ብ ኣወልኼር ዓ/ሕፊዝ

”ናይ ዝተወለድካላ ስድራ፤ናይ ዝብጻሓካ ቦታን ህዝብን ባህልን ቋንቋን፡ ናይ ትኣምኖ ሃይማኖት፤ ናይ ዝተማሃርካላ ቤት ትምህርቲ፡  ናይ ትድግፋ ጋንታ ኩዑሶ …. እንቲማእ (ፍቅርን ሓላፍነትን) ክስመዓካ ባህርያዊ`ዩ።ካብ ካለኦት ዝለዓልካ (ዝበለጽካ) ወይ ዝተሓትካ ኮንካ ዝስመዓካ ኮይኑ ግና ሕማም`ዩ።“

እዚ ዝስዕብ ሓተታ ናብ`ቶም ብሰንኪ ዋሕዲ ኣፍልጦ ታሪኽ ህዝቦም፤ ንናይ ሓሶት ፈጠራ ታሪኽ ክኣምንዎ  ይኽእሉ`ዮም ኢለ  ዝገመትኩዎም ሸነኽ ዘተኮረ ኮይኑ፤

ኣብ ጉዳይ “ተስፋጽዮን” ክሳድ ክሕዝ ንዝደሊ ግና፡ ምፍልላይን ምጽላእን ህዝቢ ኤርትራ ን“ተስፋጽዮን” ዕላማ ኣይኮነን ታክቲክ`ዩ። ዕላምኡ：- ንሓደ ሸነኽ ካብ ህዝቢ ኤርትራ /ትግርኛ ዝዛረብ  ክርስትያን/ ነቲ ካልእ ጎኑ ከም ዝጸልእን  ኣብ ኣእምርኡ  ዝጸነሔ  ኤርትራዊ  ጂኦ ፖለትካዊ ተረድኦ ሓጺብካ ንጽዮንነት ዘገልግል ሓይሊ ምግባር`ዩ።

ኣብዚ ዝለዓል ሕቶ：-

• ” ተስፋጽዮን “ ድዩ ብኣነ-ሕራይ ክድምንኡ ዘቅርብ ዘሎ ፤ ዋላስ ዓለማዊ ጽዮንነት ዝተኻረዮ ሰብ`ዩ ? ዝብል ይኸውን

በዚ ድዩ በቲ  ነዚ ስራሕ ምዕጣቅ ብዘይ ጥርጥር ንጁባ ”ተስፋጽዮን “ ክሳብ ዒቅ ዝብሎ  ብዶላራት  ዝመልኦ ንህዝቢ ኤርትራ ኸኣ ናብቲ እቶን ማእከላይ ምብራቅ ዝድርግም ምዃኑ`ዩ።

በዚ ኣጋጣሚ`ዚ  ኣብ መንጎ የሁድ ከም ሃይማኖት፤ ኣህጉራዊ ጽዮንነት  ከኣ ከም ፖለቲካዊ ወገናዊ ምንቅስቃስ ዘሎ  ዓቢ ፍልልይን ግርጭትን ርዱእ ክኸውን ይግባእ።

ጽዮንነት ኣብ ሽበራ ዝኣምን  ዓማጺ ትካል ምዃኑ ቀንዲ ኣመንቲ የሁድ ዝውግዝዎ፤ንድኽመት ሃይማኖታዊ እምነትን ናዚ/ሂትለር ኣብ ልዕሊ ያሁድ ዝፈጸሞ ኣረመናዊ ናይ ምንዳድ ግፍዒ  መዝሚዙ ንያሁድ ካብ መስመሮም ዝኣለየ ኣግላሲ ማሕበር  ምዃኑ ዘሪኢ ዘየጠራጥር ብኣይሁዳውያን ዝተጻሕፈ  መግለጽታት ስለ ዘሎ  ብኡ  ኣቢልካ ንፍብረካ “ተስፋጽዮን” ምቅላዑ  ኣገዳሲ`ዩ።

