ታዕሊም 4200 ተዓለምቲ ጽዒነን ብኣስመራ ናብ ዓሰብ ዝሓልፋ ዝነበራ 18 ዓበይቲ ናይ ጽዕነት መካይን ኣስመራ ድሕሪ ምእታወን ዝተኸፍተ ቶኽሲ ናይ ፍርቂ ሰዓት ካ እንተነበረ ብድሕሪኡ ህዝቢ ተነዓዒቡ ግፋን ተፍትሽን ክሳብ ሰዓት ሓደ ወጋሕታ ከምዝቐጸለ ኣብቲ ትማሊ ብኢንተርነት ዝዘርጋሕናዮ ዜና ተጠቒሱ እዩ።

ህዝቢ ኣብ መንጎ ናብቶም ብቶኽሲ ዝህደኑ ዝነበሩ መሳኪን ተዓለምቲ ተሓዊሱ ተቓውሞኡ ብምግላጽ ነቲ ቅንጸላ ናይቲ ፋሽሽታዊ ስርዓት ደው እንተዘየብሎ እቲ ስርዓት ገበናዊ ተግባሩ ደው ናይ ምባል ኣንፈት ከምዘይነበሮ ‘ውን ይግለጽ።

ቁጽሪ ናይ ቁሱላት ክንደይ ምኻኑ ዛኢግት ኣይተፈልጠን፡ ፋሽሽታዊ ምልካዊ ስርዓት ኢሳይያስ ናብ ሆስፒታል ኦሮታ ህዝቢ ምእታው ከልኪሉ ከምዘሎ ውን ‘ቲ ሓበሬታ ይጠቅስ።

ድሕሪ ‘ቲ ግፍዓዊ ፍጻሜ ናይቲ ምልካዊ ስርዓት መንፈስን ሃዋህውን ህዝቢ ኤርትራ ብፍላይ ድማ እቲ ደቂ ማህጸኑ ኣብ ቅድሚ ዓይኑ ክዝሕዝሑ ዝረኣየ ህዝቢ ኣስመራ በዚ ጉዳይ’ዚ ተባሒቱ ቁጥዐን ሕርቃንን ዝተሓወሶ ዕላሉ እዚ ጉዳይ ‘ዚ ኮይኑ ከምዘሎ ተፈሊጡ።

እዚ ከምዚ ኢሉ ኸሎ፡ ቅድሚ ሰለስተ መዓልታት ‘ውን ናብ ሱዳን ክትሰግሩ ሓሲብኩም ተባሂሎም ሓደ ኤርሚያስ ዝብሃል ዘዋሪ ታክሲ ወዲ ኣስመራ (ገዛ ባንዳ) ዝርከቦም 5 መንእሰያት ‘ውን ኣብ ጋሽ ከምዝተረሸኑ ምንጭታት ብኻልእ ወገን ሓቢሮም።

ውጹዕ ህዝቢ ኤርትራ ነዚ ጥፍኣትካ ዝወጠነ ኣረሜናዊ ምልካዊ ስርዓት ኣሊኻ ብሕጊ ዝሕተት ዲሞክራስያዊ ስርዓት ክሳብ ዘይተኸልካ እዚ ካብ ግቡእ ንላዕሊ ኣመና ስለ ዝተጻወርካዮ ዝደጋገመካ ዘሎ ቅዝፈት መንእሰያትካ ገና ክቕጽል እዩ። ስለዚ ስለ ሰላምን ቅሳነትን ፍትሕን ረኺብካ ክትቀስን፡ ብሩህ መጻእን ቀጻልነትን ወለዶኻ ‘ውን ከተውሕስ ብህጹጽ ተለዓል።