ብዝተረፈ

ስካሪኮ፡ ሕብረተሰብ ብሓደ ሃላኺ ኣቅሓ ንነዊሕ ግዜ ክጥቀም ጸኒሑ ምስ ርእሰማላዊ ኣህላኺ ሕብረተ- ሰብ ምፍጣር ከኣ ንሓደ ግዜ ተጠቂምካ ዝስንደዉ ኣቁሑ  ይበዝሑ፤ ንኣብነት ሓካይም ንመርፍእ እናዓገሙ ንብዙሕ ግዜ ዝጥቀሙ ዝነበሩ ኣብ ክንድኡ ንሓደ ግዜ ተጠቂሞም ዝስንድውዎ መርፍእ ፤ ኣብ ክንዲ እታ ንነዊሕ ግዜ እተገልግል ዝነበረት ዘንቢል ከኣ ንሓደ ግዜ ዘገልግሉ ኸረጢት ናይሎን ………………… ወዘተ ዝኣመሰሉ ስለ ዝፈርዩ  ስካሪኮ ማለት መኤከቢ ጓሓፍ ክህሉ ኣገዳሲ ጉዳይ ይኸው።

ናይ ኣባይቲ ናይ ፋብሪካታት ናይ ንክሌር ………. ስካርኮ ኣብ ባይታ  ርኡያት ኮይኖም ኣብ ኣእምሮ ደቂ ሰብ ዝቦትኡ  እስካሪኮ ኸኣ ናይ ባህልን ልምድን ታሪኽን ስካሪኮ ኣሎ። ኣብ ታሪኽ ዝምድና ደቂ ሰባት ብኣወንታን ኣሉታን ዝምዘን ዝምድና ኣሎ፤ እቲ ኣሉታዊ እንብሎ እቲ ስካሪኮ ታሪኽ ምዃኑ`ዩ። ኣብዚ ስካሪኮ`ዚ ምጽሕታር ደስ ዝብሎም ሰባት ከኣ ኣለዉ ። “ተስፋጽዮን” ሓደ ካብኦም`ዩ።

ኣብ ታሪኽ ዝምድና ኣሜሪካን ጃፓንን ሂሮሺማ፡ ናጋሳኪ ዓቢ ስካሪኮ ታሪኽ ኮይኑ ከብቅዕ ክልቲኤን  ሃገራት ኣብቲ ኣወንታዊ ሸነኽ ዝምድና ብምትኳር ኣብ ምጽሕታር ስካሪኮ  ስለ ዘየዕረበኦ ዓቢ ምጣነ ሃብታውን ወተሃደራውን ዝምድና ሃኒጸን`የን።

ኣብ ዝምድና ጸዓዱን ጸለምትን ኣሜሪካውያን እቲ ኣብ ርእሲ ጸለምቲ ዝተፈጸመ ባርነታዊ ግፍዒ፤እምቢ ዝበለ ጸሊም ኣብ ጨናፍር ኣግራብ ምሕናቅ፤ ጸሊም ኣብ ጻዕዳ ዝስቀላ መጓዓዚያ ከይስቀል፤ ኣብ ጻዕዳ ዝሸነላ ሽንቲ ቤት ከይሸይን ……… ዝኣመሰሉ ግፍዕታት ስካሪኮ ታሪኽ ናይቲ ዝምድና ኮይኑ ብሳላቶም ኣወንታውያን ናይ ክልቲኡ ሸነኽ ከኣ ጸሊም ኣሜሪካዊ ንዓባይ ኣሜሪካ ን2 ዘመነ ምርጫ ዝመርሓሉ እዋን ሪኢና !

ኣብ ታሪኽ ህዝቢ ኤርትራ ኸኣ ኣሉታዊ ምዕራፍ የለን ማለት ኣይኮነን። እቲ “ተስፋጽዮን’’  ዝጻሕተሮ ናይ 40ታት ናይ ገለ መዓልታት ህውከት ናይ ታሪኽ ስካሪኮ ምዃኑ ዘየካትዕ`ኳ እንተኾነ፤ ግና ከምቲ ክገልጾ ደስ ዝበሎ ሃይማኖታዊ ዘይኮነስ ኣብ መንጎ ደምበ ናጽንትን ጸሬ ናኣጽነትን`ዩ ነይሩ። ከምኡ ምንባሩ ዝሓበሩ ክሳብ ሕጂ ብሂወቶም ዘለዉ ኣብቲ ሰዓት`ቲ ኣብ መንጎ ኣሕዋቶም ኣስላም ኮይኖም ዘሕለፍዎ ክርስትያን ኣቦታት መስኪሮም`ዮም። ሕጂ`ውን እዚ ታሪኽ`ዚ ናይ ታሪኽ ስካሪኮ`ዩ። “ተስፋጽዮን” ክጽሕትሮ ኸኣ ግድን`ዩ።

ብመንጸር ናይ`ዚ ስካሪኮ፤ “ተስፋ ጽዮን” ክጽሕትሮ  ዘይክእል ካልእ ገጽ ናይቲ ተርእዮ  ኣወንታዊ ተርእዮ ኣሎ  ካብቲ ብዙሕ ገለ ፡-  ጠንቂ ናይቲ ዕግርግር ናይቶም ንባይቶ ሕቡራት መንግስትታት ዓለም ነቂሎም ዝነበሩ ሰውራዊ ሙሁር ሸኽ ዓ/ቃድር ከቢረ ብኢድ ኣንድነታውያን （ደምበ ጸሬ ናጽነት）ምቅታሎም`ዩ ነይሩ።

• ነዚ ቅትለት`ዝን ሳዕቤናቱን መሰረት ዝገበረ፤ ኣስላምን ክስታንን ደምበ ናጽነት ዝተሳተፍዎ ኣኼባ ሲነማ እምፔሮ ……… ዶ/ ሳልሕ ከቢረ ምእንቲ ሓድነትናን ምእንቲ ሃገርናን ስድራ ቤት ሸኽ ዓ/ቃድር ከቢረ ሕድገት ጌርና ኣሎና ዝበልዎ ኣርጋእን ሓድነታውን ስጉምቲ፤ ሓርበኛ ራስ ተሰማ ኸኣ ደም ሓወይ ሸኽ ዓ/ ቃድር ከቢረ ……… እናበሉ ዝመደርዎ ኮታ ንኹሉ`ቲ ሓላፍነታዊ፤ ጂኦ ፖለትካዊ ሓድነት ዘንጸባርቅ መግለጽን መርገጽን ብስእልን ጽሑፍን ዝተሰነደ `ዩ።ኣፍካ ዝሃበካ ምግዓር ኣይኮነን።

• ኣብ ዘመነ መግዛእቲ ጥልያን ኣብ ኣኽርያን ከባቢኣን ዝነበሩ ክርስትያን፡ ቤተ ክርስትያን ክስርሑ ምስ ደለዩ ቤተ ክርስትያን ቅድስቲ ማርያም ፍቃደኛ ስለ ዘይነበረት ተማጊቶም ክስራሕ ዝገበሩ ጥራሕ ዘይኮነ በቶም ክርስትያን ስም ናይ`ቲ ቤተ ክርስትያን ክሰም`ዩ ዝተጠልቡ ድሕሪ`ቶም ክርስትያን ግድን ትስምዩ ኢሎም  ምስ ኣትረርሎም ………. “ በሉ ! ንሕና ጅብሪል ንስኹም ከኣ ገብሪኤል ትብልዎ መልኣኽ ስለ  ዘሎ እንዳ ገብሪኤል በልዋ “ ዝበሉ ኣስላማይ ምስለኔ ፍቶራሪ ዓሊ በኺት`ዮም። እዚኦም ህዝቢ እዚኦም ድዮም ብሓደ ክነብሩ ዘይክእሉ ደመኛታት !!!!  ስካሪኮ

AAHafiz （208）21/11/2016